[惡搞無極限] 就係咁，我同幾個豬朋上左大陸獵金: １７６　走馬燈（３）

我望住面前地下既玻璃，滿地既碎片，眼睛不先覺咁喊出黎，係一種害怕既感覺令到我喊。喊緊果陣，我聽到一把聲。

「做咩事啊賢仔？」你媽媽既聲音，佢走到我身邊，望住滿地既碎片，「你做咩黎！點解會咁！」

果陣既我只係識得不停咁喊，咩都唔知就只係不停咁喊。

媽媽就忙住收拾眼前既殘局，而且一邊執仲一邊話：「等我執好之後就同你開年！」

我記得，我打爛既係一隻碟，係一隻上面印左相既碟，係一隻，上面印左我、媽媽、爸爸、爺爺同嫲嫲……





係我地既全家福。

但我記得，我仲打爛多一隻碟，我望住媽媽，佢一路執，一路喊，因為另一隻，係用佢同爸爸既結婚相印既碟。

果陣，佢地兩個好似關係唔係咁好……

「……媽媽……」我喊住咁叫媽媽，我無記錯的話，佢應該會攬住我，但點知……

佢一巴昇左過黎既！？唔通我記錯！？





我望住淚流滿面既媽媽呆住左，而佢又打左巴過黎。

好彩而家係睇緊走馬燈，唔痛……又打多巴，但點解今巴有少少痛既，佢跟住不停咁連續打左我好多巴，我記憶入面既媽媽唔會咁架ＷＯ。

突然，一道白光出現，吸力好大，我成個人抽離之後就眼前一黑，然後聽到……

「小姐！妳不能這樣對病人的！」點解講普通話既？然後係感覺到一巴打左係我左邊面。

「小姐！妳快地下來！」又一巴，今次係我右邊面。





我張開眼睛，就係同時，我感覺到一滴水滴左係我塊面度，係眼淚，見到阿妹佢喊晒咁騎係我身上面，左右開弓咁大巴大巴昇緊我。

「……時興隆小姐，妳下次可唔可以換另一個叫醒人既方式？」我話。

「阿哥！」佢答。