《我獲得一個願望，我選擇左係學校做一次男神》: 第四十九章：示愛成功？

「對唔住，我諗我要慎重考慮下。」



「大家幫我係花園掛起用LED砌芊雪兩個字，同一個心心出黎，麻煩晒！」

「晨曦，你幫我lead住佢地，今晚既氣氛交係你手上。」見到晨曦比左一個肯定既點頭我，我都可以繼續放心處理飯盒最尾既步驟。







望住個蛋包飯，上面用一粒粒既白飯起左個「雪」字，好靚，真係接近完美。

但係望住個心太軟，我個信心立即跌左千倍，點解？因為我試事唔到，完全唔知好唔好食，仲要第一次甜品就整心太軟。




「好靚啊個飯，特別係個雪字，嘻嘻。」梗係靚啦，我差唔多用作十分鐘去砌個近乎完美既「雪」字出黎，仲要運送途中無甩到，真係險過剃頭。








芊雪好專注食緊過飯，其實我唔係好有興趣食自己個飯盒，只係好奇芊雪對於我整比佢既飯盒有咩評價。

「芊雪啊，不如你試下個心太軟啊。」

「但係我未食完個飯喎。」其實我係特登叫停芊雪，希望佢唔好咁快食晒個飯，因為好戲在後頭。

「唔緊要啦，我想你試下個心太軟先。」





「好啦。」

「唔，好味啊！」其他人咁講，我會覺得好假，但係今次講出黎既係芊雪，好相信佢呢句係真心。

「咁就好啦。」希望你等陣個心都會咁軟啦。

「好咩？」

「無野，你食埋個飯先啦。」

雖然我同芊雪唔係食緊同一個飯盒，但係享受緊同一份心意。

「咦？」來了，終於都黎啦。

「咩黎架？」芊雪指住飯盒裡面一條銀色既野，或者好多人會認為呢招好老土，但係我鍾意。





「你不如攞起佢。」芊雪一面迷惘，唔知點好，唯有我幫佢啦。

「哇，咩黎架！」芊雪咁樣一叫，差唔多成個醫院都聽到。

我立即用清水將手鍊洗乾淨，然後放係芊雪面前。

「原來係條手鍊喎。」當然，我都要扮下野，配合個情景。

「無聊。」笑笑口既芊雪凝望住條手鍊，睇黎一切都好順利。

「咁你要唔要？」

「要！」芊雪想用手係我手上攞走手鍊既時候，我都快手收起。





「唔係比人架咩？」扁嘴都無用，仲差一步先可以送呢條手鍊比你。

「合埋眼先。」

我好聽話，都合埋眼，但係又立即想起眼前既「芊雪」二字同心心，我知道阿明想做咩，但係我...




「芊雪，可唔可以做我女朋友？」我鼓起最大既勇氣向芊雪講呢一句，一切已經完成，只差芊雪一句成就整段感情。


好辛苦，當我聽到呢句既時候，就會諗起遊艇上面光仔所同我講，同我做既野，不知不覺，原來光仔已經成為我對愛情既陰影。

「對唔住，我諗我要慎重考慮下。」








點解...我無言了，我唔埋怨我今次做既野，無埋怨我既不足，但係就憑我地最初建立既感情，大家都有好感，點解就唔可以起埋一齊？

「對唔住，多謝你今次飯，更加收到你既心意，但係你既手鍊同愛意，我暫時收唔落。」收唔落...好一句收唔落...個天玩完我未？我唔講穎心個次，但係今次我真係好嬲，叫我追返芊雪，而家佢又拒絕我，你想點啊！...




係雲朵上，又係兩老係到講野。

「喂，點解今次芊雪又會拒絕阿明既？」





「你唔知，我有點會知呢？」

「唔，無理由，睇黎光仔對芊雪黎講仍然係一個好大既陰影。」

「你咁講，即係話無得改變？」

「咁又唔係，不過就要睇明仔做化啦。」

「從前都無乜邊個可以動情令到我地都覺得感動，希望今次明仔用盡全力，全心去追芊雪啦。」

「老野，有無諗過芊雪同阿明根本就係兩個世界既人。」

「本來我都唔想講，既然你都發現左，唯有將佢地狠狠咁斷絕。」

「嗯。」




係今晚，無盡既落寞，孤單湧入我心頭，我覺得自己住緊既唔係醫院，而係精神病院。



「阿明？」入黎既係晨曦，唉，我辜負左晨曦同一班廚師既心血。

「嗯。」

「唔好咁啦，芊雪都只係想好好為之後考慮啫，佢咁諗係為左同你走更遠既路程啊。」

「嗯。」

「唉，白痴明，你係咪無拖拍就咁低落先？如果個個都好似你咁，日日都有人為情自殺啦。」

「而家唔係無拖拍既問題，而係時間既問題。我真係唔知有幾耐命，雖然醫生話我可以活到七八十歲，但係仍然有復發危機；愛，就係要捉住黎愛，唔係游黎游去，究竟仲有咩要考慮，我對芊雪既愛，已經表達得好足夠。」




「其實你有無諗過做朋友都幾好啊。」哈...啊。

「如果你唔係黎同我傾辦法既，唔該你走。」

「你唔好咁執著得唔得啊，而家唔係打機揾攻略啊，愛情唔係比你咁糟蹋架。」

「你凈係識話自己好愛佢，表達晒愛意咁又點？你有無理過人地點諗，你係咪芊雪？佢一定要鍾意返你架咩，就算鍾意都唔一定要同你一齊架，你明唔明啊。」

明，做朋友阿嘛，好！咁我地以後都做朋友啦。