《我獲得一個願望，我選擇左係學校做一次男神》: 第五十三章：中大家庭

係我眼前，無端端多左十個我完全唔認識既人，有男有女，更加有當差既，究竟佢地係咩人。

「其實今日做咩會黎飲茶既？」我問下我隔黎個個肥仔，見佢個樣幾善良，都唔怕傾多幾句。

「今日中大聚舊，叫左兩三個師兄同我地一齊食飯囉。」師兄？乜大學仲有呢啲野架咩？

「佢地好犀利架，以前做莊，而且搞到風生水起，無人唔識佢地。」講到咁勁，邊個係佢地先。

「邊個係師兄？」





「嗱，你隔黎個個啦，叫佢阿邦得架啦，成日以為自己做警察就係詹士邦，真係頂佢唔順。」

「仲有坐正你對面個個，佢叫阿風，佢而家係律師。」哇，女律師電視見得多，估唔到現實都會見到。

「最後一個就係冰倫。」冰倫？

「佢既事蹟好難同你講，遲地有緣再同你慢慢講。」

「大家食野先啦，凍晒啦。」望住講野既冰倫，我都估到佢有啲古怪啦，只不過，比想像中更加古怪。





不過咁樣一班學生聚埋一齊，都幾有中學生既感覺，仍然係血氣方剛，懵下懵下既一班人，只不過無課室，無校服而已。

一到食野，一到聽佢地講咩，其實無咩特別，只係師兄講多，分享自己出黎做野既經歷。

「你知唔知啊，上次係學堂踢波，我踢跛左個學員，搞到佢無得當差啊。」哇，係咪真係黑社會黎，踢波都可以踢跛人。

「係呢，講到踢波，有無人想組隊？」見大家咁落力聽阿邦講野，我都及時提出組隊踢波。

靜左五秒，無人答我，真係想揾窿捐。





「哈！太好啦！我一直都想揾新人加入，今日終於都有啦。」又係阿邦講野，其他人係咪唔識講野...

「即係你地本身有足球隊？」

「係啊，成枱都係中大足球隊架。」成枱？連對面個個女仔同我隔黎個個肥仔都係足球隊？

「當然，阿風只係隊醫。」

「咁點運作架？」

我地不斷傾關於足球既野，原來大家所好既話題只有足球...



「唔講住啦，我要返差館啦。」真係搞笑，特登落黎同我地飲茶。





「同你講個秘密啊，坐係到既全部都係精英，無論運動，讀書都係。」呢個肥仔點解要咁同我講呢？唔通我都係精英？不過冰倫帶我黎一定有佢意思。




坐車返中大既途中，冰倫一直問我芊雪既野，好明顯，佢係對芊雪有好感。

「芊雪讀咩架？」

「護理。」

「有無拍過拖？」

「無。」其實我都唔知佢個啲係咪叫拍拖，為左答佢，我亂講就算。





「咁你係咪鍾意佢？」

「...」

「我鍾意過佢，而家無。」

「嗯...」

「唔該晒，下次我想同芊雪食飯。」

「下？佢都唔識你。」

「見過面啦，感覺唔錯。」呢啲人真係唔知羞，以為自己讀心理學就估到女仔諗咩，雖然我都要讀心理學...





「哦，咁你點聯絡佢？」

「你幫我咪得囉。」不如我幫你追埋佢？

「算啦，我比佢電話你，你唔好煩到人就得。」

「得啦，我會好好同佢傾下計。」我知道讀心理學既人恐怖程度，特別係冰倫呢啲人，講少少野就可以比人中佢設既圈套。希望芊雪會好好保護自己啦。

「你踢唔踢波架？」

「都話頭先成枱人都踢波，我仲要係隊長，你覺得我踢唔踢？」

「你地幾時會有比賽啊，我腳痕啊。」唔係香港腳，只係好想好想踢波。

「比賽啊？暫時都未有喎，等到暑假之後開sem就會有杯賽架啦。」杯賽？好似好刺激咁，唔知對咩隊呢？





「但係，你要係暑假選拔合格先得喎。」仲有選拔咁嚴格架？

「好，就咁話！」挑戰永遠都係激起人心一種。




諗返自己中學踢學界，同阿軒比賽，好懷念；原來人長大，真係會將自己最初最喜歡既興趣拋諸腦後，導致香港人個個只係為人工打拼，從來無為過自己夢想踏出過，甚至發夢既空間都已經被剝奪，好可惜，自己都係其中...