《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 病發

「咁你呢？」

「吓？ 我咩？」

「你問完我梗係到我問返你啦！」

「我？ 我無男朋友架！」 我驚惶得舉起雙手搖頭否認。

海晴呆咗一呆， 我唔係gay架！ 我再急忙道， 「我真係唔係gay架！」





「哈哈哈哈哈…」

「我問你有無女朋友呀白痴仔」 海晴失笑咁答， 我尷尬得成塊面都開始熱。

跟住我同佢提起咗我最近一次喺中學時期， 點樣遇到一個女仔， 點樣開始拍拖。

「好sweet呀你哋」 佢微微咁笑。

「你都覺呢。」





「聽你咁講佢真係一個好女仔」 佢輕鬆咁笑住講。

「梗係啦， 我暗戀咗佢好耐架啦。」

「睇得出呀」 佢嘲笑我講。

「痴線， 其實係佢同我表白先架！」 其實我講大話…

「佢點樣架？ 有無樣睇？」





「佢好鍾意睇書， 佢好聰明同有啲書卷氣咁啦。 但無樣比你睇。」

「車， 我先唔恨睇」 海晴哼一聲， 擰轉面背向我。

我起身探頭去佢身邊望佢， 但佢又即刻擰去第二邊唔比我望。 佢扮嬲嘅樣好得意， 我忍唔住彈佢塊面。

「咦！！」 一掂到佢佢即刻好大反應再擰轉面， 然後偷咗我張櫈黎坐。

「喂張櫈我架」 我行前理直氣壯咁講。

「依加係我架啦」 海晴一面沾沾自喜， 「罰你手多多亂掂野」

「sorry囉咁你真係好得意嘛」

「我梗係知啦」 佢將雙手放喺臉旁， 擺個側面整個可愛樣。





又真係幾可愛嘅…

「你唔起身我就坐落黎架啦！」

「唔好呀哈哈哈！！」

之後我都唔記得咗我哋傾計同玩咗幾耐， 終於我哋都開始有啲眼訓。 我就坐返低。

坐低之後其實並唔暖和， 唔大嘅房間仲隱約殘留住少少嘅冷氣。 海晴衣著比我單薄， 身上嘅外套早已經唔見咗。 我見到佢有時候橋埋雙手、 慢慢摩擦雙手黎取暖， 就除咗身上嘅外套比佢。

「你真係唔凍？ 你受咗傷架喎」

「一啲都唔凍， 我平時有做gym架你咪睇我咁樣。」 我fing一fing頭咁講。





海晴嘴角勾起一絲甜美嘅笑容， 就接過外套著住佢。

太好啦， 我好少有機會喺女仔面前做呢樣電影情節， 今次終於喺女仔面前型返次。 

不過除咗件褸我當堂感覺到房間內嘅冷氣…

種感覺越黎越強烈… 就好似不斷衝擊四肢一樣...

一剎那我覺得眼前一黑。

我呆咗一呆， 原本我以為至係自己嘅幻覺， 但我感覺多一陣， 身體真係唔多對路。

頭都有少少暈…

「你成個人震曬咁， 你有無事呀？」 海晴擔心咁問。





「無... 比我坐一陣得...」 我苦苦支撐住身軀， 希望不適感馬上離去。

但係身體就好似唔聽洗一樣， 手手腳腳都開始喺到震。

震到我都覺得根本唔係無事咁簡單...

「喂你塊面青曬口唇都白埋， 你過黎坐低先啦！」

傾計傾到一半， 我完全無印象海晴喺到講緊咩， 只係依稀記得佢拉坐我去梳化個邊。 行去梳化嘅路就好似行極都行唔遠一樣， 度日如年。 

因為我全身不停喺到震， 手腳都非常僵硬冰凍。

「我會唔會死？」我心裡想著。





驀然地， 我感覺一股溫暖從我嘅背脊傳黎， 猶如冬雪中遇見溫暖嘅太陽一樣。 

我用盡力氣抬頭一望， 原來係海晴比返件外套我披上。

結果我都係咁弱小... 連喺心愛嘅女仔面前表現都做唔到...

「喂你有無事呀？」 佢將手放喺我額頭上面， 左翻右翻咁， 海晴手掌涼涼哋， 好舒服。

「你好似發燒喎！」 海晴輕聲叫咗一聲， 而我亦都開始無力應佢。

「唔… 唔係掛… 我有少少頭痛姐… 你比我訓一陣就得」 我苦笑回應， 然後就閉眼訓低。

我用力按住頭部， 彷彿可以減輕痛楚一樣。

突然我感覺到一陣柔軟接觸我個頭， 我張開眼一望， 海晴將我個頭放上佢大脾到， 佢對我點一點頭， 「咁樣舒唔舒服啲？」

正當我想回答…

突然， 頭部傳黎一陣劇痛。

眼前事物， 突然一眨一眨咁。

喉嚨好似被勒住一樣， 抖唔到氣。 個肺好似著火好熱！ 眼淚水不停流出黎， 口入面感覺好酸， 頭好似四分唔裂一樣！ 手手腳腳慢慢傳黎冰冷嘅感覺， 身體意識如冰一般慢慢碎開。

我內心突然冒出一個驚人嘅想法...

我… 開始變喪屍！ 我… 我正係到變！

頭… 好痛…！！

我正想企起身， 但穩唔住腳步， 眼前黑一黑就跌咗落地。

雙眼好似火燒一樣， 感覺到血滲出黎， 甚至睇嘅野都有一點點紅。

朦朧中， 隱約聽到一個聲線。

「1-3324238@#*$&*!1483939^^*#@48@*#&@#@!#」

我張開雙眼， 勉強望到一個女仔個樣同我講緊野。

你講緊乜…

個女仔係海晴， 無錯… 但點解睇落… 好似佢變咗樣咁…

「唔… 唔好掂我…」

出盡力講完呢一句之後， 我嘅意識開始慢慢遠去…