《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 二人之間

權哥再問向警察， 「咁你帶路， 上面岩岩有槍聲， 我哋有人上咗去睇咩事， 你帶我哋上去。」

警察瞪大眼睛， 難以置信咁講， 「上去？ 無可能！ 最上面幾層嘅警察已經受咗感染！ 個個都變得瘋癲！」

呀豪呢個時候都開口， 「呀軒少佢應該唔跑得遠姐， 有事上黎佢成枝槍都無事啦。」

「係囉依加都無槍聲， 我哋去匯合咗佢先， 再睇下點行動。」 Coco姐有條理咁分析。

權哥望向警察， 警察沉默一會後， 唯有就範。





「咁好啦， 跟我行， 小心感染者。」 佢轉頭就帶我哋走向走廊另一邊。

海晴橋住我左手， 扶起我慢慢跟隨大隊。

我再次望真呢棟大樓， 辦公室入面有少許殘舊， 走廊比一般黎講細小狹窄， 光源昏暗， 只能靠外來陽光照明， 走廊只有一條， 不過好處係一目了然， 隔著防火門見到樓梯並無任何光源。  警察帶我哋行去升降機到， 升降機似乎仲用得， 佢按下升降機， 升降機好快就打開門， 內裡都無任何感染者喪屍， 但卻有一灘鮮紅血跡喺升降機角落。 我直覺覺得有問題， 但權哥一腳就踩入去， 警察都行入去。 我哋都只好跟佢哋行入去， 然後佢按咗二樓。

升降機門慢慢關上， 將我哋一行六人載到二樓， 隨著升降機門緩緩打開， 二樓都係比較昏暗， 地上有一條嘅暗紅色血跡路軌， 而血軌上印有數個凌亂腳印， 直直指向前方。 前方一片昏暗， 只能夠大約睇到係一間辦公室。
窗外透入一絲白光， 照射出由升降機大堂到走廊都係非常狹窄短小， 警察帶我哋經過大堂， 轉入行去辦公室嘅路， 路上有好多雜物同雜亂無章嘅枱， 一層只有幾窗，，地上同四周隱約有血跡， 而地上嘅腳印亦越明顯。 我先去無血跡嘅左邊睇下咩事， 兩邊玻璃窗都落左百業廉遮住， 左右兩邊各有兩間房。 只有一間房打開門， 其他房門都係半開合， 個邊道門輕掩， 地上的血跡延伸進去。

房入面不遠處有一張大台， 係一間平時經常見到嘅會議室。 沿住血跡望去， 一具男性屍體正敞喺地上！





一直跟住喺我後邊嘅海晴忍唔住叫咗一聲， 我略略察看這具男屍， 看似大概四十幾歲， 但身材健壯， 額頭正中有一個槍孔。 屍體身穿警服但並唔係交通警察個種， 臉色極度蒼白同佈滿青筋， 雙眼睜得非常大， 表情憤怒就如喪屍一般， 應該係變成喪屍後被槍殺。 我雖然唔係專家但屍體無發臭同尚算完整無缺， 大概係剛剛死去。

我視線越過佢頭部望下去， 頓時感到震驚， 男人右手手臂被齊臂斬斷， 傷口切口非常唔整齊， 露出少少嘅骨頭， 看似被某把刀一下斬開一樣， 而血液應該就喺黎自呢兩個傷口， 到底佢喺變咗喪屍先被人殺定點？

權哥舉步不行， 對著門外正被內裡情況嚇親嘅我哋提醒道， 「小心。」

警察暗自驚叫， 「係吳Sir！ 佢都變咗感染者！」

我估呢個警察可能喺受到喪屍襲擊， 雖然無被喪屍食咗仍然被感染， 最後變成喪屍後被人槍殺，  所以好有可能就係剛才嘅槍聲。





「呢到可能有喪屍， 小心啲！」

權哥直接走上去， 一手推開門， 房間裡頭係一間頗大嘅會議室， 陽光仍然被窗廉擋住無法照射入黎， 會議廳入面一張大枱， 但台上面乜都無非常乾淨， 地上鋪滿開會用文件， 而血跡只係到此為止， 埸景非常混亂， 而有一個人影喺入面行出黎。

軒少由呢間房間走出， 佢對住我哋搖搖頭， 「搵唔到， 比佢走甩左。」

佢視線放係權哥身邊， 問道「呢位係？」

警察望住佢枝槍， 一邊答， 「我叫陳晉， 係呢度嘅警察， 你哋係咩人， 點解會有槍？」

軒少突然笑咗兩聲， 無應到佢就同權哥講野， 「條友應該走得唔遠， 呢兩層我搵過都無咩特別， 我哋要搵嘅人應該係上面。」

權哥點點頭， 轉身同我哋講， 「你哋留係到先， 呢到應該無喪屍， 我同呀軒上去視察環境先。」





軒少轉頭望向陳晉， 「你跟埋黎。」

陳晉見軒少有槍， 只能跟權哥同軒少繼續上樓搜索開槍嘅人。

 

海晴拉咗張櫈過黎， 「你坐低先啦！ 睇下你個傷口點先。」

我都唔客氣就坐喺櫈上面， 我周圍望下睇下呢層係咩環境。

「呢層有茶水間呀喂， 我去拎啲野返黎比你哋食， 你睇住佢先。」 Coco姐見走廊另一邊有個好似茶水間嘅地方， 拉埋呀豪就行去。

呀豪拎住一把刀， 企喺Coco姐前， 即使有任何危險都可以保護佢， 能夠將自己性命放喺女朋友前， 呀豪一定有著心理準備， 無論如何都唔可以比Coco姐有事， 因為佢好愛女朋友。 呀豪去到茶水間， 一腳踢開門， 然後隨時戒備住以免有喪屍跳出黎。

但如同預想一樣， 呢層並無任何一個感染者， 佢哋好快就入咗去。





等咗一陣， 佢哋都未出返黎， 對等待疲倦之下我企起身想去睇下。

「喂你去邊呀？ 坐低休息下先啦你！」 海晴一見我企身， 馬上叫返我坐低。

「我想行下， 坐低好隻腳好痺呀。」 我隨意講一個借口， 海晴就馬上扶我過去。

我望住走廊另一邊細小嘅茶水間， 茶水間睇落只可以塞到兩個人。 入面尚算整齊， 基本嘅雪櫃熱水壺微波爐一應俱全， 用於煮食即食快餐嘅設備頗為齊全。

門內， 呀豪同Coco正係到搬水上去飲水機到， 兩人合力慢慢抬上去。

「你坐低抖下啦， 我一陣拎杯水比你飲！」 Coco姐抬頭見我哋入咗黎， 馬上同我哋講。

「無我見你哋咁耐都唔出黎， 睇下你哋做咩姐， 呢度有咩食？」





「櫃入面有幾個杯面嘅， 微波爐好似仲有電。」 呀豪一邊搬水， 一邊應我。

「一陣我哋整好野食拎出黎比你哋啦， 你隻手咁傷唔好周圍行啦你」

「係囉咪周圍行啦你。」 海晴望我一眼不滿咁講。「咁我哋返出去先。」

「行啦。」 我同身邊嘅海晴講道， 佢應咗一聲就再扶我返去。

海晴扶我坐返喺一張櫈上面， 而佢就坐喺我隔離， 打開急救箱， 準備幫我包紮。 佢拎出消毒藥水同埋紗布， 就望住我。

「拎隻手黎啦！」

「唔… 唔該…」 被海晴突如其來嘅關心嚇親， 我呆咗一呆。 以往好少有女仔幫我包紮傷口， 一黎我無幾可會受到咁重嘅傷， 二黎亦都無女仔會對我如此上心。

「呼…」 海晴倒咗消毒藥水去紗布， 然後左手接過我嘅右手， 就開始幫我清洗傷口。 我深吸一口大氣， 消毒藥水帶黎另一種刺痛， 個種感覺又軟又酸， 令我恨不得切咗斷指。 斷指嘅痛令我回想被喪屍咬嘅個一剎， 若果我能夠觀察周圍多啲， 如果我反應能夠快啲， 假若我好似軒少權哥佢哋咁好打， 如果我有一技之長， 可能我就唔洗受咁多傷， 亦會比依加情況更好。





「好痛呀你？」 海晴邊擦拭我斷指， 邊抬頭問我， 額前嘅留陰隨佢而上揚， 令我再次留意海晴嘅容貌。 無論望幾多次， 佢都係我呢世人識嘅女仔最令我心動嘅一個。

「少少…」 我回答佢。 「唔該曬你幫我洗傷口。」

「唔使唔該。」 海晴收回目光， 雙手放低染血嘅紗布， 從急救箱拎出新嘅紗布同醫療用膠紙， 同埋一包油性紗布。

「喀嚓─」 佢拉開紗布嘅包裝， 手指拉出淺黃色紗布， 紗布充滿油性， 一格一格好似格仔餅一樣。

「你… 仲有無嬲我？」 我望向樓梯方向， 鼓起勇氣去問海晴， 卻不想去面對佢嘅目光。

百業廉滲透一絲陽光， 照入昏暗嘅辦公室， 映上海晴臉龐。

我隨意將褲袋嘅電話同刀放喺身上嘅桌上， 好讓自己坐得更舒服， 右手被海晴蓋上一層格仔紗布， 然後再拎起白色嘅紗布。

我凝視地板， 海晴嘅剪影就喺地上。 佢每一下包紮， 每一下動作都影在地上。 我並無望向海晴， 佢亦無回答我， 我就這樣望著佢嘅影子， 默默聆聽紗布磨擦聲。

拖著疲倦嘅身軀坐喺呢到，我已經好累好累， 抹去額上嘅冷汗。 久未遇見嘅寧靜慢慢將我雙眼蓋上。 耳邊響起膠紙嘅拉貼聲音。 我閉上沉重嘅眼皮， 讓感受到陣陣刺痛嘅雙眼休息一下。 我左手托住頭， 輕輕呼了一口氣， 搖一搖頭， 全身傳來陣陣酸痛， 今日的確係運動過頭。

良久後， 海晴輕拍我傷口， 邊輕聲細語。

「我原諒你。」

因為太在意海晴嘅呢一刻嘅表情， 令我遲咗比反應佢。

海晴低住頭，目光偶爾抬起， 接著合上雙眼。 海晴嘅話同我認識嘅其他女仔並唔同， 佢嘅話永遠唔會將情緒流於表面。 佢嘅眼神， 彷彿睇穿你背後嘅故事一樣。

「多謝你。」

「多謝你救我。」

同一刻， 我哋一齊向對方道謝。 我諗， 我哋之間嘅芥蒂應該消失咗。

海晴臉上浮起一絲微笑。

「你隻腳點樣呀？」 海晴望向我隻左腳， 柔柔問道。

「唔知… 我諗應該撞到腫咗， 同埋擦傷曬。」 我左腳小腿到腫起咗， 同時瘀青色一舊， 不時隱隱作痛。 腫起部份都有一條2至3厘米嘅傷口， 喺被個棚竹界傷。

「究竟係咩人推堆竹落黎？ 佢根本就係想整死我哋！」 回想起天台上面嘅人影， 我就不由得怒火中燒。 到底條友痴咗邊條線， 推堆竹落黎？ 佢想殺人呀？

「唔知呀。」 海晴倒一倒消毒藥水， 「會唔會係喪屍咁岩撞跌堆竹喳？」

我左諗右諗， 都覺得無可能。

「搞掂啦！ 幫你消咗毒， 之後睇醫生啦！」 講完呢句， 海晴突然合起手， 一臉成功感。 「啲竹跌落黎個一下， 你奮不顧身咁保護我， 我真係好感動。」

「雖然你之前做嘅野係令我好嬲， 你竟然拋低同伴就走咗去， 留低佢哋自己對抗隻狗。」 海晴深吸一口氣， 「但我諗咗好耐， 我知道我無資格咁樣罵你。 救咗我幾次嘅人係你， 如果我喺你嘅處境， 可能我已經死咗啦。」

海晴突然認真望向我雙眼， 「對唔住！」

我完全估唔到海晴突然會咁認真講一大堆野， 之前嘅佢都係cool cool地， 唔通佢開始當咗我係friend啦？ 不過依家嘅佢先有少女應有嘅青春活力。

正當我想回應佢嘅時候， 海晴打斷我， 指一指向我身後，

「喂， 佢哋返黎啦。」

我望過去， Coco同呀豪行緊過黎， 手上拎住幾個杯麵過黎我哋身邊。