《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 暗湧
「只係搵到杯麵同幾杯水， 食少少野先啦。」 佢哋搵張櫈坐喺我哋身邊， 四條友圍埋就開始食麵。
「一陣我想搜索下呢兩層睇下有咩岩用嘅野。」呀豪停頓一下， 等大家視線集中佢身上後， 再接住講， 「我覺得我哋有必要係到實地考察下呢到嘅環境先， 因為警署入面應該會有武器、 電話， 如果可以聯絡到人黎救我哋， 我哋就唔需要冒險自己走啦係咪？」
Coco接住講， 「無錯， 我哋岩岩商量咗， 其實對我哋黎講， 除咗擔心被喪屍咬到之外， 佢哋都唔存在其他嘅危險。」
我忍唔住冷笑一聲， 喪屍無其他危險性？ 佢哋係咪傻咗呀？ 我哋已經有無數次差少少死喺喪屍口下啦！ 聽到我笑一聲後， 呀豪隨即啤住我。
為勉尷尬， 我馬上開口， 「我覺得呢我哋幾個去實在太危險啦， 喪屍佢哋總係成群結隊咁， 就算係人我哋都未必打得嬴咁多個啦， 何況係唔怕死唔怕痛嘅喪屍？」
「係囉， 其實呢到飲用水同食物都夠， 我哋可以唔冒呢個險架。」 海晴補充。
呀豪一身嘅裝束已經亂曬， 但血跡並唔多。 之前睇落高大肥肥哋嘅佢已經殘咗好多， 搵手撥一撥佢嘅比比鳥頭， 之後哄埋黎低聲同我哋講。
「你哋點睇權哥同軒少佢兩個？ 你哋唔覺得佢哋有問題咩？」
「咩問題？ 權哥佢係少講野姐…」
呀豪打斷我說話， 「先唔講權哥， 個個咩軒少成把機關槍喺手！ 正常人點會有把槍呀！ 一睇就知佢哋係黑社會啦！ 個呀權同佢又係識既， 好可能都係同一個黑社會， 我覺得我哋離佢哋遠啲好啲！」
聽到呀豪咁講， 我內心有啲唔好受， 但佢嘅話的確有道理， 我明白佢覺得黑社會有問題係正常嘅。 所以我好好諗下點應佢， 希望唔好搞到氣氛咁彊。「但係權哥同軒少救咗我哋咁多次， 點睇都無想害我哋嘅意思嘅。」
海晴都附和我， 「係囉， 岩岩唔係軒少開槍， 我哋兩個被隻狗咬死啦， 我都覺得佢哋無野嘅。」
呀豪望向Coco， Coco姐茸一茸肩， 無回應佢， 可能連女朋友都唔同意佢， 只有呀豪咁覺得啦。
呀豪無放棄， 繼續講， 「你睇個呀權兩下就砌低咗個警察， 好明顯唔係咩善男信女， 可能跟埋佢哋上去個警察依加死埋啦。 我覺得我哋應該依加去搜索下呢兩層， 搵搵有無武器同聯絡警察嘅方法黎救我哋。」
海晴顯得有啲不滿， 「權哥佢哋已經上咗去啦， 我哋等埋佢哋返黎先行動會唔會好啲？」
呀豪聽完有少少怒意， 正常大聲罵海晴時， Coco姐拉一拉佢， 「食埋野休息下先啦， 等埋大家一齊行動安全啲呀。 依家周街喪屍， 無論之前大家咩背景都唔重要啦， 係咪？」 呀豪聽完收一收火， 果然錫女朋友嘅佢被Coco姐食住。
「係呢個陣喺商埸你哋去咗邊？ 我哋以為你哋被喪屍咬死咗啦…」 Coco轉身問我哋。
海晴將我哋嘅經歷一五一十講出黎， 有時我會做少少補充。 聽到商埸走難個到， 我提起有陣火警鐘聲救咗我哋。 Coco姐忍唔住講， 「哈哈！ 個陣係我哋走緊， 我哋走咗去另一邊防火門個到， 一推開道門個鐘就響， 我哋就喺後樓梯走咗。」
「本來我哋都想救你哋… 但係情況太亂啦…」 Coco姐低頭道。
「唔緊要啦我哋明架。」 海晴拍拍佢膊頭， 之後繼續講我哋嘅經歷。
佢哋一邊講， 我一邊扭動一下個身， 條頸同腰都發出爽快嘅咔啦咔拉關節聲， 但我整個人都係有少少頭暈暈咁， 我哋四人坐嘅位置就喺窗隔離。 我企起身去望下外面嘅情境。 外面傳黎一陣聲響， 我輕輕拉開少少窗簾， 望向下方。
喺陽光嘅照射下， 大概有二三十隻喪屍包圍警署同埋門口成條街， 有啲仍然喺鐵閘門口， 有部份走黎走去遊蕩， 亦有喺啲唔郁企係到。
照情況睇黎我哋需要有周詳嘅計劃先可以安全離開， 依家只有希望到我哋走個陣啲喪屍會少大半啦…
接著， 海晴繼續將我哋喺宿舍， 遇到其他人嘅事講比佢哋知， 講到薩利亞個度， 海晴只係輕輕帶過， 就話我哋被迫同madam佢哋分開。
「聽你哋咁講… 佢哋可能都已經…」 Coco望向地下， 之後一言不發。
「無事嘅， madam咁好槍法， 應該走得到嘅， 佢哋應該好快就會黎同我哋集合。」 我打破彊局， 同時心中都希望madam快啲黎回合我哋。
之後， 海晴再將我哋嘅經歷講出黎， 講到陷阱同有人暗算我哋， 直到遇到軒少我哋逃過大難。 聽見有陷阱同有人想殺我哋， 連呀豪都忍唔住追問我哋，
「你意思係出面仲有人未死未走， 而係到放陷阱想整死你哋？ 之後仲喺天台推堆竹落黎想壓死你哋？」 我同海晴馬上點點頭， 即使聽落如此天方夜譚， 但事實的確係有人咁做， 而我相信喪屍係唔會有咁嘅智慧。
我再接住講， 「我唔係好肯定係人， 不過只有人先會做得出。 加上係市政大樓個到， 我都見到有人喺個到行黎行去。」
「唔… 我哋唔喺現埸都唔知… 不如一陣問吓佢哋睇下會唔會知啲咩咁啦。」 Coco姐搖搖頭咁講。
「係囉佢哋上咗去都成半粒鐘， 到底搞緊咩呀， 不如上去望一望？」 我提議道。
「好， 我贊成周圍打探下呢到嘅環境， 坐喺到都唔係辦法。」 出奇地呀豪贊同我嘅提議， 「等你哋準備好我哋就行。」 呀豪見海晴仲食緊麵， 就提議等一等。