【愛情】如地下情一樣嘅癮，係我對你嘅定義: 53. 偷偷地
黎昕淇嘅瞳孔一縮，佢點可能會將呢個答案同宋楚妍講？天大嘅秘密，佢唔可能講出去
「黎昕～」宋楚妍叫咗黎昕淇一聲
「係。」黎昕淇一秒挺直腰背、放低手機、抬起頭，動作迅速到令宋楚妍都愣咗一下，「做咩⋯？」
「冇咩⋯比你嚇咗一跳，都唔記得咗想講咩⋯」宋楚妍笑道
黎昕淇嘅心噗噗跳，佢壓抑住自己嘅緊張，自然咁轉頭朝窗外望咗一眼，實際上想望一望陸修然嘅反應，但陸修然同冇事一樣繼續食嘢，好似send出「只有解藥」四個字嘅人唔係佢
食完飯之後，宋楚妍去咗一轉便利店，莫淮禮因為無聊當係散步跟埋入去，黎昕淇同陸修然默默跟喺後面
黎昕淇隨手拎起一排朱古力，陸修然企喺佢身旁望住各式各樣嘅朱古力，不過陸修然對呢啲甜膩嘅嘢食冇咩興趣
「你覆咗佢未？」陸修然喺拎起一包朱古力豆嘅同時忽然開口細聲問道
「你係唔係玩我？」黎昕淇朝左右望一眼，佢知宋楚妍行咗去最入嘅位置，即刻壓低聲線有啲緊張咁講，「點可能咁樣答佢？」
「點知你會點答佢，佢唔係想知咩？」陸修然左右張望，睇清楚附近有冇其他人
「點答都唔可能係咁樣答係唔係⋯！」黎昕淇抬頭望向陸修然
陸修然趁呢個瞬間耷低頭，熟悉嘅柔軟觸感落喺唇上，黎昕淇瞬間瞪大眼，大腦空白一片；陸修然將朱古力豆放番低，但仍然停留喺黎昕淇嘅身旁
黎昕淇用力喺陸修然嘅手臂上揼咗一下，然後先記得要擰轉頭睇下有冇人睇到
「陸修然⋯！」黎昕淇又怕又焦急，佢好怕會比其他人睇到，好怕宋楚妍或者莫淮禮會突然喺佢身後出現將一切都睇到，「你想比人發現係唔係⋯！陣間比人見到你錫我點算⋯！」
「佢兩個喺最入面，我同你前面咁大個貨架擋住。」陸修然嘅手臂隱隱作痛，佢伸手摸一摸自己嘅手臂，感受到黎昕淇真係冇留力，「你就唔可以細力啲⋯？」
「邊個叫你錫我⋯！喺呢度，陣間比人見到！」黎昕淇輕力咁又打咗陸修然一下，「你特登係唔係⋯！」
陸修然笑而不語，黎昕淇又嬲又無奈，伸手搣陸修然嘅手臂；望住黎昕淇一臉有苦難言嘅委屈，陸修然伸手輕拍黎昕淇嘅頭頂兩下
「兩日前嘅嘢未嬲完，今日又嬲。」陸修然嘅語氣比啱啱柔和，佢對黎昕淇細聲問道：「我嘅解藥做咩成日都嬲？」
「哼⋯我又冇嬲，係你唔同我講嘢。」黎昕淇垂低手輕哼一聲，縱使表情緩和咗，但仍然帶住少許嘅不悅細聲道，「係你突然發我脾氣，小氣鬼⋯」
「我？」陸修然聽到後露出一絲淺淺嘅笑意，「我小氣？」
「嗯，講兩句就唔理我⋯」黎昕淇將朱古力放番喺架上，清澈明亮嘅雙眸同陸修然對上，眼神裏好似表達緊佢估到當中嘅原因
陸修然沉默不語，或者的確係佢小氣，不過真正嘅原因都係暫時收喺心入面比較好
兩人嘅手垂低，陸修然悄然用食指勾住黎昕淇嘅食指，黎昕淇嘅食指微微捲縮起嚟，心跳因為緊張感而直線上升
如果忽然間有佢地學校嘅人行入嚟見到嘅話，咁點算？
如果宋楚妍喺呢個時候突然行過嚟，咁啱撞見嘅話，咁點算？
如果比人睇到，有人問起嘅話，咁點算？
似地下情亦非地下情，所有嘅事嘅起因都係因為一個睇起嚟微不足道嘅癮，癮嘅併發症原來會咁強烈⋯
輕勾一下手指都會指尖發熱、心跳加速，聽到腳步聲都會心臟一縮，明明大家都係單身，但呢件事好似一件唔見得光嘅事一樣
或者，正正因為佢地想要隱瞞，所以先會心虛，因為心虛，所以先會覺得刺激；喺所有人嘅面前將對方當成一個唔太熟悉嘅同學、工作夥伴，喺背後卻係靠得最近嘅人
地下情嘅魅力在於其他人要一直搵蛛絲馬跡，但係一直只會停留喺猜測嘅階段，除咗當事人，冇人知道真正嘅答案
「黎昕～番去啦，時間都差唔多啦～」宋楚妍從最入面嘅位置行出嚟走向黎昕淇
「哦，好呀。」黎昕淇嚇咗一跳，心臟一縮嘅同時反應迅速咁轉身面向宋楚妍，背向住陸修然嘅同時將手往背後收
陸修然將手抽出嚟，黎昕淇嘅緊張稍微緩和，走向宋楚妍同佢一齊行出去
黎昕淇回頭望向陸修然，陸修然平靜淡然咁撇開臉將視線移開，同莫淮禮行喺兩人身後，佢嘅心都因為啱啱突然出現嘅宋楚妍而緊縮一下
佢同黎昕淇一直都係喺保持一段距離嘅同時維持喺離對方最近嘅距離，但同樣地，正因為有呢個距離限制，佢地嘅關係先會充滿神秘感
「你同會長啱啱講緊咩呀？咁凝重嘅？」宋楚妍攬住黎昕淇嘅手臂低聲問道
「冇講咩⋯」黎昕淇搖搖頭，佢同陸修然嘅關係，暫時最好都係收起嚟唔好比人知
⋯
放學
「英文份作文我做完啦，中文寫咗一半。」蘇序然慢悠悠講道，「擺咗喺屋企。」
「你分開寫可以寫到㗎咩⋯？唔會上文不接下理？」宋楚妍有啲懷疑
「唔會呀，都寫到㗎。」蘇序然搖頭
「喂！」有兩個人喺江清懿隔離跑過，什至撞到江清懿
「邊一級㗎⋯」蘇序然輕皺起眉頭，但下一秒佢睇清楚之後默默望向江清懿，「哦，你個妹。」
「係鍾安而個妹。」江清懿摸一摸自己嘅手臂，佢敢肯定鍾樂時係特登
鍾樂時一臉得意咁回頭望佢，江清懿無奈咁嘆氣：「如果佢可以好似鍾安而一樣安靜啲就好⋯」
IG Link: https://www.instagram.com/nd_cotttoncandy/?hl=zh-tw