【愛情】如地下情一樣嘅癮，係我對你嘅定義: 38. 可愛

「還好啦，因為一齊番工。」江清懿冇察覺到鍾樂時喺佢回答嘅時候瞇起眼望住佢，睇起嚟有啲懷疑佢，「問嚟做咩？」

「冇，隨口問下～」鍾樂時聳肩，繼續食雪糕，「我好似食唔晒⋯」

「擺番去雪櫃⋯」江清懿無奈咁望住仲有一半嘅雪糕講道

「但我擺番去雪櫃，今晚我未必想食⋯」鍾樂時望住手上嘅雪糕道，開始諗緊佢要點樣處理呢杯雪糕

江清懿將雪糕從鍾樂時嘅手上拎走，起身，邁步走向鍾安而嘅睡房：「鍾安而！」





鍾安而戴住耳機都可以聽到江清懿叫佢，將耳機除落嚟同時，江清懿啱啱好打開佢嘅房門

「鍾樂時話食唔晒，今晚唔想食，比你食。」江清懿將雪糕放到鍾安而嘅枱上

「晏晝食咩雪糕⋯」鍾安而一臉嫌棄咁輕皺起眉頭望住放到佢枱邊嘅雪糕

「啱啱你個妹都係咁講，但佢轉個頭已經食緊。」江清懿講道

「哈哈～雪番入冰箱先～」鍾樂時一秒跑入鍾安而嘅睡房，將雪糕從枱上拎走，仲特登拎埋蓋蓋番好，然後又匆匆忙忙咁去咗廚房





江清懿同鍾安而望住鍾樂時一秒出現又消失嘅身影，鍾安而無奈咁搖頭，然後又戴番耳機，江清懿行出睡房順便閂門

另一邊廂， 陸修然去完廁所，行番去斜對面嘅睡房開門

「又話打機，開咗機未？」陸修然推開門，本來想問黎昕淇開咗床尾嘅電視未，但一推門入到去就見到黎昕淇直接灘咗喺床上面，似乎瞓著咗，「黎昕⋯黎昕？阿昕？」

「嗯⋯」黎昕淇用喉嚨發出迷迷糊糊嘅聲音，「突然間好眼瞓⋯」

「番去瞓。」 陸修然拉開櫈坐低喺書枱前





「嗯⋯陣間番去⋯」黎昕淇擰轉頭，額頭靠喺被上蹭，「幫我擺番個手掣⋯」

陸修然轉身將手掣插番喺遊戲機上，當櫈轉向床嘅方向嘅時候，陸修然嘅食指放輕動作勾起黎昕淇嘅食指

「唔⋯」黎昕淇輕皺一下眉頭，眼半睜開，用軟綿綿嘅語氣道：「唔錫呀⋯眼瞓⋯」

「嗯。」陸修然不禁失笑，佢縮手嘅時候，黎昕淇嘅食指輕輕一曲勾住陸修然嘅指尖

陸修然明顯咁愣咗一下，然後食指曲起；佢安靜咁凝視黎昕淇嘅睡顏，呢啲畫面係其他人唔會睇到嘅一幕

因為黎昕淇拉住佢嘅手，所以陸修然冇辦法坐直，佢只好小心咁將櫈移過少少再面向書枱，喺離書枱一段短距離嘅位置睇YouTube，人向右邊傾

陸修然又望黎昕淇一眼，確定佢冇因為自己嘅郁動而醒之後，陸修然又郁咗一下，令自己就算側住坐都可以坐得舒服啲，手由始至終都冇鬆開

到咗傍晚嘅時候，黎昕淇嘅手機響起嚟，佢輕皺一下眉頭、緩緩睜開眼坐起身，佢嘅食指仍然扣住陸修然嘅食指，右手拎起手機聽電話





「媽咪？嗯⋯哦⋯好呀⋯咁你OT加油啦⋯拜拜⋯」電話裏頭傳嚟媽媽嘅聲音

「阿姨要開OT？」陸修然聽到黎昕淇講嘅最後一句

「嗯⋯媽咪叫我自己乖乖咁食飯⋯」黎昕淇輕嘆一口氣，語氣都變得軟綿綿嘅佢下一秒抬頭望住陸修然，「你要唔要陪我食飯？」

語氣軟綿綿嘅黎昕淇有啲似人畜無害嘅小白兔，不過可以聽到黎昕淇呢種語氣得兩種情況：一係啱啱瞓醒嘅時候，二係癮起嘅時候

「出去食？」陸修然有啲意外，雙手將黎昕淇拉起，「定你想喺我屋企食？」

「出去食，好唔好？」黎昕淇企穩喺地上

「哦，好呀。」陸修然爽快咁答應咗黎昕淇，黎昕淇聽到之後點點頭，然後番咗屋企換衫





兩人約好6點半喺樓下大堂等，黎昕淇同陸修然一樣戴住cap帽，睇起嚟兩個戴住cap帽嘅人行喺路上有啲引人注目

佢地食嘅餐廳係黎昕淇中意食嘅餐廳，陸修然冇咩所謂，反正佢冇特別中意食嘅餐廳，所以聽黎昕淇嘅話就可以

佢地平時好少一齊出街食飯，因為有啲怕其他人會睇到，所以今日一齊出門口食晚飯都係一種新鮮感

本來一直都冇咩特別，兩人都係睇下手機又講下嘢，但忽然間黎昕淇將頭耷低，仲將cap帽嘅帽檐往下拉擋住自己半塊面

「做咩？」陸修然一臉困惑，然後擰轉頭朝啱啱喺佢地隔離行過嘅兩個女仔望去

「唔好望⋯！」黎昕淇情急之下一手捉住陸修然嘅帽檐阻止佢擰轉頭

「吓⋯？邊個嚟？」陸修然一臉困惑，眼見黎昕淇喺兩個女仔行過嘅時候有啲緊張，但係佢完全唔知嗰兩個人係邊個

「學生會嘅支緩組⋯！」黎昕淇壓住聲線講道，心臟都因為緊張而噗噗跳，偷偷地探頭望一眼，直到見到佢地坐到比較入嘅位置





「你可以鬆開我頂帽未⋯？」陸修然喺見到黎昕淇鬆一口氣嘅表情之後先緩緩開口問道，黎昕淇即刻縮手

「嚇死我⋯」黎昕淇低聲講道，「比佢地見到真係唔洗再解釋，番到去就會變成大新聞⋯」

「出嚟食個飯都變高危活動⋯」陸修然更無奈

佢望一眼自己嘅打扮，又望一眼對面嘅黎昕淇嘅打扮，淨係兩個人都戴cap帽呢一點，比學校嘅人見到已經100%唔洗解釋，完全係地下情先可能有嘅打扮同反應

兩人食完飯就離開餐廳，喺經商場番屋企嘅時候路過一間賣可愛吊飾嘅店，黎昕淇嘅餘光忽然留意到一樣引起佢注意嘅嘢

「呢個公仔好可愛～」黎昕淇直接拉住陸修然行入店內，拎起一個只有手心大嘅小白兔毛公仔吊飾，「好唔好睇？」

「幾好，買囉。」陸修然點點頭附和道





「買一送一。」黎昕淇擰轉頭對陸修然講道，「你要唔要一個？最多我送比你～」

「我地呢個星期都有買一送一優惠～」一個外表生得好甜美嘅女店員走近兩人，「可以揀兩個做情侶吊飾呀～」

黎昕淇愣咗一下，擰轉頭望咗陸修然一眼，唔知點解大家都冇開口否認；黎昕淇一直將公仔捏嚟捏去，雖然價錢唔貴，但都係有啲三心兩意買唔買

「你女朋友睇起嚟好中意～」女店員帶住甜美嘅笑容又追加一句

「你唔要呀？好可愛⋯」黎昕淇撅起嘴，拎住毛公仔望向陸修然

「呃⋯」陸修然有啲猶疑，佢冇理由掛住個咁可愛嘅公仔喺書包，雖然佢的確覺得小白兔幾可愛，「呢個。」




IG Link: https://www.instagram.com/nd_cotttoncandy/?hl=zh-tw