【愛情】如地下情一樣嘅癮，係我對你嘅定義: 39. 黑白
陸修然從架上拎咗一隻黑色嘅不知名物比黎昕淇，佢冇太留心去睇佢到底揀咗啲咩，反正都係比黎昕淇買個開心
「嗱。」黎昕淇比完錢將黑色嘅公仔遞到陸修然手中，「好啱你，黑色嘅兔仔。」
陸修然喺呢個時候終於睇到佢揀咗啲咩，黑色嘅兔仔一隻
「你唔好掛喺書包。」黎昕淇提醒道，「我會掛書包。」
「嗯，好呀。」陸修然微微點頭，本來佢就冇打算掛喺書包
「但如果我掛喺書包嘅話，白色咪會污糟⋯」黎昕淇拎住小白兔講道，然後又將目光放到陸修然嘅小黑兔上，「我地交換，你都唔會掛喺書包，雖然我覺得你同黑色兔仔似啲⋯」
望住被塞到手中嘅小白兔毛公仔，陸修然嘅心情有啲複雜，但眼見黎昕淇睇起嚟心情好好，佢又冇咩所謂
「我同黑色兔仔邊度似⋯？」陸修然無奈笑問道
「白色好普通，黑色兔仔睇起嚟好有神秘感，唔係同我地受人仰慕嘅會長一樣？」黎昕淇抬起頭對陸修然講道，嘴角帶住淡淡嘅笑意，但係肉眼可以睇到嘅發自內心嘅開心笑意
「白色嘅兔仔唔普通，好可愛呀。」陸修然望一眼比佢套咗喺手腕嘅小白兔後對黎昕淇講道
黎昕淇一手拎起手機一手拎起新買嘅黑色兔仔吊飾，準備幫自己同毛公仔影張相；陸修然好自然咁伸手將黎昕淇嘅手機轉動角度，將白兔都放到鏡頭中，黎昕淇拉一拉陸修然嘅衫角示意佢彎低少少
「我拎。」陸修然主動伸手接過黎昕淇嘅手機影相，影完就將手機還番比黎昕淇，「過目一下。」
「唔錯唔錯，send番比你。」黎昕淇滿意咁點點頭，黎昕淇喺send相嘅時候認真望一望張相，係佢同陸修然為數不多嘅雙人合照
黎昕淇一番到屋企就將公仔掛咗喺書包度嘅拉鍊上面，陸修然將公仔掛喺書枱上嘅掛勾上，望住掛喺眼前嘅公仔，陸修然忍唔住耷低頭，唔自在咁伸手摸一摸後尾枕
⋯
宋楚妍喺番學校嘅路上見到行喺佢前面嘅黎昕淇，宋楚妍即刻追上前
「早晨呀黎昕～」宋楚妍比咗黎昕淇一個大大嘅早晨擁抱
「早晨。」黎昕淇一早就聽到宋楚妍嘅腳步聲
「新買㗎？」宋楚妍伸手捏住黎昕淇書包上嘅毛公仔，「之前冇見過嘅？」
「琴日買㗎。」黎昕淇講道，「買一送一。」
「另外嗰隻係咩？」宋楚妍好奇咁問
「白兔。」黎昕淇忽然諗起隻白兔喺陸修然手上，「不過我怕整污糟，冇掛喺度。」
「好可愛～捏起嚟好舒服。」宋楚妍笑道
黎昕淇以為宋楚妍想問佢拎埋另一隻，呢個佢真係做唔到，因為小白兔唔喺佢手上
「毛茸茸⋯」宋楚妍仍然捏緊黎昕淇嘅公仔
兩人番到學校，黎昕淇同宋楚妍先去小食部買早餐
「食咩好？」宋楚妍問黎昕淇
「我食三文治。」黎昕淇拎起一份三文治，「餐蛋治⋯」
「我食餐蛋定腿蛋好？」宋楚妍望住啲三文治猶疑不決，「你覺得呢？」
「黎昕早晨～」鍾樂時出現喺黎昕淇嘅身旁，直接攬住黎昕淇
「早晨，嚇咗我一跳⋯」黎昕淇對鍾樂時微微一笑，啱啱心緊縮咗一下，「你買嘢食？」
「嗯！今日冇食早餐就出咗門口～」鍾樂時笑道，佢嘅笑容向來燦爛，無論咩天氣都好都一樣，「咦？你新買㗎？之前冇見你扣過嘅？」
「琴日買㗎，買咗兩隻，一黑一白。」黎昕淇今朝先答過一樣嘅問題，「不過怕白色污糟，所以扣隻黑色。」
「哦～」鍾樂時望住吊飾，發出意味深長嘅附和聲，心裏忍唔住猜測：「唔知另一隻會唔會喺會長嘅書包度～不過會長又唔似會扣呢啲可愛嘢喺書包嘅人⋯」
「拜拜樂時～」黎昕淇買完早餐就同宋楚妍一齊走
「哦，拜拜～」鍾樂時回頭望向黎昕淇，目光不自覺就落喺黎昕淇嘅書包上
黎昕淇同宋楚妍一齊番到課室，黎昕淇坐低，江清懿即刻叫住佢
「黎昕，你係唔係有做newscutting？」江清懿拎起淨係貼咗相關報紙，但背面嘅答題空空如也嘅工作紙
「有呀，你搵。」黎昕淇直接將成個file遞比江清懿，然後自己行咗去開locker
開完locker番到埋位就拎起佢嘅早餐，喺早會之前快啲將三文治食完，手機放喺筆袋旁邊，指尖一直掃螢幕
「仲掛住食早餐」忽然喺上方陣出一個message通知，係陸修然
黎昕淇咬住麵包朝向住走廊嘅窗望去，見到陸修然喺窗前經過
「你今日做咩咁晏」黎昕淇收回視線，喺手機嘅鍵盤上輕敲
「食埋早餐先番」陸修然喺窗前行過，行到最後嘅課室行入去
陸修然自收起手機，畢竟課室入面太多人，比邊個見到都唔太好；陸修然坐喺後排嘅位置，聽住莫淮禮一直講嘢
「我好似基本上冇同過黎昕同班⋯」陸修然喺放空到一半嘅時候忽然發現，「不過都係好事嚟，某程度上⋯」
午飯之後，距離上堂仲有時間，陸修然番到課室執好陣間上堂嘅嘢之後著埋冷衫就去咗會室，一如既往坐喺窗前嘅位置
「咔—」會室嘅門被推開，陸修然抬眼望向門口，黎昕淇嘅身影映入眼簾
「你居然著咗冷衫？」黎昕淇望住陸修然身上嘅冷衫意外道，「平時都唔見你著。」
「課室有啲凍。」陸修然拉一拉冷衫嘅衫袖，推開喺佢右邊嘅櫈比黎昕淇坐
「今日放學打唔打機？琴日冇打到。」黎昕淇坐低之後拎出手機同時問道
「琴日係因為有人瞓著咗，所以先冇打機⋯」陸修然無奈咁講道，陸修然定睛望住黎昕淇
「做咩⋯？」黎昕淇困惑咁問道，喺陸修然提手嘅瞬間下意識向後縮咗一下
「唔好郁。」陸修然低聲一句命令，黎昕淇即刻冇再向後縮，乖乖咁坐喺度
陸修然拎起紙巾，喺黎昕淇嘅嘴角抹咗一下，黎昕淇嘅心都緊縮咗一下，定睛望住眼前嘅陸修然
IG Link: https://www.instagram.com/nd_cotttoncandy/?hl=zh-tw