【愛情】如地下情一樣嘅癮，係我對你嘅定義: 54. 警告

江清懿拎住一個袋燒賣番到屋企，啱啱坐低打開發泡膠盒嘅膠蓋，鍾樂時就番到嚟

「你咁快嘅？」鍾樂時將皮鞋除落嚟放到鞋架上

「你搭早一班車都可以慢過我嘅？」江清懿拎起竹籤拮起燒賣放入口

鍾樂時聞香而來，江清懿將竹籤拮落另一粒燒賣上，竹籤啱啱拮落去，下一秒就比鍾樂時拎起偷食一粒

「要食自己買⋯」江清懿無奈咁接過鍾樂時遞比佢嘅竹籤





「唔好咁小氣嘛～」鍾樂時連忙行到江清懿身後，一臉乖巧咁喺江清懿嘅膊頭上揼咗兩下，「你唔係好大方㗎咩～你不嬲都最好人最大方㗎嘛～」

「得啦得啦，你食就食，唔洗賣口乖⋯」江清懿推開鍾樂時嘅雙手

江清懿起身行番房換衫，鍾樂時坐喺江清懿坐嘅位，食江清懿買番嚟嘅茶點

鍾安而喺江清懿換完衫出嚟嘅時候開門番到嚟，江清懿企喺餐枱前望住鍾安而，鍾安而有啲不解咁同江清懿對望

「你又咁遲？」江清懿拎起放喺膠袋隔離嘅手機，轉身行去梳化坐低





「晏咗放學。」鍾安而彎腰將皮鞋放好就直接行番房，經過餐枱就見到鍾樂時喺度食緊嘢，「又食，陣間今晚食唔落飯。」

「江清懿買㗎！」「宜家唔係你喺度食緊？」

「我今晚食得落飯，信我啦～」鍾樂時比咗個Okay手勢，鍾安而無言以對，直接行番房

鍾樂時拎起發泡膠碗，帶住小碎步走到梳化企喺江清懿面前

「你仲食唔食呀？仲有⋯兩粒！」鍾樂時將碗遞到江清懿嘅面前





「多謝你喺食到最後先記起我，不過你食啦。」江清懿瞄一眼幾乎只剩豉油嘅碗搖搖頭

「最多，我下次請番你食嘢啦！」鍾樂時坐低喺江清懿隔離，江清懿向扶手嘅方向縮咗一下拉開距離

「你請我食嘢？幾時呀？地球有13個月嘅時候？」江清懿聽完都唔信，笑一笑之後繼續睇手機

「你咁睇我㗎！」鍾樂時扁起嘴，伸手喺江清懿嘅手臂上拍咗一下，「不過等我諗下請你食咩先～」

「好，聽住先。」江清懿敷衍咁點頭，平時成日同佢爭嘢食嘅就係鍾樂時，請佢食嘢更加冇咩可能

「你睇緊咩咁專心？」鍾樂時偷瞄江清懿嘅手機一眼

「冇呀，隨便睇下。」江清懿將手機嘅螢幕轉去比鍾樂時睇

「有女仔send message比你。」鍾樂時指住新彈出嚟嘅通知講道，「花心男，成日周圍溝女，你咁樣以後會冇女朋友㗎～」





「我有女仔friend都叫花心⋯你地啲定義都唔太正常。」江清懿喺鍵盤上打字，簡短咁回覆對方，「我又冇同時同好多人有曖昧不明嘅關係，請問我點樣花心？我同邊啲人曖昧緊？」

江清懿都唔知由邊一日開始自己就被掛上「花心男」呢個標籤，明明佢拒絕人地嘅表白都係好肯定，絕對唔會拖泥帶水，同好熟嘅朋友先會搭下膊頭

「黎昕呀！」鍾樂時衝口而出，因為佢淨係諗到同江清懿睇起嚟最熟嘅黎昕淇

「錯錯錯！你唔好亂講，我同黎昕係朋友，真係朋友。」江清懿即刻澄清，佢比鍾樂時講嘅嘢都嚇咗一跳

「你呀，離黎昕遠啲！」鍾樂時一臉認真咁警告江清懿，「黎昕⋯黎昕佢好受歡迎，你痴咁埋嘅話，小心比人打！」

鍾樂時滿腦子都係上次喺樓梯間聽到嘅嘢，直覺令佢覺得江清懿再唔離黎昕淇遠啲嘅話，可能有人就要出手、要強制公開啦

「比邊個打⋯」江清懿一臉無奈咁望住鍾樂時，用食指輕輕戳住鍾樂時嘅額頭，「煲少啲劇啦。」





「我冇煲劇呀。」鍾樂時嘅頭微微向後仰，指尖摸一摸自己嘅額頭，「講事實咋嘛！」

「朋友，就係朋友，唔好諗咁多。」江清懿以肯定嘅語氣講道，「星期六一齊番工嘅朋友。」

「最好真係朋友⋯」鍾樂時喺心入面嘆氣道，「陣間到會長嬲⋯」

另一邊廂，黎昕淇一去完廁所出嚟就見到陸修然仍然將牛奶抱喺懷中

「佢肯比你抱咁耐嘅？平時我抱佢一陣都唔得⋯」黎昕淇有啲羨慕又有啲呷醋，明明自己平時都好錫牛奶，成日都買零食比佢又陪佢玩

「因為佢中意我多啲。」陸修然驕傲咁對牛奶講道

「原來你係偏心貓！」黎昕淇捏住牛奶軟綿綿嘅臉頰，牛奶一手就推開黎昕淇嘅手，「你仲要推開我！」

黎昕淇捉住牛奶毛茸茸嘅手，牛奶嫌棄咁將手縮起，朝陸修然嘅懷中匿埋





「哼⋯你個小叛徒⋯」黎昕淇輕哼一聲，又伸手捏咗牛奶嘅手一下

陸修然彎腰將牛奶放到地上，牛奶企喺原地抬頭望住陸修然，然後又圍住佢行咗一個圈、喵咗一聲

「抱咗你大半個鐘啦仲喵，唔抱啦⋯」黎昕淇對住牛奶無奈道，然後又望向陸修然：「縱壞佢啦，成日都要人抱⋯」

陸修然側住頭定睛望住黎昕淇，黎昕淇疑惑咁望住陸修然，牛奶覺得自討沒趣踩住小碎步默默行開

「望咩？」黎昕淇翹埋雙手問道

「冇咩。」陸修然帶住一抹笑意小幅度搖一搖頭

黎昕淇向前踏一步將佢同陸修然嘅距離縮短，佢伸手拉住陸修然嘅領結，主動湊近嘅時候陸修然向後縮咗一下





眼見陸修然呢個意外嘅舉動，黎昕淇感到不解，望住陸修然嘅眼神裏都係帶住滿滿嘅疑惑

「怕縱壞你。」陸修然用平淡嘅語氣講咗一句

「冇，我唔會。」黎昕淇稍微用力捉住陸修然嘅領結，將陸修然往自己嘅方向拉，「我唔會恃寵生驕。」

陸修然微微彎低腰遷就黎昕淇，陸修然嘅唇喺黎昕淇嘅唇上輕碰一下，右手捉住黎昕淇嘅手腕，將佢嘅手從佢嘅校呔上移開；左手攬住黎昕淇嘅腰，將黎昕淇同自己嘅距離再拉近啲

陸修然耷低頭喺黎昕淇嘅嘴邊又錫咗一下，只係輕輕一碰，黎昕淇已經覺得渾身唔自在，癮喺一瞬間就比佢撩起

只要一湊近，空氣都會變成對方嘅味道，黎昕淇只要一聞到佢身上嘅味道，心就會一直噗噗跳，明明喺學校嘅時候都唔會係咁樣⋯

陸修然聞到屬於黎昕淇嘅香味，但同時諗到佢成日都會同江清懿一齊，同佢保持距離但同江清懿就唔洗，不悅嘅感覺頓時湧出嚟

陸修然將黎昕淇嘅右手提起到自己嘴邊，喺佢白嫩嘅手臂上用力一咬；黎昕淇都可以感覺到牙齒陷入皮膚，手指捲縮起嚟握住拳頭，右手捏住陸修然嘅裇衫




IG Link: https://www.instagram.com/nd_cotttoncandy/?hl=zh-tw