【愛情】如地下情一樣嘅癮，係我對你嘅定義: 52. 回答

陸修然嘅一句就好似踩中黎昕淇嘅雷點一樣直接將炸彈引爆，黎昕淇企喺陸修然嘅屋企門口，佢唔中意陸修然故意對佢冷言冷語

雖然陸修然好多時都好平靜，亦唔會有太大嘅感情波動，但刻意嘅冷淡，黎昕淇都係可以聽得出

「好想搵楚妍講⋯」黎昕淇喺心裏嘆氣，呢啲事的確應該搵朋友講最實際

有時好迷惘嘅時候，朋友嘅幫助好重要，但偏偏佢同陸修然嘅關係唔可以比人知，黎昕淇唔想變得更受人矚目

「阿昕今次係真係嬲⋯」陸修然仰起頭苦惱咁望住天花板，「佢又要嬲我好幾日⋯」





⋯

「我最近睇IG，見到以前小學同學終於一齊咗～」宋楚妍興奮咁同黎昕淇分享

「你咁興奮，我仲以為係你同邊個一齊咗⋯」黎昕淇托住頭道，「人地一齊咁你做咩咁開心？」

「聽講佢地兩個係青梅竹馬嚟，宜家一齊咗感覺好夢幻～」宋楚妍果然係對各種戀愛有憧憬嘅人，講嘅時候興奮到好似佢係當事人一樣

「好夢幻⋯？」黎昕淇唔太理解呢種感覺





「唔夢幻咩？青梅竹馬本來就係兩小無猜一樣嘅同伴，一齊長大自然好了解對方呀～佢兩個都係咁～」宋楚妍理所當然咁講道

「可能啦⋯」黎昕淇冇唔同意宋楚妍嘅說話，只係比咗個好中肯嘅回答，「楚妍有冇中意，或者感興趣嘅人？」

「中意嘅人就冇，不過感興趣嘅人就有好多～」宋楚妍笑住回答，「靚仔嘅我都感興趣，會長同副會長我都感興趣㗎～不過佢地太難接近。」

黎昕淇無奈咁笑，宋楚妍都係外貌至上嘅人嚟，見到靚仔、有魅力啲就心醉

「不過我知副會長有中意嘅人啦，我反而想知會長～」宋楚妍對黎昕淇招手示意佢湊前啲，然後細聲咁講道





「邊個？」黎昕淇有啲意外好奇咁問道，佢之前都冇聽人講過

「你有冇搞錯呀！上次去踩roller，江清懿特登約埋鄭洛苡，仲問副會長佢係咪做得好好！」宋楚妍不禁反咗個白眼，低聲著急咁講道，「盲嘅都睇得出啦！你有冇留意㗎！」

「冇喎⋯」黎昕淇搖頭，「點知道係唔係真。」

「你成日同會長一齊，知唔知會長有冇中意嘅人？」宋楚妍捉住黎昕淇嘅手緊張咁問

「我、我點知⋯」黎昕淇比宋楚妍一下捉住手搞到心都離一離，「你估我24小時跟住佢⋯？」

黎昕淇嘅目光落喺企喺一邊嘅陸修然同莫淮禮，間中都會有女仔行過然後同陸修然打招呼，不過其實大家都習以為常

「唉⋯你都唔留意下嘅⋯」宋楚妍失望咁嘆氣，「睇下會長有冇同邊個女仔好熟好close嘛⋯」

「我留意嚟做咩⋯」黎昕淇靠住櫈背坐番好，垂眸低聲道，心裏輕嘆一口氣





宋楚妍同黎昕淇喺小息完結嘅時候因為前梯人太多而經後梯番課室，喺經過D班嘅課室嘅時候，陸修然啱啱好企喺locker前同一個女同學講緊嘢，笑咗一笑

黎昕淇見到之後自然咁當睇唔到，撇開臉望向宋楚妍，佢同陸修然已經兩日冇講過嘢，不過比上次幾日冇講嘢嘅情況暫時較好

陸修然拎完嘢行番埋位坐低，諗起啱啱黎昕淇望佢嘅眼神，眸色一沉嘅佢啱啱好比陸修然捕捉到

「應該，未嬲完⋯」陸修然喺心入面嘆氣道

放飯嘅時候，今日江清懿佢地揀喺學校食飯，黎昕淇同宋楚妍兩個人出咗去食飯

「會長同莫淮禮⋯」宋楚妍見到行喺前面嘅陸修然同莫淮禮，「唔知佢地係唔係同我地食同一間。」

兩人又真係行去同宋楚妍佢地想去嘅餐廳門口，宋楚妍拉住黎昕淇跑到餐廳門口





「咁啱呀？」莫淮禮嘅餘光見到宋楚妍，擰轉頭望發現黎昕淇都喺度，「搭唔搭枱？張枱執緊。」

「好呀～你咁好人嘅？」宋楚妍豎起手指公比咗個like莫淮禮

「不嬲都咁好人⋯」莫淮禮將宋楚妍嘅手㩒低，然後拍一拍陸修然：「你冇所謂呀可？」

「冇所謂。」陸修然搖搖頭

店員阿姨執好枱之後推開門叫佢地入去，陸修然習慣咁坐喺靠走廊嘅一邊，佢以為莫淮禮會坐佢隔離

「睇下食咩先～」莫淮禮直接行到陸修然對面嘅梳化位坐低

宋楚妍眼見佢地咁樣坐，行先嘅佢坐低喺莫淮禮隔離，黎昕淇冇覺得坐陸修然隔離有啲咩，只係食飯唔係同宋楚妍一齊坐有啲唔慣

再加上最近兩日佢同陸修然都冇講過嘢，一齊坐嘅時候就有種尷尬嘅感覺





「餐牌。」陸修然禮貌咁將餐牌先遞比黎昕淇，「你睇先。」

「唔該。」黎昕淇接過餐牌望咗一眼，已經即刻決定好食咩，又將餐牌遞番比陸修然，「我揀好啦，你睇。」

「睇好食咩未？」莫淮禮問道，「睇好我就叫阿姨寫嘢。」

「叫啦。」陸修然將餐牌放喺一邊，留低莫淮禮手上嘅一份就夠

點完餐之後莫淮禮同宋楚妍有講有笑，相反黎昕淇同陸修然一句嘢都冇講，口好似比膠水痴住咗一樣

兩人各自拎住手機睇，佢地呢邊嘅氣氛有啲冷卻，同對面嘅氣氛截然不同

「你地好靜⋯」宋楚妍望住坐喺對面嘅兩人講道





「冇嘢要講。」黎昕淇搶先一步開口，平淡嘅語氣聽起嚟有啲刺耳

陸修然只係帶住似笑非笑嘅表情望一望黎昕淇，黎昕淇微微點頭，喺其他人面前佢將佢同陸修然嘅關係撇清

「你地平時喺會室唔講嘢？」宋楚妍笑問道

「好少。」陸修然講道，睇起嚟兩個人好似完全唔熟一樣，用最平靜嘅語氣回答

「你快啲問下會長有冇中意邊個啦」宋楚妍喺枱底send咗個message比黎昕淇

「你唔好咁八卦⋯」黎昕淇無奈回覆道，「你想知嘅你直接問會長」

「問咩？」陸修然send咗個message問黎昕淇，佢啱啱唔小心瞄到宋楚妍嘅message內容，畢竟佢嘅視力都唔錯

黎昕淇將宋楚妍嘅message複製貼上，原句send比陸修然，陸修然睇到之後冇表情咁打字，一回覆好就收起手機

黎昕淇耷低頭睇清楚陸修然嘅回覆：「只有解藥」




IG Link: https://www.instagram.com/nd_cotttoncandy/?hl=zh-tw