我係迪士尼俾一班邪惡既卡通人物襲擊: ＃16

佢地再環顧四周，當佢地望過我地呢邊既時候，我手都係度震緊，好驚佢地發現到我地。
 
佢地望過黎，停左一停，再繼續睇下個位。
 
我俾佢停一停嗰一下嚇親，我個心都停一停呀頂。
 
不過好彩佢地都無咩野發現咁，於是繼續放慢腳步係我地黎既方向走左去。
 
係漆黑中，我望唔清楚Yuki既表情，只見佢呆弱木雞咁，無曬反應。
 




我唔敢太大動作，我輕輕用食指戳一戳佢，都係無反應。
 
我再戳大力啲，先識得拎個頭埋黎。
 
「佢地走左啦。」我用氣聲同Yuki講。
 
佢點一點頭，便再無其他反應。
 
「無事啦，我地依家暫時安全啦。」
 




「暫時」，我都唔知幾時先係真正既安全。
 
等到安全過後，我將注意力放返落自己度既時候，我先發現我岩岩原來下意識咁攬住左Yuki。
 
請相信我，我嗰陣時真係完全唔知情，好自然，為左保護佢。
 
「Sorry。」我好似電視劇入面既男主角咁，瞬間鬆開手，然後就十分尷尬。
 
「唔緊要。」唔知點解，即使係漆黑中，我都好似感受到Yuki婔紅色既臉龐。
 




佢身體僵硬到好唔自然，搞到我都幾唔好意思添。
 
「好啦，呢度好似都幾安全，我地可以行啦。」我探一探個頭出去觀察下。
 
「都係唔好住，過多一陣先。」Yuki用手拉一拉我。
 
我見佢語氣有幾分認真，於是道：「好啦咁。」
 
但越係留係度，就越係化解唔到頭先既尷尬。
 
我地靜默左落黎，聽到既，只有彼此既呼吸聲，可想而知，我地有幾咁近。
 
「多謝你。」佢突然彈左呢一句出黎。

「嗯？」我語氣中帶點困惑。




 
「多謝你三番四次咁救我，如果唔係有你係度，我可能已經放棄左，任由佢地殺戮。」佢咁講，更令我覺得唔好意思──怕醜。
 
「傻啦，我相信換轉任何一個男仔，都會咁做既。」我真心咁講。
 
「唔係個個男仔都肯挺身而出。」佢望一望我，眼神盡是一連串既故事。
 
我知道，Yuki背後，都可能經歷過唔少既事情。試問一個天真無邪既女仔又點會講出呢句說話？
 
「唔洗客氣。」我害羞咁搔一搔頭，我第一次咁樣俾女仔讚！
 
除左怕醜之餘，更多既，係飛向天上既開心同快感，頓時間覺得疲倦既身軀好似叉足電咁，充滿曬動力。
 
「話時話，我地接落黎要去邊度好呀？」佢提出左一個好好既問題。
 




我思索左一陣，整理好個情緒之後，就說：「我地依家係明日世界，根據我呀妹既電話講道，佢地依家係反斗奇兵大本營，所以我地要穿過幻想世界，先會去到大本營。」
 
根據我既記憶，我係記得一出門口，就轉右，一路行到底就係啦。
 
「好啦，我地行啦。」Yuki難得震奮咁講。
 
新既世界，又係一個新既冒險同埋考驗……
 
我地要經歷幾多次生與死既交織，先可以出返去？
 
我帶頭行先，我等Yuki尾隨上黎。
 
我行左幾步之後，我感覺到我隻手俾人牽住我。
 
我下意識回來一看，漆黑中我睇唔清Yuki既容貌，但睇到佢低頭既樣子，我推測個表情為含蓄。




 
佢竟然主動拖住我，出乎我意料之外。
 
我估唔到係呢個咁嚴峻既moment，竟然會發生呢啲咁既事。
 
岩岩先經歷完幾次既大戰，呢個行為突然間令我充滿能量！
 
我一定會好好保護好Yuki，就算我無左條命都好，我發誓！