《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 刺心的痛

被發現後我頓時面紅耳赤， 視線連忙從佢身上移開， 唔敢再直視佢。 原來佢早就知道我想咁問， 枉我仲賴醒咁兜黎兜去以為佢唔知…

「哈哈哈… 我係咪好醒呢」

「做咩姐你」 惱羞成怒下我忍唔住疾一疾佢。

「係啦最醒係你， 咁你有無男朋友姐？」

「唔… 唔話你知… 你問黎做乜啊？」





呃… 唔通話你知我想追你？ 佢係咪比緊暗示我？ 唉毒撚真係好難同人溝通， 到底我應該點答佢…

「無… 好奇姐…」

「咁有無男仔追你呀？」 我見佢唔答就退一步再問。

「你話呢？」 海晴嘅眼神再次閃過一絲狡黠，

「咁追你個男仔最後點呀？」  





 「邊個？ 我有好多個架啵。」 佢講呢句嘅時候， 雙眼圓圓咁轉黎轉去， 猶如一個可愛又百厭嘅小妹妹。

「Um…… 就係個個上堂成日坐你隔離個個！」 我都開始同佢係到亂吹水。

海晴驚訝咁講， 「你點知架？！」

我已經分唔清佢係玩緊定認真， 我拍拍心口， 「我一直都放咗個鏡頭係你到架， 你唔係唔知下話」

海晴作狀望下自己個身， 「係邊到！ 快啲講！」





我搖搖頭茸茸肩， 之後再望向海晴， 我哋都忍唔住爆笑。

「哈哈哈你好白痴呀」

「白痴你又笑傻妹！」 再提一提海晴係細過我一兩年架。

之後海晴話我知， 原來佢真係有個同學想追佢。 佢哋係喺做project個陣識嘅， 由於做project大家都要溝通， 佢哋就開咗個whatsap群組， 而一入到個group， 每個人嘅電話號碼都會顯示出黎， 連問人拎電話都唔洗。

海晴出色嘅樣貌理所當然令佢成為咗班入面嘅中心， 每一個男仔都想追到佢， 每一個人都想約佢出街。 而自從佢個同學拎咗海晴電話之後， 海晴嘅whatsap就多咗好多唔識嘅男仔message佢。

「佢哋話我哋喺o camp見過架喎， 不過我知道佢哋只係借一個機會想約我。」

海晴慢慢dup低頭， 「其實我好唔鍾意無啦啦比人周圍傳個電話號碼， 更加唔想成為大家嘅視線。」

大概係個男同學唔識諗， 一有人見到佢有海晴電話就叫佢happy share， 完全無無問海晴同諗過海晴嘅私隱， 結果令到海晴好唔開心。





起初海晴都覺得無咩大不了， 大家都係同學應下都無所謂啦， 但之後啲男仔成日send message過黎， 三日唔埋兩日就想約佢出街。

而有時啲人過咗幾分鍾後見海晴無回覆就會繼續搵佢， 周圍搵野吹水。

但係海晴話， 其實佢鍾意有自己嘅私人生活， 自己嘅圈子。 佢知道個幾個男仔係想追佢， 只不過係因為佢嘅外表， 又或者佢只係堆男仔漁翁撒網嘅其中一個目標。

難怪海晴會唔拍拖。 當你覺得周圍嘅人都唔可信既時候， 獨自一人可能更好。

佢想要既， 你可以話係童話式嘅愛情， 但佢就係需要一個唔係單單因為佢外表要鍾意佢嘅人， 而係因為了解佢而愛上佢。

我係唔係佢所講嘅人？

可惜既係， 我需要承認毒男太易對人動情， 只係因為能夠同海晴傾心事， 已經足以令我心動。





撇除海晴可愛嘅外貌後， 我對佢嘅了解仲剩返幾多？

我有資格講我鍾意佢嗎？ 我有原因去追佢嗎？

到底我係鍾意海晴， 定係自私咁只係想有一個女朋友？

可能， 錯嘅一直喺我。

但係， 連我咁蠢都覺得自己追女仔追得好明顯， 海晴無理由睇唔出掛？ 佢都無直接拒絕我… 係咪即係代表我有機？

或許， 我應該由朋友嘅身份， 慢慢去認識了解佢。









而後來， 海晴同好多女仔一樣， 喺大學二年級識咗個男朋友。

海晴覺得， 終於搵到一個男仔同其他人唔同， 肯用心去了解佢、 呵護佢、 愛佢。

只不過， 當新鮮感過後， 一切都返唔到最初。

海晴當佢係全世界， 但佢只係當海晴係世界一部份。

雙方價值觀唔同， 爭呦自然開始多， 慢慢地， 見面次數開始少。

感情， 開始淡。

「喂， 我今日收早呀， 你上唔上黎我屋企？」

「你唔聽我電話嘅， 你好忙呀？ 不如聽日一齊食lunch？」

每一個whatsapp， 換黎一個個藍tick。

海晴唔敢問， 只係希望佢會快啲打返比佢， 話佢知， 之前佢只係忙到無時間搵佢。

終於， 一晚返完part time， 海晴喺屋企樓下見到個男仔。

佢好開心， 佢以為， 係一個驚喜， 一切都將回到以前咁。

男仔聲線如往日一樣溫柔。

「分手啦。」  但係… 語氣好冷淡。

海晴個人好似突然失去靈魂般， 慢慢開始想喊。

「可… 可唔可以唔分手？」

個男仔答佢， 「我哋之間其實好多問題， 其實你都明白我哋係唔夾。」

「咁我哋咪一齊解決佢囉！」 淚水， 開始喺眼眶打轉。

「已經… 無可能。」

男孩嘅話如刀割破真相， 將一直以來暪住自己嘅海晴從幻想中拉回現實。

「唔好… 我可以改架……」 咽梗使海晴說不出話。

站在真相面前無常人的尊嚴

我妄想可補救其實極幼稚

男孩狠下心， 想轉身離開。 海晴快步追上去， 拉住佢嘅手臂。

曾經帶比佢溫暖嘅手臂。

「你留返少少尊嚴比自己， 好唔好？」

男孩閉上雙眼， 面上掛起一個憂傷嘅微笑。 雙手慢慢推開海晴。

閉上兩眼繼續迴避 彼此諸多顧忌

愧對自己勉強著你 也許鬆手釋放我

笑著結束可加速我心死

海晴呆呆望住佢離開， 眼淚不由自主流下來。

雙手掩住胸口。

明明早改變是我不知羞恥

還望勸服你是意氣一時

心口， 個種痛， 好辛苦。

海晴個晚喊咗好耐。

可能每一段感情都無可能完美， 都敵唔過分離。

「我以為佢只係一時意氣用事。」 海晴停一停頓， 話語中似乎在喘泣。

「但係我明白， 一切都已經唔同咗啦。」

才明白別去的人   無名字

「我嘅身份， 喺佢嘅情人。」 海晴望向我， 眼晴好憂傷， 「而佢， 始終都係佢。」

始終都係個個周圍flirt女仔嘅佢。

 「後尾都有好多男仔走黎同我講， 問我可唔可以做佢女朋友。」

 「亦有人同我講， 叫我唔好咁摺， 大學應該多啲上莊呀， 去o camp咁。」

「佢仲話有好多o camp嘅組媽可以比我做。」

海晴都一一拒絕。 但佢哋仲係唔會輕易放棄。

「咁係嘅， 大學係多狗公架啦。」 我笑笑咁講。

「咁你點答佢哋？」

「我話， 多謝你嘅好意呀， 但係我有男朋友架啦」

「咁你一定傷透曬佢哋嘅心啦...」

「唔講直接啲佢哋點會死心喎」

「不過你都無男朋友... 比人識穿咗點算呀？  一陣佢哋話點解未見過你拖個男仔咁你點答？」

「咁... 我又未試過喎... 佢哋一聽到我有男朋友就無再搵我啦」

「感情去到一個地步係唔係一定會淡」 佢企起身走向窗口， 用手撥開百葉廉， 望著屍寂無聲嘅街道一邊問。

海晴跟住都再無拍過拖， 而我都得到我嘅答案， 佢依加無男朋友。

即使依加無男朋友， 但海晴咁可愛又靚女， 遲早都會比人追到...

只係佢再唔想投入另一段新感情， 亦可能佢已經厭倦感情轉變太快嘅愛情。

分手個種痛一直深深記印喺佢腦海入面。

我唔敢再喺呢個話題上纏擾， 海晴行咗去書房另外一邊， 過咗一陣， 佢再開口。

不過， 如果唔係海晴講， 我都唔會估得到佢有一段咁嘅愛情往事， 而且竟然仲係男方提出分手…

睇黎佢係一個對愛情好認真嘅女仔， 而我第一眼望到佢仲以為佢係一個四圍收兵嘅港女， 此刻我為自己嘅想法感到抱歉。

佢慢慢按向自己胸口， 默默道， 「心中個種痛， 實在太深刻。」

「但係我正一步步開始忘記佢。」

佢打開雙手， 面向窗外射入嘅陽光。「不過點都好！ 講咗出黎我個人都舒暢曬啦！」

「我好少同人講架， 你要好好守祕密呀」 海晴回頭， 向我展現一個微笑。

夕陽透過窗廉， 一間一間般映上海晴身上，

佢面上， 正掛上一個淡淡悲傷的笑容。