港大七不思議食女事件: 41. 萬惡
41. 萬惡
身為食女無數嘅浪子，自從玄鐵重劍初出鞘始，我從來唔駛去為女人做啲咩嘢，討佢地歡喜。今時今日，男人自貶身價，為「女神」俯首當兵，我更深痛惡絕。唯一嘅例外，大概喺大學二年級嗰年，韓妹允雅要返泡菜國，我一時動情，親手為佢做咗個相架，一次咁多，絕無下次。
舊愛蜜色女曾經批評過我嘅懶惰，話我從來唔為佢付出。其實，我只問唔係懶惰嘅人，否則都不能以極度規律嘅生活，鍛鍊成六舊腹肌。平時，我好憎人批評我懶惰，干涉我嘅生活：當三姑六婆將做緊ibank、AO嘅仔捧出嚟，再指桑罵槐，將我不明嘅前路，歸咎於我嘅飽食終日，無所用心，我都會黑面，然後暗暗講句「你識條春咩！」榕樹樹影斑駁，我拖住牧子，回憶蜜色女嘅責難，我可以挺起胸膛咁講，我唔係懶，只不過係愛佢唔夠深。
我兜咗咁大個圈，從油麻地帶咗牧子去白鴿巢，從二零十三年帶咗佢返一九六六年，從淪為匪區嘅香港，帶佢返去西洋鬼話事嘅澳門，將上代人嘅羈絆，帶畀牧子，氹到佢好似剛出世嘅鴨仔，勉力張開眼，只見到我呢隻偶爾降落地嘅雀仔，就跟實我唔走。牧子的確係好女仔，令我不由得低飛，為佢做咁多事，簡直不可思議，六四冇死人，袁木最誠實，Marvin好專一。
牧子挽住我手，將德仔同大眼妹嘅逃亡路線，好似行孫中山事蹟徑一樣，行咗一次。
我地行到去手信街斜路，忽見一極熟悉嘅女仔，向我走過嚟。
「Hey! 阿仔, how are you?」來者一雙鳳眼，熱褲拖鞋，A&F女神頭，露出半條幼腰，不是別人，正是我大學第一個女友組媽Carol。佢嘅A&F香水味，令我彷如置身中環畢打街，使組媽Carol同蜜色女嘅淫亂畫面，又湧上心頭。
Carol冇見一排，風騷依然，一見到我，立時推開身邊男伴，張開雙手，C Cup突出，一嘢就想攬埋嚟，渾然忘記我嘅寡情薄倖。受西化教育嘅我，他鄉遇故知，正欲張Carol一抱入懷，只見Carol忽然退後半步，彷彿見到洪水猛獸，講咗聲「Oh, Marvin, we will talk later!」之後，與其男伴落荒而逃，忙忙似喪家之犬，急急如漏網之魚。
我回頭，只見牧子嘅眼神，比寒冰掌還要冷，眼神透射出寒冰真氣，又推甩兩件。
「條女邊個嚟架？講英文嘅？做咩唔講廣東話？」牧子三個問題，連珠爆發，妒意熾熱，好比剛出爐嘅牛肉乾。
「我入大學嘅組媽，之前同佢拍過拖。」
「講晒英文咁，一定係有錢女啦。」
「係呀，佢中學讀DGS，住禮頓山，畢咗業都唔駛做，佢條仔好似仲送咗部GTR畀佢做生日禮物，聽講佢下年諗住去英國讀Master……」我一路講，一路將組媽Carol放上網嘅身家如數家珍，向牧子說明離開Marvin嘅下場，比離開阿仙奴，更加幸福美滿。
「佢識投胎啫，有咩咁叻。如果我出身有佢咁好，一定叻過佢。」牧子堅定嘅眼神，無比倔強。
我一來唔想牧子再問我同組媽Carol嘅過去，二來不欲佢想起謀稻粱覓恩客嘅回憶，我隨手拎起身邊嘅試食牛肉乾，咬喺口裡，一嘢塞落去牧子個口，再咬咗佢蘋果肌一啖，弄得牧子滿臉油，夕陽之下，牧子嬌嗔：「你整到我成臉都係油，會搞到我生暗瘡架！」，卻越挨越埋，將頭埋藏咗我嘅胸肌裡。
當晚，我同牧子搵咗間酒店過夜。澳門酒店房咁貴，唔少得嘅當然係啪啪啪，溫馨甜蜜，不在話下。呢個劫後餘生嘅澳門之旅，雖然只有兩日一夜，但時序橫跨幾十年，盛載住兩父子嘅回憶，幸運嘅係牧子，不幸嘅係大眼妹。如果可以選擇，我會係呢到完咗個故事佢，將記憶結冰，令我同牧子永遠幸福快樂咁生活去。
但世事豈能盡如人意，鍵盤裡嘅陳納邦越立體，現實世界裡嘅我，面對超載嘅回憶，人事嘅羈絆，人就越脆弱，情感比玻璃易碎，但我必須將呢個故事講落去，因為，呢個係《港大七不思議食女事件》，故事嘅開頭，我已經開宗明義講咗：「大學讀三年，女食咗七件」，聰明的你，數數手指，必知後事如何，我亦不欲立時拆穿。
旅行就像呢個世界所有嘅關係，總有終結嘅一日。悲世界如此狹小又逃回。一返到香港，面對畢業嘅困局，痴線嘅細佬，家族嘅擔子放喺我肩上。拍拖甜蜜事，話絮休題。萬惡金錢，殘酷現實，令到我地破鏡重圓嘅關係，又再激起千尺浪。
「其實，你可唔可以唔好同你契哥一齊住？」常言道，「認真你就輸了」，我對牧子可能動咗真心，有一日，心頭火起，竟然叫佢唔好住喺契哥到。
身為浪子同受西化教育，當年對到女朋友為兩餐做援交一笑置之，今時今日，竟然接受唔到佢同契哥共處一室，我越嚟越拖泥帶水，完全唔似一個浪子。
「唔住呢到，可以住邊呀？唔通返屋企對住老豆，畀佢打咩？」牧子極有道理，我一時都唔夠講。
「你同我一齊，打多兩份工，我地搵間劏房住。」覆水難收，呢句說話，好似小石投入湖中，激起水花，竟然比人還要高。
我從來都以為自己踢緊波，係華富邨莫耶斯，換出嘅球員唔可以再換入；但畢竟呢個係美麗誤會，原來我一路都打緊籃球，換走嘅囡囡，會因為現實巨輪，喺場邊伺機換入，將離奇建築於荒謬之上。