一場公司飯局，我們的命運從此改寫: 第六章：暫時放開懷抱

(第六章：暫時放開懷抱)
 
My name is Bond,
身穿英國晚禮服的樂仔展示出充滿魅力的微笑，好有型咁介紹自己：
James Bond.
 
我唯一有印象睇過既《零零七》電影，係二零一二年由丹尼爾‧克雷格主演既《Skyfall》。但即使係丹尼爾‧克雷格所擁有既裝備，都只不過係手槍同埋微型無線電通訊器，然而樂仔表面上平平無奇，原來一直都帶住一支高科技筆型麻醉槍……
 
唔通大學Fresh Grad只係樂仔既表面身份，真正既樂仔，其實係中國政府派駐香港既特務？
 




無幾耐之前，我哋成team人重係好開心咁享受Happy Friday，點知過左都無一個月，又有人消失、又罪、又有人死、又特務……
 
到底我係咪活在一個Matrix裏面，咁啱個程式short左，搞到我近期既生活受到咁大既衝擊？
 
我決定暫時放開懷抱，今日同Amy一齊出去散下心。
 
我哋喺朗豪坊UA睇完戲之後周圍搵嘢食，Amy話想食牛昇，我心諗：唔係掛……
 
「不如食千両啦。」
 




「你唔係中意食牛昇咩？之前你話做左會員吖嘛。」
 
「總之今期唔係好想食……」
 
「咁去食涮涮鍋囉，」Amy說。「我記得你話過Kabu Club會員有折咋。」
 
「不如近近哋食Beerliner啦。」
 
「我無所謂呀。」她說。
 




我哋喺Beerliner食飯，叫左例牌既德國豬手、雜腸拼盤同埋pizza。
 
「BB，咁你依家隊team有無問題呀？」
 
「無啦，其實最緊要係Felix同我啫，再加多個Jason或者TT就可以頂得住。」
 
「Jason唔係話諗住走咩？」
 
「條友前排想考政府工，但依家都無晒聲氣，我估考唔到掛，」我一邊切腸一邊說。「嘩，咁你都記得Jason想走嘅？」
 
「下，我記得呀。」
 
「黎緊郭Sir又話要去泰國旅行，其實佢依家都唔會點理嘢，好多嘢都扔晒畀我哋做。」
 
「BB，不如我哋都搵時間去泰國玩下囉。」




 
「好呀，你想去泰國邊度吖？」
 
「你話事啦。」
 
「布吉好唔好？都係去hea返幾日啫。」
 
「好吖BB，我就係想去布吉啦。」
 
「但最快都要下個月先，」我說。「因為唔可以要Felix一個咩起晒d嘢，我要同佢夾一夾時間。」
 
我哋食完飯行左出朗豪坊。我同Amy第一次kiss既地方，就係喺朗豪坊門口對出既雕塑附近。
 
雖然成條街都係人，但我哋有時行過，都會停低kiss下，可能我哋就係鍾意喺人潮之中kiss既感覺。
 




（震動）
 
「唔好理佢啦！」
 
「可能係W商人。」
 
我同Amy在街上接吻到咁上下，突然收到來電，一睇，原來係一個不明來歷既電話號碼。
 
「屌！邊撚個呀？」我罵了一句，然後按下接聽鍵。
 
「喂？」對方說。「你好，請問係咪梁先生呀？」
 
「係呀，咩事呀？」
 
「梁先生，你好呀，我係瓊華中心牛昇既經理。」




 
下？我心中不禁打了個突。
 
「你哋上個月咪黎過我哋度食嘢嘅，咁嗰日……你哋其中一位失左蹤。」對方說。「其實關於依單嘢，我有啲事想搵你講下，或者你方唔方便，可以搵個時間上黎我哋餐廳傾兩句？」
 
(第六章完)