《我獲得一個願望，我選擇左係學校做一次男神》: 第五十九章：身影

「機場？」

「係啊，係咪唔得啊。」

「得，只係想話比你知塞車塞到聽朝都唔知去唔去到啫。」

「下？」唔係掛，我唔會好似啲電視劇咁落車跑去機場架；其實啲男主角都幾犀利，落車跑過去都成個鐘，肯定係馬拉松選手。

「係啊，呃你做咩，嗱，一係你而家落車我都唔收你錢啦。」當我躊躇緊既時候，又有人打電話黎。





「阿明，你仲未去到機場啊？人哋就黎走啦，你係咪真係唔想見穎心最後一面啊。」點解男班長變到咁苦口婆心...

「大佬，而家前面塞車，我都唔想架。」

「塞車？跑啦，塞車就唔洗跑架啦？」你唔係講笑下話？雖然我而家係青馬大橋啫，我估現實中都唔會有人真係係馬路跑去機場掛。

「跑？...你都傻既，我先唔會同你顛。」

「你真係唔跑，穎心就永遠都唔會出現係你面前架啦。」又用呢招逼我...






穎心，等我。


我一直跑，一直無視身邊既野，即使要係好多車身邊左穿右插，我都在所不辭，因為我個心，真係好想見到穎心。

縱使有車係咁呠我，有司機走落車罵我，更加有人攞住電話影我，呢啲都唔重要，最重要既係穎心未搭飛機離開。








呼，好攰，對腳又開始無力，對眼更加想合埋，我已經見到飛機起飛越黎越低，代表我都越黎越近機場，但係我真係頂唔順，想要暈低...




「喂，白痴明，咁渣架你，仲以為你可以追到我添。」我見到穎心，但係周圍一片白光，唔緊要，我見到穎心已經好滿足。

「穎心，你終於唔走啦...」

「唔係架，你唔追返我我就真係永遠都走架。」

「追，點都追，我好後悔係中學畢業個陣無去揾你。」

「而家，你係我面前，我會好好珍惜你。」





「穎心，我愛你。」講完呢句，穎心都笑中帶淚咁既樣，我想捉住佢隻手既時候，卻打到硬物，唔通暈到發夢...

「好痛...」

原來我訓左係馬路上面，其他塞緊車既人都係到圍觀；有啲香港人，就係咁唔鍾意關心人，睇人死當係做戲咁。



我立即爬返起身，的確，今日既天空好靚，但係硬係唔夠完美，睇黎我要繼續我既路途。




我帶淚繼續跑過去，我都好似穎心咁，係夢入面，淚中帶笑，希望比到自己一個安慰。








我用盡全力，無論對腳既痛，直達無力都好，我拼左條命都要追返穎心，我已經錯失走穎心一次，而家，係時候將我應得既奪回。




終於！終於！跑左唔知幾耐先見到客運大樓，入到去，我無停過對腳，依然係到尋找穎心，我去到塊牌前面，揾下去英國既飛機，最近一班機係四點三十五分，而家係四點二十分，即係我仲有十五分鐘去揾，只係希望穎心未上機，更加希望佢唔係搭呢班機，因為今日全日只係得呢班機去英國...連個天都要咁玩我。




去到J登記大堂，我，都係見唔到穎心既身影。





究竟係我真係唔認得佢，定係佢已經上左飛機...

其實我好驚，好驚佢真係唔會再返黎，企左係大堂，即使有航空公司職員問我有咩需要，我都唔識答佢，只係口呆目呆咁企係到，唔通我同佢講要尋人咩...




尋人？嗯。




我立即跑去詢問處，我相信呢個係唯一希望。





「唔該，我想揾一個小朋友，佢係J登記大堂走失左。」

「請問佢叫咩名？」

「洛穎心，佢係我個女。」好耐無係我口中講過呢個名，講完之後好似如釋重負咁。

「好，先生你等等。」

「唔該，唔洗急最緊要快。」我都覺得自己幾無恥，係呢種關頭仲搞埋呢啲咁既gag。




「洛穎心小朋友，你爸爸白志明係J大堂等緊你，請你立即黎到J，大堂。」




「白志明...」

「點解你要咁早。」

「點解...」眼淚開始滴濕雪白既地板，出現了一個女仔係廁所門口抱頭痛哭既情景。

「洛穎心小朋友，你爸爸白志明係J大堂等緊你，請你立即黎到J大堂。」




快啲啦，穎心，我知你聽到架，你唔係話我要追你咩？而家我死都死左過黎，而家只係等你既一個回應。




「穎心！」