《我獲得一個願望，我選擇左係學校做一次男神》: 第三十六章：後悔嗎？

故事黎到呢到，各位不同既主角，配角已經演繹緊一個荒淫無道，愛情可以容納多過一個人既情況，又或者大家對愛情既價值觀隨著自己長大，甚至濫用世界既自由，一切已經變質；阿明由一開始懷著單純，白痴既心去追穎心，可惜穎心要離佢而去；跟住經過唔同既事情，去追求愛情既滿足感，到最後同左個護士一齊；的確，對於阿明黎講，已經好滿足，甚至超過所想像。或者而家擁有太多，會變得放蕩，任性，究竟，阿明會唔會後悔呢？




芊雪，本身亦係一個傻傻下個女仔，一心只想認識阿明，不過經過讓佢地都對大家有好感，只可惜無人開口先，更被晨曦捷足先登；令到芊雪對阿明失去希望，信心，寧願跟隨阿軒去玩樂，亂結關係，更遇上光仔，芊雪已經唔想再理阿明，究竟係邊個一手造成？








大家拭目以待。




我同光仔攬攬下，都有啲攰，索性訓係床到；我地蓋著被，望住對方，先發現，世界上，有咁完美，咁有氣派，咁適合我既男仔。

「阿雪，我以後都咁叫你啦。」

「嗯。」





「其實我做健身教練架，頭先都唔記得話比你知。」哦，難怪咁健碩啦。

「我都唔知你做咩添。」其實我地頭先傾個兩個鐘計，到而家，已經忘記得一乾二淨，也許光仔既生活就係咁，每次認識完既女仔，係落船後，甚至未落船已經忘記左，係生活重新既一種。

「其實我讀緊書架咋，係中大。」好彩，我都無忘記自己今年入左中大。

「原來你讀緊書架。」好似好驚訝咁，我個樣都好細路女啫。

「係啊，係咪覺得好正呢，同個學生妹拍拖。」





「咩學生妹，你都大專，成二十歲人，唔知羞。」

「哎呀，你咁樣講野既，我搣死你。」話說，我都好耐無搣人，其實比我搣過既只有阿明。




好感觸，自己對住以前鍾意既男仔先會做既野，而家對住個認識左唔知有無半日既人，都可以咁親密，而家既芊雪好唔似我；我好似有啲傷感，我停手，無再搣光仔，只怕自己繼續陷入更深，無法抽離；更怕自己會習慣對住個啱啱認識既男仔，就不停咁攬攬錫錫，進入一個濫交既階段。




可惜，眼前既快樂，比起一切更吸引。








「望住我，應承我讀完大學就同我結婚。」望住Natalie對眼，以為自己望緊水晶，雖然只係黑色，但係好水汪汪，好閃耀。

「我應承你，我會同你出去住，但係結婚就...」我開始迴避佢既眼神。

「咩啊！係咪唔肯同我結婚先！」其實我仍然好害怕一樣野，就係好怕同啲比較靚，會吸引到男人去望既女仔拍拖，甚至結婚，係，我會覺得無安全感，覺得自己配唔上同埋硬係覺得佢身邊好多兵仔，甚至有左第三者我都唔知；天使既面孔，背後總係好可怕。

「結婚唔係講就得架，要諗，要籌備同埋要錢。」

「你講到最尾都係錢啫，你讀完大學，出黎做一兩年野都夠錢養我啦。」真係估唔到，一個睇上咁斯文，五官端正，櫻桃小嘴，就以為係乖乖女，點知仲邪惡過啲港女。

「好啦，聽你講啦，你都係擔心我唔娶你啫，如果我唔娶你，仲可以娶邊個啊？」





「咁就差唔多，你話架，唔準講大話唔要我。」到最後，Natalie都只係怕我唔要佢啫。

不過係英國倫敦買樓都唔惹小，仲要買車出入，雖然我係英國讀心理學；但係我對於家庭負擔，覺得仍然係一件好艱辛既事情。

雖然Natalie已經做緊教琴老師，但係收入對比起佢買衫，食野既支持，根本差天共地，好彩佢唔會化妝，保持自己最清純個樣，呢樣野我係好鍾意同欣賞，而且佢又肯去做瑜伽，健身，所以食幾多野都唔會肥，而且仲好好身材。

對住Natalie定係阿樂好？性格同個樣都好大差別，阿樂就溫順，好聽我話，不過身材，樣貌就比唔上Natalie，但係人係好現實，擺係眼前既Natalie同係天邊一角既阿樂，當然係Natalie不過啦。賤格係賤格架啦，人始終要生存，為左係之後係英國有安定同埋有女朋友滋潤既生活；我一早就係香港認識Natalie，而且口吃係Natalie幫我搞定，而並非我所講既阿樂；有時覺得自己扮野都幾犀利，

呃盡所有人，都係為左自己既利益，唔好咩？