港大七不思議食女事件: 40. 父親
40. 父親
「Mu…ah！」
「乖喇。大眼妹高聳嘅胸脯，隨住佢扔石嘅韻律跌蕩，令德仔完全停晒手，如入迷霧。忽然間，一聲槍響，打碎咗德仔嘅春夢。德仔擰轉頭，見佢身前高佬，咽喉中槍，一陣痙攣，就拎住本毛語錄去見馬克思。
「天真嘅德仔，一直以為葡兵最多都係衰咸濕，摸吓閏女屎忽，唔會泯滅人性，射殺平民。點知，當年嘅葡兵，大多數喺非洲打完仗，殺人多過德仔打飛機。德仔瞇起近視眼，見唔到有人，淨係見到一枝枝西洋槍管。」
「葡國佬做咩學埋共產黨啲嘢？」
「究竟係葡國佬學共產黨，定係調番轉，我真係唔明白。德仔企喺到，拎住本毛語錄，兩隻腳好似打咗樁咁，一時郁唔到。第二聲槍響，德仔褲檔一濕，彷似被蚊咬咗一啖，然後手心一熱，轉眼一望，原來係身邊嘅大眼妹。大眼妹掉低本毛語錄，拖住自己隻手，好似『阿甘正傳』入面嘅湯漢斯咁，轉身就跑。」
「Run Forrest？浪漫得嚟，又幾搞笑吖，你唔好同我講，德仔跑跑吓入咗大學隊，跟住去打越戰呀？」
「睇故唔好駁故，聽我講埋先。大眼妹拖住德仔係咁跑，當時槍林彈雨，水炮步槍裝甲車，好似打仗咁。佢地兩個一直跑，跑到去板樟堂嘅某鋪頭門口，同中國人老闆講：『西洋鬼開槍殺人呀，可唔可以入嚟避一陣呀？』
「點知，個老闆驚驚青青，大聲咁講：『收咗鋪喇！唔招呼呀！』，德仔同個女仔又跪又求，個老闆先肯開閘，畀佢地坐喺樓梯避風頭。
「咁衰嘅個老闆？大家都係中國人，包容吓啦。」
「老闆雖然流中國人嘅血，但係受葡式教育，主張個人主義，思想前衛，你同佢講包容，你識條春咩。」
「之後又點呀？」
「德仔當年十七歲，第一次見到死人，提早體會到鏡花水月，人間五十年，不過滄海一粟。德仔坐喺樓梯默哀，好想喊，但係唔知點解，眼淚掛喺眼尾，久不掉落。忽然間，大眼妹話：『你……可唔可以放開手？』，原來，德仔全程都同大眼妹十指緊扣；到底德仔有心定係無意，要返去一九六六年先知。」
「大眼妹隻眼大啲，定係我隻眼大啲？」
「幾十年喇，大眼妹都變阿婆啦。德仔放開手之後，突然聽到大眼妹格格嬌笑：『你嚇到瀨尿呀？』德仔一望，見到佢條黑色布褲褲管，濕咗一大片。起初，德仔覺得好奇怪，明明自己仲係好急尿，心念一轉，今次仆街喇，摸吓右邊大脾，驚覺自己少咗忽肉。
「大眼妹好驚，即刻搵老闆求救。老闆一知道咗德仔流血，就話：『好走喇，唔好死喺我呢到呀！整污糟晒啲地方！去鏡湖去山頂啦！』。」
「咩係鏡湖同山頂？個老闆真係好仆街呀！」
「即係澳門嘅兩間醫院。大眼妹一咬牙，冇求過個老闆，望一望出面，喺冇咁多警察嘅時候，拖住德仔，拐吓撞吓，經大三巴牌坊賣手信嗰條街，諗住去鏡湖。豈知，緊張嘅時刻又嚟喇！」
「講你就講啦，唔好講吓停吓好嘛？」
「佢地兩個經過大三巴腳嘅時候，有成班葡兵操緊落嚟！原來當時大炮台係葡兵營，一知噴水池出事，立時增兵平亂。德仔同大眼妹喺被葡兵發覺之前，即刻兜路行，經過個教堂，就去到鏡湖。鏡湖嗰日好似旺角咁多人呀！」
「如果我係佢，我都會陪你一齊走……」
「送到德仔去鏡湖之後，大眼妹話：『我要返屋企喇，我阿媽一定好擔心我。』跟手，德仔喺大眼妹耳邊，低聲講咗自己個名。
「德仔捉住大眼妹隻手，就問：『我地會唔會再見？』
「大眼妹話：『我屋企好嚴架，我係偷走出嚟，唔得喇，好夜喇，我真係要走喇。有緣嘅話，下星期日，單眼佬前面見啦。』未趕及問咩係『單眼佬』，大眼妹就好似殖民地美好歲月一樣，消失得無影無蹤。」
「講你就講，唔好加咁多修辭好唔好……」
「呢排寫開小說，職業病。起初頭十幾年，德仔仲記得呢個女仔嘅樣。但係日子一耐，德仔淨係記得，一九六六年十二月三號，下午五點鐘，有一個大眼妹拖住佢，由噴水池跑到去鏡湖醫院，救咗佢一命。可惜嘅係，不論德仔幾努力去回憶，永恆嘅始終係時間，德仔記唔到呢個女仔嘅樣。喂，做咩打人？」
「你咁樣同劇透我有咩分別？劇透死全家呀。仲有，我啱啱先講過，如果呢個故事係悲劇結尾，你唔駛再同我講埋落去咩？」
「點解你一定要Happy ending？我真係望唔透……好啦，唔理你，我繼續講。
「好彩，步槍子彈剛好擦過德仔胯下。德仔只受皮外之傷，如果佢有七寸巨龍，你嘅命運將會改寫。」
「唔通……？」
「係呀，繼續估啦。德仔出院之後，諗咗好耐單眼佬究竟係咩嘢，佢望住受傷嘅大脾內側，玩弄佢嘅傷口，一時諗唔透。的確，就算喺有得上網嘅今時今日，你喺Google打『獨眼』，出到嚟個答案竟然係『夏侯惇』同埋『伊達政宗』，試問，只得十七歲嘅德仔，讀書唔多，入世未深，又點知單眼佬係邊個呢？」
「日本戰國同三國人物？即係想點呀？」
「翌日，德仔終於忍唔住，向德仔老豆請教：『喂，老豆，知唔知邊個係單眼佬？』，德仔老豆『屌』咗一聲，大聲轟落去：『咁你都唔知，點做澳門人呀？你拎你銀包啲銀紙出嚟，就有答案喇！』」
「德仔一面狐疑，拎起銀包，喺張十蚊紙入面，見到傳說中嘅單眼佬。德仔老豆一路食住橙，一路就話：『單眼佬，咪葡國鬼李白，賈……賈咩呢？呀！叫賈梅士呀，寫詩好叻架嘛！白鴿巢仲有個賈梅士像呀！』德仔聽完，開心到攬住咗德仔老豆，呢次亦都係佢地兩父子唯一一次擁抱。」
「星期日，德仔下午十二點就著住單吊西，喺賈梅士像下面等。佢等咗一個下晝，點知大眼妹都係冇嚟。」
「做咩德仔咁蠢，唔問大眼妹拎電話？」
「你估係而家咩？以前澳門申請部電話好貴架。第二個星期日，大眼妹都係冇嚟。第三個星期日，德仔照樣去等，終於等到大眼妹。」
「大眼妹一見到德仔，就好高興咁話：『唔好意思呀，我阿媽知道我嗰日暴動出咗去，關咗我喺屋企好耐。我讀聖羅撒架，你呢？』德仔心裡說不出嘅高興，就話：『我冇讀書好耐喇，不如我地去永樂睇戲，去劉德記食個辣魚包吖？』」
「之後，德仔就帶咗大眼妹去睇戲，食咗個佢一世都記得嘅辣魚包。
「德仔同大眼妹拍咗半年拖，至於有冇啪啪啪，我就真係唔知道。好可惜嘅係，大眼妹好快就要去美國讀書，而德仔亦都要過香港搵食，佢地咁樣，就分開咗。
「起初，大眼妹仲有密密寫信畀德仔，點知時間一耐，大眼妹寄嘅信，字數越嚟越少，次數越嚟越疏。德仔同大眼妹，隔咗個越戰同文革嘅太平洋。佢地嘅距離，就好似尼克遜同埋毛澤東咁遠，一次乒乓外交嘅邂逅，啪啪啪啪，就無疾而終。」
「冇嗱？唉，好慘。點解你知道澳門咁多嘢？邊個係德仔？」
「德仔，就係我老豆，大眼妹應該唔係我阿媽。」
「吓？你又知嘅？佢同你講架？咁樣啱啱喺油麻地嘅『大約在冬季』呢？」
「一年班開學日，我阿媽同我老豆鬧交，話要扔晒個賤女人啲信同埋老豆啲日記。呢次係我第一次見雙親鬧交，我永遠都記得。」
「嗰陣我一年級，冬季來嘅男生特別聰明，我趁住我老母鬧我老豆，早慧咁偷偷睇晒大眼妹啲信同埋老豆啲日記。日記到講，老豆為咗紀念大眼妹，將我同細佬個葡文名改咗做『Senado』同埋『Largo』，你知唔知點解呀？」
「我點知呀？開估啦。」
「議事亭前地，即係噴水池，係大眼妹同老豆相遇嘅地方，葡文係『Largo do Senado』：Largo係解Square，即係廣場；而Senado解Senate，即係議事嘅地方……你話我阿媽係咪嬲嬲豬喇。大個咗之後，我同細佬都因為咁，改咗英文名，費事我媽唔開心。
「嗰日之前，我老豆日日哼齊秦嘅『大約在冬季』，呢隻歌，亦都係我人生第一隻識唱嘅歌。
「你問我何幾歸故里，我也輕聲地問自己，不是在此時，不知在何時，我想大約會是在冬季.......
「識你之前，我曾愛上一個韓國交流生，同佢發生咗段朝露般嘅感情，體會到離別嘅黯然銷魂。之前我唔明德仔點解咁仲掛住大眼妹，而家我就明喇。不過，我會好似德仔咁，將大眼妹擺喺床下低，然後專一愛惜佢老婆，我老母。
「仲有呀，大眼妹話，葡國習俗，只要帶意中人去賈梅士像前面，錫佢額頭一啖，就會得到《葡國魂》嘅祝福，永遠咁喺埋一齊。我上網搵過呢段說話，雖然完全搵唔到根據，但係，我真係好想帶你嚟，講個蕩氣迥腸嘅故仔你聽，睇吓大眼妹有冇鳩嗡，同埋等你一世都記得我。」
「大文豪，都唔知你邊句真，邊句假，兜咁大個圈，就係為咗氹我？賈梅士翻生都唔夠你嚟喇！你就叫賈子啦！」
白鴿巢秋風悉悉作響，短髮牧子於賈梅士像前，於最好的黃昏，提高腳尖，向賈子額頭，送上最真誠的吻，將澳葡年代的傷離別，相忘於江湖之中。