[農曆七月應節故] 校園鬼故事 - 紅衣女孩: （十六）

接下來的每一天，堅叔和堅嬸也會到醫院探望小詠。
堅叔每次也會較堅嬸早大約半小時來到醫院，而堅嬸則會利用這些時間煲些湯水或飲料，帶來給小詠。
每次來到，不論他們對小詠說些甚麼，小詠也只是呆呆的看著前方，不知道在注視著甚麼。
而學校那邊，仍是每天嘗試致電給小詠的母親，同樣地，也沒有任何消息。
 
至於另外三名學生，由於已經踏入試後活動，學校對學生的管制也會比較放鬆，再加上他們也經歷了物理室事件，所以他們都不約而同的向學校請了假。聽說他們的家長都分別帶他們去了旅行散心，好讓他們忘記事情的經過。
 
至於那幾名家，為甚麼會放棄追究學校，聞說是因為那三名學生，要求他們如此做的。而且三人也分別對事情裝作忘記了，整件事情的問號愈來愈多。
 
但思想單純的堅叔堅嬸沒有想得這麼深入，他們只是憑著小小的同情心，希望小詠能重返正常生活。




 
不知道是否上天感到堅叔和堅嬸的誠意，還是小詠終於把他們的話語聽進耳內，又一個星期後，醫院早上便致電給學校，告訴他們，小詠的精神狀態好了，不論記憶，或是各種能力都恢復正常了。
知道消息後，堅叔、堅嬸、校長和社工再次出發到醫院。
 
堅叔來到醫院，立刻大叫：「小詠！」
一名護士提醒道：「唔好意思，醫院裏面請保持安靜！」
堅嬸：「唔好意思，我地唔會再亂嗌架啦，唔好意思！死佬你想嘈親其他人咩，仲唔講對唔住。」
堅叔：「對唔住囉，超！」
校長：「堅嬸你唔好怪阿堅啦，佢都係緊張小詠者，哈哈！」
堅嬸：「失禮晒校長啦，哈哈。」




堅叔：「醫生同小詠係前面呀，我地快Ｄ過去啦。」
 
只見醫生正在和小詠談話，看來是在問診吧。
當我們行近的時候，堅叔察覺到小詠的眼神，好像有一點古怪，但瞬間卻又變回原來的樣子，是錯覺？還是……
校長：「醫生你好，我地係小詠嘅老師，因為仲未聯絡到監護人，所以我地黎睇下佢情況先。」
醫生：「嗯，護士同我講過個情況架啦。或者我地去辦公室再講啦。」
 
校長：「小詠情況點樣？」
 
醫生：「嗯，其實之前都同你地講過，病人身體上實際已經完全康復，至於精神狀態方面。真係好神奇，上星期明連單字也說不出來，而且理解能力方面同嬰兒無乜分別。但到今朝，佢突然有意識地叫我地聯絡學校，話佢已經無事，而且經過測試，佢精神狀態回復正常水平。我地都解釋唔到。」




 
堅叔：「咁……咁係咪者係，佢已經好返晒？」
 
醫生：「可以話好得七七八八，但有無其他後遺症，就要繼續觀察先知道。我地建議佢每星期都返黎醫院做檢查，等我地可以跟進返個情況。由於我地聯絡唔到佢嘅監護人，所以暫時黎講，佢只能繼續留係醫院。」
 
校長：「我地明白，但因為暫時無辨法聯絡到監護人，而小詠都無其他親戚，呢方面學校已經同社署方面有聯絡，呢位將會係負責嘅社工，之後佢會同醫院繼續保持聯繫。」
 
醫生：「嗯，無問題。另外有件事都想你地幫手，係你地黎之前，我地同小詠做左Ｄ測試，發現佢唔記得晒入院當日嘅野，我地懷疑佢有短暫或局部失憶的情況。所以再問左一Ｄ佢自己的個人資料，同埋佢係學校嘅事，睇下佢有無記憶混亂嘅情況出現。呢度有一Ｄ佢講嘅資料，麻煩你地幫手對下佢講嘅資料。」
 
於是他們花了大約十分鐘左右，經過核實，證實小詠的記憶無誤，初步鑑定小詠係短暫或局部失憶，但不影響佢日常生活和自理能力。
餘下的，便是找到她的母親，那樣小詠便可重新回到正常的生活。
在離開醫院之前，我們和小詠聊了一會兒。
堅叔發現，小詠大部分記憶正常，唯獨是碟仙和入院兩天的記憶沒有了。
可能是鬼上身後的後遺症吧。
 




在臨走的時候，堅叔和堅嬸就像小詠的爸爸媽媽一樣，在囑咐著女兒似的。
堅叔：「你記住呀，如果覺得凍或者唔舒服，要記住叫姑娘呀，佢地會幫你架。仲有呀，如果肚餓嘅話呢，飲下水先啦，我同堅嬸會再煲湯過黎，下次會帶埋餅乾過黎架啦，仲有呀……」
堅嬸打斷了堅叔：「好啦，唔好咁長氣啦，小詠都要休息架啦。小詠，你好好抖下啦，唔駛擔心，所有野都會好架啦。」
小詠：「嗯，知道啦，一切都完了，我會好好照顧自己架啦。」
 
說完後，他們數人便離開醫院了。
不知是否心理作用，堅叔剛才又發現小詠眼神轉變了，但時間很短，大慨一秒鐘也沒有，應該是錯覺吧。
 
正當堅叔想著剛才的畫面，校長卻突然拍了拍他的膊頭：「阿堅，你真係對小詠好好喎，就好似對自己Ｄ仔女咁好。」
堅叔：「嗯，可能啦，小詠太可憐啦，令人不知不覺間會想照顧佢。係喎，校長，咁小詠媽媽果邊點呀，有無消息呀？」
校長搖了搖頭，堅叔嘆了一口氣：「希望盡快搵返佢媽媽啦。」
校長：「我相信聽日會有消息架啦！」
 
眾人離開後，小詠從醫院看著他們離開，然後口裏喃喃自語：「一切都完了，一切都完了。」
無錯，雖然仍然沒有任何人發現，但明天的到來，亦將為這事件帶來一個終結，一切都完了。