《我獲得一個願望，我選擇左係學校做一次男神》: 第七十一章：英雄救美

「嗯，煮得唔錯喎。」

「下，得唔錯咋。」

「呵，下次比你見識下大廚既威力啦。」

「好，咁下次要你落廚架啦。」

「唔得喎。」





「下？點解啊。」

「煮飯就得，但係買餸呢，就要揾人幫我買啦。」我都估到天蕊架啦，算，難得有口福，做一陣工人怕咩。

「好，幫你買咪幫你買。」

「你話架，到時我就係屋企等你，你就乖乖地買餸啦。」天蕊幾時變得咁公主...







「啊，飽晒。」

「想唔想食甜品？」

「想啊！知我心莫阿明也。」天蕊即刻衝過黎錫左我塊面一啖，搞到我成面都係醬汁。

「喂啊，你未抹嘴架。」

「而家咪抹左囉，嘻嘻。」





「行啦，遲早食肥你。」




落到街，都係得８點幾，甜品鋪都未算多人，我地求其揾左間就入左去，入到去先知，芊雪係到返工。

「咦，阿明？」

「芊雪？」

「你女朋友啊？」

「係啊，佢叫天蕊啊。」





「哦，你好啊，我叫芊雪，叫我阿雪得架啦，我係阿明大學同學。」

「你地有無拍過拖？」

靜左幾秒，芊雪先能夠開腔回答。

「無，我地係好朋友。」其實，我地曾經係最曖昧既一對，但係而家係唔係好朋友，就...

「好啦，坐低先啦。」天蕊好似係到審犯咁，搞到氣氛好奇怪，唯有叫佢坐低先，再慢慢傾。



「你想食咩啊？」

「我要呢個。」





填天蕊指住既係一個情侶套餐，個名又係肉麻到無人有，不過我諗食完會更加甜蜜。

「唔該，我地想要個情侶套餐。」

「唔好意思啊，我地情侶套餐賣晒。」真係搞笑，情侶套餐都會賣晒。

「咁啊，我要個芒果...」




我地都獨自叫左個甜品，而家先知道天蕊係好鍾意食芒果，我都比埋我個份佢，見佢食得咁開心，又有咩所謂。

「正！」





「抹嘴啦，肥妹。」

「比你講多次！」天蕊開始哄埋黎，聰明既我攞住張紙巾，抹落佢個嘴到。

「喂啊，細力啲啦，痛啊。」

「係啦，小妹妹。」

「邊個係小妹妹啊而家！」佢一口咬我落隻手到，好彩我肉厚，但係就比佢咬左個牙印出黎。

「怕左你啦，自己抹啦。」其實一兩日前，見到呢個女仔覺得佢好冷酷，文靜，但係熟左，又好似兩個人咁，有啲稚氣，公主既感覺，但係呢個係我原本尋找既目的咩？








「使唔使我送你返屋企？」出到甜品鋪外面，人影都無個，都幾恐怖下。

「唔使啦，我呢到有小巴直接返去北角。」

「係咪架，唔好呃我喎，到時又罵我唔送你返屋企。」

「你覺得我似啲咁既人咩！」

「唔係，咁我送你去搭車啦。」為左掩蓋天蕊既脾氣，我錫左佢壓頭一下，我諗佢唔會再話我掛。

「嗯。」




送完天蕊走，我都有啲攰，但係點都要行返屋企，途中經過啲酒吧，啲人仲係咁撩我入去，雖然今晚有波睇，但係為左訓覺呢樣奢侈品，我都係早啲歸家，然後享受我既甜夢。

「喂啊，唔好摸我啦。」係其中一間酒吧，我聽到一把女仔聲，就係前面個間既門口，我見到藍楠。

「喂，你做咩！」

「咦，阿明？」

「你邊位啊？係咪欠打？」同我講野既係一位有紋身，體型彪悍既光頭大叔，但係後面就有三四個人係到，唔知係咪要打我呢？

「我係佢女朋友。」

「呵，你呢個男朋友真係好人，叫自己條女黎做啤酒妹，仲要係到嫌三嫌四。」

「我...我無叫佢黎做啤酒妹！」

「但係我而家就要帶佢返屋企！」

「你？憑咩啊，佢而家係我地手上，就算你係佢老豆都唔會比返你。」

「藍楠，你講，你係咪我女朋友。」

「嗯。」藍楠一身啤酒妹既制服，雙手被纏放係身後，個樣真係好痛苦咁；我唔明白，藍楠唔係咖啡妹咋咩，點解會做埋啤酒妹架。

「咁又點啊，佢係我既，我想點就點！」見光頭大叔再用力扯藍楠雙手，藍楠露出更痛苦既表情，連淚水都忍唔住走出黎。




「啊！」我一腳踢開大叔，佢亦抵受唔住突如其來既攻擊，差啲跌左係地下，好彩佢班兄弟托一托住佢。

「哈，原來你都只係咁不堪一擊。」我亦順利從大叔手上奪回藍楠，藍楠亦都吐左一口氣，睇黎返黎我身邊，都會令佢感到安全感。

「你條友咁得戚，搶我女人仲要踢我？兄弟上！」情況不妙，我拖住藍楠起跑，一直跑，一直跑，但係佢地依然係窮追不捨，我亦跑到入去後巷，但係前面係一個死胡同。

「藍楠，你走先，我抱你上去，你快啲搭車離開呢到！」

「唔得，我唔可以掉低你唔理。」

「聽話，走，遲啲我再揾你。」

我無理會藍楠有無回答我，我雙手抱起藍楠，經過石牆，佢亦自己輕鬆跳左落去。

同時，佢地亦都黎到死胡同，準備拆我骨。

「黎啦，要砍要殺，任君處置。」

「兄弟，上！」

最後，個四個兄弟，都比我踢晒落地下，踢波真係有好處，腳力大增，打交都方便啲。

「點啊？你係咪都想同一下場？」

佢腳步慢慢向後移，轉身就成支箭咁飛走左。