港大七不思議食女事件: 43. 險局

43. 險局
 
老母曾經同我講過，要捉老鼠，必先喺老鼠籠前，置麵包為餌，一塊兩塊三塊。老鼠嚐過甜頭，戒心盡去，終必上釣，被老母以滾水活活淥死。
                                                         
阿予老母獻上多汁鮑魚，似笑非笑咁勸我添飯。喺屋企食慣粗茶淡飯嘅我，縱恐其中有詐，但方今人為刀俎，我為魚肉，作客城市花園，困於美色酒食，唯有見步行步，食咗先講。
 
正當我啜住鮑魚，幻想阿予老母喺飯菜中落春藥，叫我一夜淫母女，徹晚硬如槍，阿予老母將隻雞脾，一嘢轟埋嚟我個碗到，笑瞇瞇咁講：「嗱，一陣食完飯，坐吓，再同阿女入去玩電腦，唔好咁快走呀。」我唯唯諾諾，將雞脾勉強放喺如山般高嘅白飯之上，免得佢掉落嚟。
 
阿予年紀尚小，又係美人胚子，理應追求者眾，因此我完全唔明白，點解佢老母要美國莊園主上身，將個女好似黑奴一樣，賣畀我呢個住華富邨嘅西部牛仔。
 




我同阿予雖曖昧過，但已事過境遷，更談不上情愫。阿予老母彷彿視我如乘龍快婿，對我極度恭敬。出身寒門，我從來都未上過女友屋企見家長；喺竹門對竹門嘅中國社會，我唔寄望會有伯母雞脾食，可以同阿囡入房玩電腦。我咬住雞脾，心存三分感激，七分邪念，不如娶咗阿予一了百了，等佢老母兩腳一伸，北角城市花園大宅便歸我所有，走一條脂粉鋪出嚟嘅捷徑。
 
咁牧子點算？諗起家庭同前路，諗起楊太送畀我嘅Burberry乾濕褸，諗起不勞而獲嘅引誘，我忽爾郎心如鐵，拋棄糟糠嘅念頭喺心中掠過一瞬。
 
「食飽喇？你地入房慢慢玩吓電腦。我而家落去跑步先。」一個轉身，阿予老母非常識做，已經換好晒衫，一副跑渣打馬拉松咁嘅樣，準備避席，落街跑步。
 
孤男寡女共處一室，阿予嘅小眼睛洋溢住幸福，一顰一笑，又有同佢年紀唔相稱嘅妖媚。
 
「咁……我地入房補習啦。」我將袋中嘅Ielts筆記拎出嚟，將淫心收起，帶住阿予就入房。
 




我一坐低，遊目四顧，見到房入面，有幅重慶森林電影海報，仲擺滿阿予同埋一個年輕男人嘅合照。該男子年紀比我大，約莫三十上下，若非佢提早發福，胖如董卓，論五官輪廓，倒算得上眉清目秀。相片入面嘅阿予，同而家相比，更見身裁飽滿，同相中男子如膠似漆。
 
阿予見我不斷打量四周，一咬牙，竟然叙述起佢嘅過去：「呢個咪係我成日同你提起嗰個施立毅囉，之前我喺同學聚會唱K識佢，係我好朋友介紹嚟識，城大畢業，我朋友話佢好好仔架。」
 
 
有一點，我感到極不自然，但飯氣攻心，腦筋遲頓，就畀阿予繼續講落去：「我諗我呢一世都唔會再咁樣鍾意一個人。只要見到佢，畀佢食我煮嘅公仔面，我就好開心。我從來都冇要求佢對我做啲咩嘢，我淨係要佢陪我，一心一意鍾意我就夠。我好想忘記呢個人，我真係好辛苦。」
 
我見佢講得傷心，忍唔住搭住佢膊頭安慰吓佢：「咁不如丟晒啲相佢啦，篤眼篤鼻。」
 
「呢張相，係阿毅同我一齊去山頂睇日出嘅。感情既然都冇咗，我地兩個人之間淨低嘅嘢，都變得無關痛癢啦。掉唔掉，又有咩關係呢？




 
「早幾日我先喺街撞到佢，又要扮冇事，又要扮鎮定，你知唔知呀，其實我內心震晒架喇。」講完，阿予就順勢挨咗落我心口。
 
「佢條新女呀，你知唔知呀，好撚醜樣呀！好溝唔溝，溝著個豬西糯米雞呀！」阿予越講越激動，平時佢雖然唔算斯文，但未至於當住我面講粗口。睇嚟佢應該真係好憎呢個女人。
 
「佢溝我嗰陣，當我如珠如寶，有咩一定即刻應機。一齊耐咗，佢就成日人間蒸發，連最後上線時間都收埋。佢喺蘭桂芳拖住第二條女，畀我撞到正一正呀！」阿予講到激動處，將我精心準備嘅ielts筆記，一嘢轟落床角嘅Hello Kitty公仔到。
 
「喂，你上次唔係話踢爆咗佢上網溝女咩？」我一時驚醒，指出當中矛盾。
 
「我唔理呀！總知佢呃我呀！呃我呀！呃鳩我呀！ 」一講起呢個姓施嘅，阿予就扯火，同我當初喺冰室識佢，成部電話畀咗我嘅嬌媚女侍者，判若兩人。
 
「Marvin，我覺得你真係好有才華，又唔會乘人之危。不如……你同我一齊吖？我知你都係鍾意我架。」語罷，阿予就好似當年Elaine一樣，騎咗上我大脾，成為咗我玄鐵重劍上嘅一塊生魚肉。
 
我同阿予喺冰室相知嘅片段，同埋早幾日白鴿巢嘅故事，於腦海一閃而過。阿予兩手環抱我頸項，我望住佢起伏嘅心口，嬌美嘅臉孔，雙手不知不覺摸住佢纖腰肢。窗外海景之下，天星小輪緩緩往對岸駛去，冷雨之中，與城市花園大宅之中嘅鴻門夜宴，形成強烈對比。