【愛情】如地下情一樣嘅癮，係我對你嘅定義: 40. 劃破

「睇嚟啱啱有人偷食朱古力。」陸修然喺下一秒帶住玩味嘅笑容道

「呃⋯」黎昕淇臉一紅，伸手用指尖遲到咁抹一抹自己嘅嘴角，輕舔嘴唇，「我冇偷食朱古力，我當住楚妍嘅面食⋯」

黎昕淇從裙袋中拎咗一粒朱古力，拆開包裝放入自己嘅口中，陸修然望住佢一個為食樣嘴角不自覺咁向上勾起一個弧度；黎昕淇又再拎咗一粒朱古力出嚟遞比陸修然，陸修然搖搖頭

黎昕淇將包裝紙拆開一半，拎住朱古力放到陸修然嘅嘴邊，陸修然遲疑咁張開口咬住朱古力

「叩叩—」喺聽到敲門聲嘅時候，黎昕淇同陸修然即時分開，陸修然連人帶櫈移番去本來嘅位置





「我⋯嚟拎番啲嘢⋯」鍾樂時推開門，見到陸修然同黎昕淇都喺度嘅時候，即刻有種自己嚟得唔啱時候嘅感覺

陸修然同黎昕淇就好似平時喺大家面前一樣，唔太熟一樣咁相處，坐嘅距離都拉得有啲遠；佢地冇緊張，緊張嘅反而係鍾樂時

鍾樂時有啲尷尬咁行到枱前，感覺自己喺呢個空間有啲多餘，鍾樂時嘅手著急咁翻着枱上嘅一個個file，不時用餘光暗中觀察陸修然同黎昕淇嘅反應同行為，佢愈緊張尷尬，手就愈慌亂，手踭唔小心將放喺枱邊嘅一個紙箱推咗落地

「Sorry呀！黎昕你有冇事呀？」鍾樂時整跌嘅箱落地嘅時候打到黎昕淇嘅腳，紙箱翻側，入面嘅嘢都跌晒出嚟散落一地，「我冇心㗎！」

鍾樂時下意識偷瞄陸修然一眼，一瞄過去就覺得自己犯咗大錯，因為本來一直耷低頭睇緊手機嘅陸修然，喺聽到佢咁講嘅瞬間挺直腰坐起好，而且表情睇起嚟有啲嚴肅





「唔緊要，我執啦，你搵嘢啦。」黎昕淇搖搖頭，彎低腰伸手將散落喺地上嘅紙執好放入箱

「哦⋯唔該黎昕⋯」鍾樂時扁起嘴，唔自在咁點頭，小心翼翼咁轉身繼續搵佢要搵嘅嘢，連動作都唔敢太大

「嘶！」黎昕淇手一縮，手指比紙劃咗一條又幼又長嘅傷口，有少少血滲出嚟

陸修然聽到黎昕淇發出嘅疼痛聲嘅時候即刻輕皺起眉頭，但好快就收起微表情，睇起嚟唔太在乎咁抬頭望一眼又耷低頭睇手機

「你有冇事呀？我執我執！」鍾樂時見黎昕淇嘅指尖比紙劃破，一秒蹲低執好本來放喺紙箱內嘅紙





鍾樂時以飛快嘅速度將散落嘅紙執好，黎昕淇都未嚟得切比反應，鍾樂時已經轉身快速咁掀放喺枱上嘅一大疊file，從中搵到自己嘅file之後匆匆對黎昕淇點頭

「我搵到啦，我走先啦⋯！」鍾樂時匆忙咁轉身，急不及待咁離開會室

「呃⋯做咩突然咁趕⋯？」黎昕淇一頭霧水咁望住閂埋嘅木門，又低頭向自己受傷嘅指尖吹一吹

「手，有冇事？」陸修然朝門口望一眼，然後緩緩開口問嘅同時朝黎昕淇伸手

「有啲痛。」黎昕淇將手直接遞向陸修然，陸修然輕輕拉起黎昕淇嘅手望咗傷口一眼，「又痕又痛⋯」

「我冇膠布喺身。」陸修然將黎昕淇嘅手輕放番喺枱上

「我知。」黎昕淇將手收回，用右手食指指腹掃過傷口，感覺冇咁痛亦冇咁痕，「我又冇期待你拎膠布出嚟。」

「嚇死我啦⋯會長嘅表情都太嚴肅啦掛⋯！」鍾樂時攬住file，另一隻手拍拍自己嘅心口安慰自己，「不過見到佢地一齊，心入面好激動呀～」





放學之後，黎昕淇一如既往咁去到陸修然屋企，黎昕淇set好機、開好電視、插好卡，就等陸修然搞掂

「你快啲去換衫啦，我set好嘢啦。」黎昕淇將手掣從主機上拆緊落嚟

陸修然坐低喺床邊，拉起黎昕淇𠝹到嘅手指，用膠布貼住受傷嘅位置，貼完就直接去換番屋企衫，動作好自然流暢

黎昕淇望住貼咗膠布嘅指尖，有種講唔出嘅感覺凝聚喺心頭，陸修然伸手拎起手掣，餘光見黎昕淇仲摸緊自己嘅指尖

「貼咗膠布就唔好再整佢，今晚沖完涼先換。」陸修然自然咁拉過黎昕淇嘅手，捏一下膠布睇下會唔會太鬆甩出嚟，「甩就應該唔會，但會唔會貼得太實？」

「唔會。」黎昕淇搖搖頭，陸修然偶爾嘅細心的確容易令人心動，但呢種唔自然嘅感覺令黎昕淇縮起手

黎昕淇突然抽手，陸修然愣咗一下，黎昕淇留意到陸修然嘅愕然反應，下意識擔心會唔會令佢有啲受傷





「痛，你仲㩒⋯」黎昕淇搵咗一個最合理嘅解釋，「我怕痛⋯」

「我㩒得咁細力都痛⋯？」陸修然伸手拎起手掣開始遊戲

玩咗幾場，黎昕淇一場都冇贏過，每一次都喺最後要贏嘅時候比陸修然搶先一步到終點，搞到黎昕淇嬲又唔係、唔嬲又唔係，但一定係唔忿氣

「喂呀⋯！你又贏⋯！」黎昕淇喺陸修然到咗終點之後，終於忍唔住抱怨起嚟，「你次次都喺我衝線先爬頭⋯！」

「你自己撞落牆，唔通我到終點前面唔衝線？」陸修然覺得自己有啲無辜，贏咗都比人埋怨，「喂！」

黎昕淇伸手捏咗陸修然嘅腰一下，陸修然怕痕，反射動作令佢直接一秒縮開；黎昕淇見陸修然咁大反應，即刻露出調皮嘅笑容，好似捉到陸修然嘅弱點一樣，今次伸手捏陸修然嘅右腰

「喂！」陸修然即刻縮咗起櫈嘅左邊側身避開黎昕淇，右手捉住黎昕淇嘅左手手腕，先擋住黎昕淇嘅攻擊，「冷靜少少⋯」

「你贏太多啦。」黎昕淇抱怨道





「呢個都可以賴我？」陸修然慢慢回氣，啱啱比黎昕淇整一整，心跳都快一倍一樣

「喂！陸修然！」黎昕淇見陸修然坐定就鬆懈咗，喺毫無防備之下比陸修然捏咗腰一下

黎昕淇即刻彈咗一下，然後向後縮，黎昕淇一搵到空位可以乘虛而入即刻捏陸修然嘅腰，但陸修然眼明手快，早一步已經扣住咗黎昕淇嘅手腕；但陸修然一鬆開手，黎昕淇又即刻調皮咁捏咗陸修然嘅腰一下

「喂！哈哈！黎昕淇！」陸修然坐喺床邊一直想避開黎昕淇，於是直接雙手捉住黎昕淇嘅手腕，感覺腰間都係火辣辣一樣

黎昕淇嘅雙手一被扣住，即刻乖巧咁坐喺床上定睛望住陸修然，陸修然調節好呼吸，比黎昕淇吱咗一下，呼吸都即刻打亂晒

「你又要互相傷害係唔係⋯？」陸修然一隻手扣住咗黎昕淇嘅雙手，另一隻手騰空咗出嚟，黎昕淇已經開始向後縮








IG Link: https://www.instagram.com/nd_cotttoncandy/?hl=zh-tw