《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 無所畏懼
時間悄然流逝， 房間內燈光忽明忽暗， 相依一起的二人則從未分開過。
天暗了， 天又亮了。
內心激盪剛剛逝去， 空氣中依然洋溢著淡然香氣。 我仰躺著， 視線的焦點早已越過天花板， 腦海一片空白。 雖然現在睡覺是一件極為奢侈之事。
第二日醒返嘅時候， 我已經忘記我哋如何入睡。 大概係我唔舒服到好攰就自然咁訓著咗， 我張開眼睛， 映入眼簾嘅係海晴嘅面孔。
我依然維持躺在海晴大腿上嘅睡姿， 猶如一個小男孩訓喺媽媽懷內一樣。 海晴則緩緩攤睡喺梳化右邊， 雙手放喺我身上入睡。
過咗一陣閉上眼絕對嘅黑暗同寗靜後， 我嘅身體被預定嘅信號啟動， 生理時鐘提醒我起床。 我滿足咁伸個懶腰， 稍稍活動一下身體， 慢慢地張開眼睛， 猶如舊時候起床一般。
雖然身體軟弱無力， 但我仍然緊緊地纏住海晴腰部， 牢得就好似明天就係最後一日般。 海晴嘅身體好軟好滑， 涼涼嘅肌膚貼喺身上就會令人莫名激動。 所以我睡夢中感覺永遠是堅硬而炎熱， 令人熟悉的生理反應令我安心下來。
我舉起手想坐起身， 摸到嘅係一陣柔軟嘅感覺。
嗯…？？
個股柔軟感令我忍唔住按多兩下。
唔通… 係…
我抬起頭， 發現雙手正正放喺海晴胸前， 我馬上呆如石像般不敢再郁， 仔細觀察下， 好在佢仲未醒。
一把秀麗嘅長髮正緩緩散落我額頭上， 海晴托住頭面向我訓著坐。
佢手心依然放喺我額頭上面。
結果兩個人互相依偎住訓著咗。
我記起， 睡夢中嘅我夢到無數惡耗， 身體感到前所未有般寒冷， 海晴對我嘅擁抱。
就如美夢般， 如幻似真。
「唔…」 海晴朦朧般叫著。
或許係我起身嘅動作太大， 將海晴都稍為嘈醒， 她瞇著眼晴對我講， 對著我甜笑，「喂… 你醒啦？」
「嗯」
我慢慢坐起身， 腦海仍舊陣陣眩暈感覺。
「依加幾點呀...」 海晴閉起眼睛問道。
我望一望時鍾， 答道， 「十一點渣。」
「咁我訓多陣先啦...」
個懶訓豬聽到之後又繼續訓...
過咗一陣， 海晴攬住我條腰， 將頭埋向我肚皮上。 我回想喺發燒嘅時候， 海晴將我嘅外套蓋回我身上。
佢係唔係凍呀？ 我將外套放返喺佢身上。
「好啲無？」我問。
佢嗯咗一聲， 抱緊我嘅雙臂卻從未放手。
從個陣開始， 我就喺心入面默默咁諗， 無論係愛情定係友情， 無論佢係唔係鍾意我， 定係鍾意其他人， 我都想守護佢一生。
房間入面好安靜， 海晴幽淡嘅體香同平穩嘅呼吸令呢間臨時嘅小睡房顯得無比安寗， 我幸福地歎一口氣， 停止腦海中嘅思想， 再次進入睡眠。
精神壓力突然異常巨大， 個種熟悉嘅感覺， 係我經常病發時候嘅感覺。
我猛然張開雙眼， 用力吸氣與呼氣， 張開雙眼後我四周張望， 卻只見一遍漆黑， 微微泛黃嘅街燈隔著窗簾由窗外透入內， 柔和地照住房入面嘅文件堆與書台上。
我撐起雙手慢慢想坐起身， 一邊打量著廳內嘅黑暗， 一邊借住外面嘅街燈光線去望向台上嘅鐘， 依加只係晚上十一點， 原本唔係第二日， 我只係訓咗七、八個鐘左右。 雖然係舊時代黎講， 七個鐘一啲都唔多。
不過現今嘅情況， 我哋處於分秒必爭嘅狀況。
我用手按一按太陽穴， 剛才嘅頭痛仲陣陣留喺腦中。
咦！
我岩岩好清晰感覺我變緊喪屍！ 依加我…
我再次閉起雙眼， 慢慢回想起訓之前發生嘅零星片段， 我同海晴逃亡… 我被喪屍咬傷手指… 見返權哥佢哋… 個警察同軒少嘈…
入房休息…
開始細想後， 呢刻我頭腦慢慢開始清晰， 慢慢脫離睡醒嘅頭昏腦漲， 突然一陣不安感湧起， 腦海中驀地彈出幾個想法…
可能只係我哋一廂情願覺得出面班人係喪屍姐， 可能佢哋並唔係？
有無可能感染者並唔會好似喪屍一樣用咬同抓去傳播病毒， 將人變做喪屍？ 但係點解被咬傷之後我會發燒？
目前黎講我並未親眼目擊到有人變成喪屍， 所有嘅感染者似乎喺我哋黎之前已經存在… 喺我哋到紅磡站之前…
會唔會喺感染咗之後只會發燒等等… 而唔會變喪屍？
我搖一搖諗得太多以致頭昏腦脹嘅腦袋， 都喺個句， 依加諗黎都無用啦， 要變喪屍嘅遲早會變嘅， 話唔定根本唔會變呢？
咪住…… 火車入面個男人受到疑似喪屍嘅咬傷因而感染病毒， 之後後變做喪屍衝入黎我哋車廂… 另外仲有一個女人被咬傷… 但係佢都好似無即刻變喪屍… 被抓同被咬係唔係一樣都會變喪屍， 如果發起高燒加上傷口明顯受到感染， 變做喪屍嘅機會係唔係比較大？ 而喺十幾個鐘前我先被一隻鐵閘外面嘅喪屍咬爆隻手指…
但係我都即時消咗毒啦喎… 燒又發完只係依加有少少攰姐， 可能無事嘅…
被咬傷… 發病… 變異… 理應係咁樣， 但係我並無變異到。
唔通我有抗體咁正？ 諗諗都知傻傻地， 會唔會係我變異咗自己唔知！？
我清晰記起… 發病時候海晴個樣同聲完全唔同咗… 難道由感染者嘅角度黎睇， 正常人類喺會唔同咗， 所以先會攻擊人類？
諗到呢一度， 我頓時坐立不安， 連忙悄悄企起身， 悄步地走出房間走去茶水間。
後來我發現當我知道真相嘅時候， 早已經無再好似當時咁煩惱。
經過一片漆黑後， 透過外頭微弱光線， 終於摸黑搵到茶水間。
我輕聲扭開門鎖，吱一聲慢慢推開門。 推開門後，只見房間也是漆黑一遍，不過窗外亦透射著些許泛黃嘅光線入黎， 茶水間並唔大， 門口設係左手邊， 入到去就有一張小小嘅台係中間， 台後面則有幾個廚櫃釘咗喺牆上面， 廚櫃下面則有洗手盤。 而房間另外一邊就有部飲水機， 隔離有個雪櫃， 亦已經係房間嘅盡頭。
但係， 雪櫃個到有個黑影!
我眼睛有少少澀， 令我馬上揉一揉眼晴， 希望只係睇錯。
再次張開眼， 黑影依舊喺到！
我心臟急跳， 突然記起陳晉嘅說話。
「成棟樓除咗我同潘sir之外， 再無其他人。」
唔通喺喪屍！？ 我連忙伸手插入褲袋， 但卻搵唔到一直陪我征戰連埸嘅刀。
一定係岩岩放低咗喺房！
「踏。」
前方突然傳來一下響亮的腳步聲， 我猛然瞪向黑影， 高舉雙手隨時作準備， 只見一股強光飛射過黎。
「啪──」
我快速閉上眼再眨眼， 適應光線後見到軒少正企喺我前方， 原來係軒少掟咗枝電筒過黎， 正正喺我前方張台上面。 軒少微起雙眼望著我， 手中拎住一枝香煙， 微微火光照射住佢嘅側臉， 冷峻嘅臉孔絲毫沒在意我剛才嘅警覺。
「軒少？」
「點樣？」
「無… 你訓唔著…？」 我本來以為茶水間只會得我一個， 點知多左個軒少係到， 令我一時之間不知所措， 情況非常尷尬。
軒少無應我， 只係繼續抽煙。
見軒少無應， 我就徑自越過佢， 走向櫃個邊搵野食。
跟住軒少將煙擦向抬放低整熄， 之後就走出茶水間。
我內心感到有少少尷尬， 被軒少如此無視， 令我覺得自己好毒。 我以行動驅走我嘅想法， 趕快繼續搵野食， 希望食飽就返入房繼續訓覺， 回到自己熟悉嘅私人空間。正當我搵緊野食嘅時候， 一把熟悉嘅聲音叫喚我。
「喂， 潘sir搵你呀。」 我回頭一看， 只見陳晉企喺茶水間門口， 一身交通警服早已脫去， 只留低警察恤衫同褲。 唔知點解， 我覺得陳晉嘅神情同態度好似唔同咗。
「咩事？」
「潘sir有啲事想問一問你， 都係關於我哋逃離呢度嘅事。」
「哦…」 我點點頭， 陳晉就掉頭帶我上另一層。
好快陳晉就帶我走入一間房， 房間又係一間典型辦公室。 潘sir正正坐咗喺書台嘅辦公櫈後面。
「黎咗啦？」
「係…」 面對潘sir， 我細膽嘅性格又油然而生， 只可以答一粒字出黎...。
「好， 咁我都唔轉彎抹角， 我打算續個續個人見一見， 睇下每一個人有咩所長， 之後就會展開我哋嘅計劃。」
潘sir面沉如水， 沉聲說道， 「雖然香港有喪屍嘅出現… 我知道， 喪屍喺唔少人嘅心入面留低咗恐懼嘅陰影。 事實上喪屍其實並無我哋想像中可怕， 我哋今後應該盡量避免同喪屍糾纏， 只要潛行過去我哋嘅目的地， 就能夠避免死傷同受感染。 你同唔同意我嘅講法？」
我點點頭回答。
「好， 不過要我哋兩手空空出去， 萬一見到喪屍我哋都需要有自保能力。 所以我哋需要武器同裝備， 先可以保護到大家。」
「係呀， 但警局唔係有槍咩？」 我問潘sir， 我唔係好明佢叫我黎到底想點。
「係有槍，」 潘sir臉上閃過一絲怪異嘅神情， 好似係到嘲笑我一樣。 「不過， 槍並唔係我哋身上， 而係喺裝備庫， 我叫你黎就係想你幫手去搬上黎。」
「哦好呀…」 毒男唔識拒絕人... 加上我頭腦仲喺唔係好清晰， 並無諗到潘sir背後嘅陰謀。
「哈哈哈哈哈… 好！ 好！ 細路， 我果然無睇錯人！」 潘sir見我答好， 頓時笑得見牙唔見眼， 過咗一陣先收起笑聲， 再接住講，
「咁我就簡單交代一下行動嘅細節。 今次行動， 我主要想你哋前往樓下去拎取我哋所需嘅物資， 我哋需要嘅槍呀武器全部都喺呢棟樓最底層嘅地下倉庫。」
「我希望由陳晉帶路。 至於需要參與本次行動嘅人員， 初步定為軒少、光頭佬同埋 你。」 我點點頭， 潘sir就繼續講，
「不過呢， 由於我哋嘅人手唔夠嘅關係， 女性都需要參加今次嘅行動， 所以你女朋友都要一齊去。」
「咩話？！」 我驚訝得大聲叫道， 立即打斷潘sir嘅話。
「點樣？ 你有意見？」 潘sir淡淡問道。
「我意思係… 我哋幾個去咪得囉！ 不如比海晴休息下先啦， 佢都仲訓緊。」 潘sir態度突然急轉， 我馬上兜一兜， 唔知點解我覺得我有責任保護海晴， 如非必要我都唔想佢冒險。
潘sir揚一揚眼眉， 回應我， 「呢個係最好嘅計劃。」
我唔甘心， 繼續講， 「其實搬槍姐， 唔洗咁多人下話， 就算多咗海晴都無咩幫助啦！」 講完呢句我先發現， 潘sir無講到要呀豪同Coco姐一齊去， 我頓時明白到兩樣野嘅關連…
因為呀豪之前企喺潘sir個邊！ 所以潘sir無叫到佢哋去冒呢個險！
行動入面去嘅都係潘sir睇唔順眼嘅人！ 軒少， 權哥！ 但係我無得罪到潘sir喎… 莫非佢係想試下我會唔會好似呀豪咁企佢個邊， 聽曬佢講？
所以由我反駁佢開始， 佢神情就開始變得冷淡。
潘sir回應， 「呢個係我嘅決定。 加上地下存倉有喪屍喺個到， 多個人多分力。」
諗通之後我勃然大怒， 我對住潘sir大罵，
「唔得！ 枉你身為一個警察， 竟然要一個弱不禁風嘅女仔參與咁危險嘅行動！ 警察就應該保護市民！ 係都應該你帶頭去啦！ 仲好意思堅持要個女仔一齊去？」
聽完我罵佢， 潘sir黑起塊面， 默然企起身， 然後走到我面前。
「你敢違抗我嘅命令？」 佢冷漠說道， 雙目目不轉晴凝視住我， 眼神冷淡凌厲。
「係！ 」 唔知邊到黎嘅勇氣， 我毫不畏懼踏前一步， 同潘sir企硬。
「依加我係話事個個， 我自有計劃， 你只需要服從！」
我頓時無名火起， 呢個呀叔一定係睇戲睇上腦， 以為自己大曬！ 甚至想連海晴都搞埋！
我指住佢大罵， 「收皮啦你！ 我根本只係想借我哋黎滿足你自己！ 你個死黑警！」
潘sir眼眉立時揚一揚， 然後講， 「細路， 做每一件事都要承擔後果。 你出言侮辱我就要接受懲罰… 陳晉， 縛起佢。」