[農曆七月應節故] 校園鬼故事 - 紅衣女孩: （十五）

翌日下午，堅叔接受了醫院的詳細檢查後，便跟警察落了口供。
內容和堅嬸交代的相差無幾，同樣的都省略了鬧鬼的部份，而警察在落完口供後，便跟其他幾位學生進行筆錄。
這令堅叔有點擔心，因為他實在控制不了他們會說甚麼。
 
堅叔在病床上偷偷的窺看著他們，但奇怪的是，警察花不了五分鐘，便完成了筆錄，轉而向校長和堅嬸說話，這令堅叔感到非常在意。
好不容易等到警察離開，校長和堅嬸走向堅叔的病床。
 
校長：「阿堅，點呀？好Ｄ未？」
堅叔馬上坐直身子，看起來有點緊張：「呀，校長你好，我好好多，無咩事啦！」
校長:：「嗯，咁就好啦，你放心啦，堅嬸同我講左個情況，我幫你同堅嬸請左假架啦，好好休息下。其他野返到學校再講啦！」




堅叔：「哦，好呀，我會盡快返學校架啦。」
校長：「得架啦，總之休息好先，咩都唔駛擔心。我都要返學校啦，都要同班老師講返，等佢地安心。阿堅，堅嬸，咁我走先啦！」
堅叔堅嬸：「好，咁再見啦。」
 
待校長離開後，堅叔再問堅嬸現在是甚麼情況。
堅嬸：「得啦得啦，知你心急想知啦，你訓返低先，我慢慢講你聽。」
堅叔：「我見你同校長聽完個差佬講野之後，成個人輕鬆晒喎。」
堅嬸：「係呀，因為岩岩Ｄ差佬話，果幾個學生話除左想制止小詠自殘之外，就咩都唔記得啦，而佢地幾個嘅家長，都話佢地唔追究啦，所以基本上已經唔會有咩問題。由於成件事唔涉及刑事，初步醫生都話小詠Ｄ傷口，經過檢驗，都似係自殘造成多過俾人襲擊。所以我同校長聽完之後，都安心左好多。」
堅叔：「哦，唔怪得你兩個成個人鬆晒啦。」
堅嬸：「係呀，同埋校長都好好人，又或者可能我同佢都係女人，佢今朝仲安慰我叫我放心，佢信我講嘅野，又話會安排我地放假直到好返為止。」




 
堅叔：「咁就好啦，不過點解果幾隻怪獸會突然唔追究嘅？」
堅嬸笑了出來：「唔好咁衰叫人怪獸啦，人地都係緊張Ｄ仔女者。不過我都覺得奇怪，佢地兩日嘅變化真係幾大，佢地見完自己Ｄ仔女之後就好似咩事都無發生咁。不過算啦，無事咪好囉，唔好理咁多野啦。」
堅叔：「都係嘅，無事就最好。咁......小詠呢？佢醒返未？同埋搵到佢媽媽未？」
堅嬸：「小詠佢仲未醒呀，同埋都未搵到佢媽媽。頭先校長咁急要走，其中一樣就係要處理小詠嘅事，可能要去佢屋企試下搵佢家長。」
 
堅叔：「唉，希望搵到佢媽媽啦，其實小詠同果隻女鬼都好慘。」
堅嬸：「你講咩話？你點知小詠慘架？同埋女鬼好慘又係咩一回事？」
於是堅叔將自己的「夢境」一五一十的告訴堅嬸。
 




堅嬸：「原來係咁，唉，估唔到原本只係一個玩笑，結果搞到小詠咁樣。不過小敏走左，者係話學校應該唔會再發生Ｄ咩古怪事，咁都叫做好事黎嘅。」
堅叔：「係啦，希望一切都完了。」
 
事情過了大約一星期。
堅叔堅嬸和那幾位學生，已經如常的回到學校。
由於家長沒有追究，警察也結束了調查，事件並沒有引起太大的麻煩。
看似一切都回復正常，但有兩件事仍然未能解決。
第一：還沒有找到小詠的媽媽，經過探訪後，附近的鄰居證實，小詠的媽媽似乎這一個星期也沒有回家。
第二：小詠仍然昏迷，醫生說她身體機能其實已經恢復正常，亦沒有甚麼異常的病徵，初步也未能估計何時會清醒過來。
 
堅叔則相信，小詠陷於昏迷，是因為她被鬼上身的期間，接收了太多不好的影像，令她不想清醒過來。
所以堅叔和堅嬸每天放學後，也會來到和小詠說話，希望能幫助她清醒過來。
 
又過了一個星期，醫院致電學校，小詠終於清醒了，但聯不到她的家人，只好致電學校。
由於沒有監護人，校長只好和社工一起到醫院。




堅叔和堅嬸亦一同前往。
到了醫院後，他們總算見到小詠，此刻她正坐在床上，給醫生檢查著。
待檢查完畢，醫生便跟他們交待小詠的情況。
 
都是那些老土的說話吧，甚麼剛剛醒來，可能神志不太清醒。
可能有部分記憶混亂，可能要多些時間才能回復。
總括來說，就是小詠現在還沒有完全康復，說話，記憶和認知能力可能都受到影響，原因嘛？據醫生所說，可能是受驚過度或受傷時間過長，痛楚導致記憶混亂等等。
怎樣也好，就是說，小詠現在還需要留院觀察，未能出院，若情況有變，會馬上通知學校云云。
 
堅叔離遠看著小詠，看見她兩眼目光散渙，神情呆滯，真的令他心痛不已。
而醫生判斷小詠暫時不適合接觸其他人，所以暸解情況後，他們一行四人便離開醫院了。