【愛情】如地下情一樣嘅癮，係我對你嘅定義: 37. 知情者

「楚妍，楚妍！」黎昕淇蹲喺宋楚妍嘅枱邊，捉住宋楚妍嘅膊頭搖咗兩下，「宋楚妍！」

「嗯⋯」宋楚妍睡眼惺忪咁坐起身

「落堂啦⋯你要醒未呀？」黎昕淇無奈咁問道

「醒啦，食嘢，行啦⋯」宋楚妍望一眼黑板旁嘅時鐘，然後企起身

「淨係識食⋯」黎昕淇起身跟喺宋楚妍身後





黎昕淇同宋楚妍企喺小食部一邊食嘢，小息好多人會衝落小食部買嘢食，所以通常都會好逼

「宋楚妍瞓醒啦？」江清懿同蘇序然走近兩人，「你瞓咗成堂啦宋小姐～」

「真係好眼瞓，唔同你講笑⋯呵～欠⋯」宋楚妍打咗個大喊露

「唔好對住人打喊露，會傳染⋯」蘇序然跟住一齊打咗個喊露，本來有啲乾澀嘅雙眼即刻變得濕潤起嚟，「你係溫書溫到唔瞓覺，定係睇手機睇到唔瞓覺？」

「咁應該係睇手機。」黎昕淇望住宋楚妍連食嘢都就嚟瞓著一樣嘅眼瞓樣道





「你食得咁快嘅⋯」宋楚妍望住黎昕淇拎喺手上對摺再打結嘅膠袋訝異道

「我冇瞓住食⋯」黎昕淇搖搖頭，轉身行去掉垃圾之後，直接行去買嘢飲

「哐、哐—」黎昕淇將散銀入落嘢飲機，入咗兩個兩蚊之後忽然間有人行到佢隔離

「想點？」黎昕淇一抬頭就見到江清懿成個高大嘅人影企喺佢隔離，「你買嘢飲？」

「嗯，你請？」江清懿喺褲袋拎咗幾個兩蚊出嚟





「唔要。」黎昕淇毫不猶疑咁拒絕，「你都拎咗錢出嚟啦。」

「咁我收番先。」江清懿笑道

「拜拜～」黎昕淇微笑道，不過佢冇真係行開，只係企喺江清懿隔離等佢揀埋嘢飲先，「上次嗰間珍珠奶茶幾好飲，餐廳樓下新開嗰間。」

「我覺得如果嗌少糖係okay嘅。」江清懿仍然猶疑緊揀咩嘢飲好，順手就將前臂搭喺黎昕淇嘅膊頭上，「飲咩好呀黎昕？」

「咖啡囉，陣間英文堂，你會瞓著。」黎昕淇指一指喺角落位置嘅罐裝咖啡

「會長你去邊？」莫淮禮喺陸修然企起身嘅時候問道

「買嘢飲，你洗唔洗？」陸修然順手咁將校呔順一順

「我唔啦，你去啦。」莫淮禮搖搖頭，佢最近決定要健康啲，飲多啲水





「點呀，你諗到飲咩未⋯」黎昕淇無奈咁問，「企咗成分鐘啦⋯」

陸修然企喺黎昕淇同江清懿身後，望住眼前兩個人企喺度三心兩意咁揀嘢飲

「嗨～會長～」鍾樂時啱啱好同朋友買完嘢食，順便過嚟買埋嘢飲先番課室

「嗨。」陸修然帶住平日喺學校先有嘅微笑，微微點一點頭

鍾樂時一擰去前面就見到江清懿同黎昕淇，視線一眼就落喺搭住喺黎昕淇膊頭嘅手上

「你做咩搭住黎昕膊頭呀！？」鍾樂時立馬將江清懿嘅手從黎昕淇嘅膊頭上抬番落嚟，心入面緊張咁道：「會長喺度呀！你唔好亂掂人啦江清懿！」

經過前一排聽到嘅大新聞之後，陸修然同黎昕淇喺鍾樂時眼中已經係一對，江清懿將手當住人地男朋友嘅面搭喺人地女朋友嘅膊頭上面，點睇都唔恰當





「都係，你嘅身高符合啲。」江清懿行到比黎昕淇矮一截嘅鍾樂時隔離，前臂直接搭喺鍾樂時嘅膊頭上

「喂呀！」鍾樂時即刻推開江清懿嘅手，「你又恰我！我陣間就去話比鍾安而聽！」

「講囉。」江清懿微微頷首，因為呢招係鍾樂時常用嘅招數，不過效用唔大

黎昕淇趁江清懿同鍾樂時講緊嘢，伸手從江清懿手中拎走咗幾個兩蚊，直接幫江清懿㩒咗罐咖啡

「咖啡。」黎昕淇將罐裝咖啡遞比江清懿

「嘩，唔該晒⋯」江清懿無言以對咁接過罐裝咖啡，「我本來就冇打算飲咖啡嘅⋯」

「你諗咗成分鐘啦，阻住會長同樂時。」黎昕淇望一眼陸修然回答道

「多謝你嘅體貼⋯」江清懿無奈咁望住黎昕淇，同黎昕淇一齊番去搵宋楚妍同蘇序然





鍾樂時望住行遠嘅兩人，默默咁擰轉頭觀察陸修然嘅表情，眼見陸修然好似冇咩大反應，佢暗自鬆一口氣

「好彩我地會長大人有大量⋯」鍾樂時喺心裏慨嘆同時，陸修然買完嘢飲，喺行開前對鍾樂時微笑一下，「果然會長係值得大家仰慕嘅人⋯！」

陸修然買完嘢飲嘅時候，莫灘禮食完嘢起身，等同陸修然滙合就番課室

「行啦。」陸修然對莫淮禮講道，喺走嘅時候下意識一樣回頭朝黎昕淇望咗一眼

企喺宋楚妍同江清懿之間嘅黎昕淇好似察覺到啲咩一樣，將視線朝住佢直覺所指嘅方向望去

陸修然喺同黎昕淇對上視線之後就將視線移開，黎昕淇亦同樣地若無其事繼續同宋楚妍講嘢

「我啱啱睇到嘅完全係地下情嘅狀態⋯！」啱啱嘅一幕咁啱比鍾樂時睇到，鍾樂時嘅內心好激動，「點解以前我發現唔到？」





知道咗其他人唔知道嘅秘密，兩人嘅小互動喺佢眼中都係一個又一個地下情嘅證據，至少喺鐘樂時眼中的確係咁樣

⋯

「咔—」鍾樂時推開屋企嘅大門，企喺門前嘅地毯上直接踩住鞋踭將皮鞋除落嚟

「仲係晏晝就食雪糕⋯」鍾樂時一行入廚房就見到江清懿企喺洗手盆前面食緊雪糕

「你陣間唔好出嚟拎雪糕食。」江清懿一副睇穿鍾樂時嘅模樣

「等陣，你食緊嗰杯係咩⋯？」鍾樂時認真望住江清懿手上嘅雪糕，一秒就衝入廚房捉住江清懿嘅手腕，「喂呀！江清懿！你食咗我嗰杯特濃朱古力呀！」

「雪櫃仲有杯。」江清懿舉高自己手上嘅雪糕，怕鍾樂時搶一樣，不過鍾樂時大概就算跳起都唔會拎到，「我媽買咗四杯，你食咗兩個啦！」

鍾樂時拎住書包衝咗番房，好快咁換咗屋企衫出嚟小跑到廚房，江清懿望住鍾樂時跑到雪櫃前面，打開冰箱拎咗最後一杯嘅特濃朱古力

「啱啱邊個話我仲係晏晝就食雪糕⋯」江清懿將雪糕杯入面嘅雪糕刮乾淨放入口食埋，「宜家邊個又食緊雪糕？」

「怕你今晚食完飯食埋最後嗰杯⋯！」鍾樂時掀開膠蓋，但係撕唔開入面塊膠膜，鍾樂時第一時間將雪糕遞到江清懿面前，「開唔到。」

「有得比你食都食唔到⋯」江清懿將手上嘅空杯掉入垃圾桶，咬住匙羹，接過鍾樂時嘅雪糕，直接撕開上面嘅膠膜

「佢痴到好實嘛！」鍾樂時喺江清懿一撕開膠膜嘅時候，即刻將雪糕從江清懿手上拎走，怕江清懿會偷食佢嘅雪糕，「唔該晒～」

鍾樂時拎住雪糕行出廳，江清懿行到梳化坐喺靠窗嘅一邊睇手機，平日放學之後屋企都係咁安靜，佢地喺屋企通常都係各自喺房，就算喺廳都好少會開電視

鍾樂時坐近江清懿，見江清懿睇緊手機，即刻坐直個人偷偷地望一眼

「你同黎昕好熟㗎？」鍾樂時問道




IG Link: https://www.instagram.com/nd_cotttoncandy/?hl=zh-tw