[惡搞無極限] 就係咁，我同幾個豬朋上左大陸獵金: １７５　走馬燈（２）

咦？今次又係邊度呢，點解呢度咁熟既……

「賢仔啊，快Ｄ過黎一齊影相啦。」爸爸同我講緊野啊。

「係啊賢仔，快Ｄ過黎啦。」媽媽都向我招緊手。

我企定定望一望四圍，呢度好似係個公園，而我，好似扭緊計咁，「唔要！我唔影！」

究竟係咩野事我要扭計呢？





「屋企已經有好多機械人啦，你仲要扭計買？」媽媽笑住咁講。

「但屋企無果隻機械人。」我話，然後不停咁喊，又訓地，又四圍吐口水。

「你再係咁樣扭計既話！就打你！」阿爸好惡咁對住我講。

但我無理佢，繼續扭計，而阿爸亦都遵守佢既諾言，一巴打左過黎，但呢巴，無打落我度，因為，媽媽幫我擋左，佢用手擋左阿爸呢一巴。

「你成日就係識得講打！佢係你個他黎架！」





「咁又點啊！唔乖就要打架啦！難得一家人一齊出黎玩！想影返張全家福都唔得！」阿爸好惱咁話。

而媽媽就呵緊我：「賢仔乖，你聽話既話一陣媽媽先買比你。」

全家福……原來……我張全家福已經係細餉五六歲既事，果陣唔生性既我就要扭計唔影，相比阿妹果張唯一，其實原來，我已經錯過左好多次機會……