《我獲得一個願望，我選擇左係學校做一次男神》: 第六十九章：熱吻

「講咩啊你。」天蕊塊面變得更紅，更怕羞。

「我話，我將會係你人生既男主角。」

「好熱啊，呼。」天蕊細細聲咁講，但係仍然比我聽到。

「無辦法，我既存在只會令人你熱，更興奮。」

我地互相對望，發現天蕊對眼都好靚，係啡色，亦我係最鍾意既顏色。





「我唔明你講咩喎。」天蕊講野既時候，我感受到佢既熱氣，講呢句野既時候，我更加感受到佢對我既挑逗。

「唔明？哈，你而家就會明。」

我望住佢對眼，將身體哄得更近，最後，雙唇接合，舌頭更不自覺咁吞吐，天蕊亦都好配合，如此熱吻，融化了雙方既心。




錫左成差唔多十分鐘，我輕輕撫摸佢鏡髮後，再錫佢壓頭一口，等佢感受到我愛，並唔係停留於十分鐘而已。





「今晚...」

「今晚，其實都唔係好凍啫。」我打斷天蕊既說話，費事佢講完，會令我傷心。

「今晚，多謝你。」

「多謝我？」

「係，從來都無人咁樣對我，同你一齊，我感覺到溫暖，感覺到一份獨特既愛。」本來天蕊望住腳下既大海，又再次望返住我。





「你終於都感受我比你既愛啦咩？」

「喂啊，人哋同你講緊正經野，你就係到搞笑，哼。」天蕊此時散發出佢既傻氣，但係都幾得意啊。

「唔好嬲啦，你嬲我我跳海架啦，你人生裡面既男主角又死架啦。」

「唔好！唔得，阿明唔可以死！」個傻妹咁快就真係當左我係佢人生裡面既男主角。

「咁你仲嬲唔嬲？」

「唔嬲啦，你唔好跳海啊。」我地既對話，好似比左一種初戀既感覺我，雖然帶有稚氣，但係有純真既愛。

「咁你比唔比我做你人生裡面既男主角？」





呢句話停留左空氣兩秒，佢先肯回答我。

「你就係我人生所預定既王子，所捉住既流星，多謝你，等我可以將幸福留係身邊。」

「文青真係文青，不過，我鍾意。」

「嘻嘻。」

我地無再熱吻，只係拖住手，離開海旁，好似普通既情侶一樣，享受一下最簡單，最純潔既一段愛情故事。

去到銅鑼灣最熱鬧既街上，手拖手，我第一次為到有女朋友而感到榮耀，因為係我倆身上，揾唔到任何雜質，會影響到我同天蕊既愛情。

「係呢，點解你又會鍾意我既？」呢個問題，我已經想問好耐，雖然我地既愛情黎得好快，但係好合拍，好合時機，根本就係為我地而且既一場愛情故事咁。

「當你第一次撩我傾計，我就好似已經觸電咁；你知唔知啊，我個陣好想你撩我傾計架，點不知你真係會同我傾計，你知啦，我平時個樣咁酷，無陌生人會夠膽撩我架，你仲要好sweet咁送左杯有愛既Mocha比我飲。」其實講咁耐，咪都只一見鍾情，呵。





「天蕊啊，你對我地既愛情有無信心啊？」

「有，只要故事一日存在，劇本仍然存在，主角都要繼續努力做好場戲，好好維護場愛情。」愛情可能真係只係一場戲，要比好多心機，愛落去，但係當一方已經攰透，只憑一方去維持既時候，場戲仲有無得做落去？

「多謝你，我地只要活在當下，每一日都係我地最後既一日，我地就能夠成就一場無與倫比既愛情。」




最後，我都送左天蕊返屋企，原來我連佢住邊到都未知，我亦為左呢個女仔，而出賣我既底線，就係拍拖過程先去認識一個人，從前我只會好好認識一個女仔，先會去愛上，但係而家，對於我黎講，點樣開始都唔係問題，問題只係在於點樣完結。

「返到屋企未啊？」天蕊都會問下我既行踪，睇下我返左屋企未。

「返到啦，準備沖涼啦。」





「咁就乖啦，你早啲訓啦，我今晚要挨夜趕工啊。」

「下？咁夜都要做野？咁咪攰死你囉。」

「係啊，無辦法啦，你唔洗陪我架啦，費事你聽日都無精神上堂啦。」

「你唔好成日顧住人啦，傻妹，你自己呢？成日要人擔心你。」我打左個嬲嬲表情符號比佢，希望佢可以知道我幾擔心佢啦。

「知啦，我應承你，一做完野就訓覺啦，好無？」

「好啦，咁我沖涼先啦。」我送左個錫錫表情符號比佢，好耐無咁樣同一個女仔whatsapp，好有戀愛既感覺。

「嗯，早抖。」天蕊都送左個錫錫既表情符號比我，雖然只係熒幕上既符號，但係我，卻深深感受到個份愛意。








一場好似好虛幻，好童話既愛情故事，係銅鑼灣既海旁誕生，但係我相信愛情就係咁，每一日都只要當作係最後一日，就可以活出一場無與倫比既愛情。