我係迪士尼俾一班邪惡既卡通人物襲擊: ＃3

隻米奇老鼠仍然掛住佢既笑容一步一步行緊我地。

佢推跌曬排係架上面既貨品，而貨品一件件咁跌曬落黎。

米奇老鼠既右手白色手套上面染了一點一點既鮮血，武士刀上面既鮮血仲係度滴緊，地上面既血形成左一條軌跡。

「喂！走啦喂！企係度做咩呀？」我對住yuki大喝一聲。

但我叫人走姐，但自己雙腳卻好似郁唔到咁。





佢越行越近，我先意識到，『再唔走，會死架。』

於是我拉住滿腔眼淚既yuki，係咁搖佢，「喂！醒呀，唔好發夢呀，走啦。」

隻米奇老鼠好似知道我地要走，加快左腳步。

Yuki終於有返d反應，從佢驚惶失措既眼神睇得佢，佢仲未接受到眼前帶俾佢既衝擊。

跟住佢只係對住我不停咁點頭，示意我走。





我唔敢多諗，即刻帶佢走出呢間鋪頭先再算。

走出去既時候我有留意細妹係邊，但四周圍都唔見佢，亦都唔見呀朗。

不過唔緊要啦，有呀朗保護佢應該無事既，走左出去先。

依家最緊要既，係yuki。

行出黎既時候，我仲見到間鋪入面仲有人係匿埋左。





佢地有無危險我就唔知，但係我正係知我依家就係泥菩薩探腔啦，自身都難保。

人就係自私架啦，你唔好怪我呀。

我一出黎，入面既慘叫聲無停過……

佢有無繼續斬人我就唔知啦…

但係我見到個畫面更加震撼。

我係街上見到好多米奇老鼠！係個美國小鎮大街上面遊走。

每隻米奇老鼠都手執一把武士刀，係度亂刀揮舞。

我地完全唔知發現咩事，第一時間就係要向出口果邊走。





邊個會仲往入面走呸傻的嗎呀？

我拖住yuki向門口果個方向走，我先發現，yuki佢，捉我隻手捉到好實好實。

係捉到好痛果一隻，幾乎係出盡所有既力氣。

但係我感覺唔到痛，呢d痛唔係d咩，正正係代表左佢個心有幾痛幾爭扎。

本來應該開開心心，帶俾人歡樂既迪士尼樂園，依家卻帶俾人無上既痛苦。

我拉佢去牆角度，應該班米奇老鼠見唔到我既……我估。

所以我以極快既速度去安撫yuki既心情。





「那，我依家都唔知發生左咩事，但有機會我都想搞清楚件事！」

佢聽到我講之後，個人開始放鬆返，鎮定緊落黎。

佢深呼吸之後，好似清醒返咁。

「依家呢，我地就要衝去門口果邊，睇下可唔可以出到去，雖然出到去既機會都渺茫，但係都要試下架啦。」一邊同佢講成件事既時候，我都試圖冷靜返，用高既專注力去諗返成件事。

用米奇老鼠公仔做掩飾既究竟係咩人？

點解要咁樣屠殺？

一個又一個我諗唔通既問題……

但依家既情況卻不由得我細想。