港大七不思議食女事件: 28. 飛砂
28. 飛砂
我喺故事開首講過，世事就係由無數巧合拼湊出嚟嘅現實。世事好多嘢，完全唔由得你控制，好似我扑?模阿Yan咁，發生咗就係發生咗，哪怕我係夢入面，只不過係屌緊楊太個賓妹。
星期日晚上，我嘗試打畀牧子，唔知係咪因為我喺拍拖記念日放咗佢飛機，佢嬲到電話都熄埋，Whatsapp最後上線時間，好似冰一樣凝固。內心不安，幾分愧疚，無端放飛機，對佢傷害一定好大。我更加唔敢面對野狼。
不安嘅晚上，只有親戚送畀我嘅Ipod陪住我入眠。
「人在風暴中，無奈的打轉，如像風砂，倦也須兜圈……」
「無奈的疾衝，無奈的刁轉，曾熱的面孔，漸缺少溫暖……」
「嘿喲……唔嘿喲……飛砂風中轉……」
「嘿喲……唔嘿喲……飛砂風中轉……」
隨機播放緊嘅，係我偶像林振強填詞嘅「飛砂風中轉」。巧合彷彿預告緊牧子嘅不幸。
然後，我就訓著咗。
夢。
夢。
夢。
夢。
夢。
夢。
我係怪人，幾乎每日起身，都會記得夢境。我對夢極為迷戀，甚至會喺床頭放上紙筆，將奇怪夢境記低。
明明發咗好多夢，不論我幾努力喺記憶到漫溯，我總係一個都記唔起。
我訓到差唔多一點，一起身，就收到野狼嘅Whatsapp。平時佢只會喺「HKU Wolfpack」呢個Group同我講嘢，但係佢今次私底下Whatsapp我，仲要鬼死咁長，我已經知到大事不妙。
「阿Yan好唔好砌？定係牧子好砌啲？等我話你知，一定係牧子好砌啲，怪唔知你沉撚晒船。尋日阿Yan同我講，話你帶咗佢去划艇會扑咗佢幾獲，我唔知你當我係咩，我由細到大都當你係兄弟，你而家咁撚樣對我？上次CityU嗰條臭西畀綠帽我戴，你咁快唔記得喇？
嗱，牧子係雞，阿Yan係?模，所以佢地兩個都係雞，有錢就上得。我尋日上網搵咗你條女電話，喺百佳幫襯咗佢一Q，幾撚窄，幾撚過癮呀！而家我地算數，打個和，不拖不欠，你偷偷地笑咗我幾耐？我真係好撚憎你。」
我拎住個電話，手都震埋，眼淚就不自覺咁流落嚟。我媽自小就教我男兒有淚不輕彈，對上一次眼濕濕，已經係機場送別韓妹允雅，再對上一次，大概係我阿爺走嗰陣。
究竟係為野狼同牧子上床，定係為牧子可悲，或為砌咗阿Yan而感到對唔住兄弟而喊，我實在無從稽考。我從來唔介意牧子為生活去賣自己，因為佢只係好似飛砂一樣，遭風一吹，就不由自主咁飄蕩於半空。
但係，牧子喺唔知情嘅情況被好兄弟野狼搞咗，縱使浪子如我，乜撚嘢「受港大西化教育」，一時三刻，都好難接受。
野狼係我識嘅人入面，最狼嘅人，個名就係咁樣得嚟。有一次，我同佢一齊搭的士，個的士佬兜路，野狠就同的士佬初則口角，繼而動武，我撳都撳佢唔住。好彩嗰次走得快，先冇被人拉。再者，綠帽係佢嘅痛處，今次我唔小心觸動到佢嘅神經，仲有阿Yan喺隔離加鹽加醋，先令到佢咁樣報復我。
野狼又唔可以怪，牧子又唔可以怪，究竟我又可以怪邊個呢？
我氣上心頭，走去廚房，攬住咗我阿媽嘅肥手臂，好似細個唔見咗個爬兵玩具咁，喊到仆街。我突如其來嘅舉動嚇親我阿媽。
「邦邦，傻咗呀，你做咩喊呀？」我廿幾歲人，阿媽仲係叫緊我做「邦邦」。
「我唔識講……遲啲同你講，媽，我出街，打個電話先。」
我收聲，換件衫，笠件黑皮褸，就走咗出街，打電話畀牧子。
「尋日你去咗邊呀？你唔記得你約咗我架？我喺Raymond屋企，等咗你成個晏晝，我仲準備咗嘢送畀你架。」牧子把聲，我實在好耐冇聽過。
「冇，尋日有屋企有啲事，我返咗大陸探親戚……」我思緒極混亂，講咗個拙劣嘅大話。
「無啦啦返大陸？我唔信呀，你係咪有嘢瞞住我呀？」
「係，牧子，不如我地分開吓……」
初相識總係甜蜜美好，而分手嘅說話，往往換來死水般嘅寂靜。
「你係好女仔，但係我始終唔係長久嗰一種人，我唔想誤咗你啲時間。」
電話另一邊，傳來牧子嘅嗚咽：「原來你都係啲咁嘅人，你係咪睇我唔起？」
「唔係。」百感交集，我實在無力再解釋。
「咁，份禮物，你仲要唔要呀？」呢句說話，我永遠都記得。
一見到牧子，就諗起野狼對我嘅傷害，再加上我對佢嘅愛受之有愧，自私嘅我虛怯得冇面目再見呢個女仔，所以，我狠心咁講咗一句：「唔要喇。」
就咁樣，牧子就掛斷咗。
自從嗰次，我冇搵過野狼，佢都冇搵過我。我先知道，原來可以同你一路稱兄道弟嘅人，下一秒就可以同你形同陌路。細個成日喺紀念冊寫「友誼永固」，都只不過係鳩嗡。我有負於野狼在先，唔可以怪佢嘅衝動，只不過，我真係暫時都唔想搵佢。
我諗Raymond大概都知道咩事，佢夾喺中間，左右做人難，有時我見到佢，即刻諗起萬惡嘅御龍山淫亂派對，即刻唔知講咩好，所以，我同佢都疏遠咗。
牧子從來都唔知道，嗰日砌佢嘅客，係佢男朋友嘅好兄弟。我唔打算畀佢知道呢件咁醜惡嘅事，因為呢個惡果，係我一手造成，牧子全然無辜。所有嘅罪疚都歸於我，不應由牧子承擔。
自始之後，牧子就好似柴火一樣，被我狠狠咁熄滅，化為塵埃，在風中兜兜轉轉。
隔咗大約一星期，我上番Raymond阿爺屋企，一嚟想見吓牧子，二嚟想執番啲雜物。一上到去，人去樓空，只係見到Raymond阿爺張安樂椅前後搖晃。
我執執吓，見到房嘅一隅，放咗枝木結他；結他隔離，係白先勇嘅《寂寞的十七歲》，書入面夾住張紙，密麻麻寫滿音符，原來係結他譜。
結他譜背面寫住：
「 Marvin:
係你最鍾意嘅The Scientist。隻歌我練咗好耐架喇！如果難聽，你唔好笑我呀。仲有，本書係我買畀你嘅紀念日禮物，一個月快樂呀陳納邦。
牧子」
諗起短髮嘅牧子，初見之時喺灣仔同我講：「錫，係留番畀男朋友架」，我頹然坐咗喺床上面，拎住個結他，一路哼起The Scientist，呆呆出神。
命運不斷來回往復，Wilson嘅女神兩遭同房玩弄，而我就永遠聽唔到身邊重要嘅人彈The Scientist。
“And we’re going back to the start……”
「陳納邦，香港人，二十三歲，文學士，二零一四年六月一日香港大學畢業----」
我拎起本《寂寞的十七歲》，使得短髮牧子呢番話，重新浮現喺腦海。跟住，我心中不由自主，接咗落去：
「惟二零一三年十月某日黃昏死於香港，屯門山景邨。」