《我獲得一個願望，我選擇左係學校做一次男神》: 第三十二章：派對

唔知點解，阿軒褲袋入面既紙條搞到我好唔自在，好介意係關於啲咩，其實要知道係咩，好簡單，就係直接係個到等。
我係最近阿軒屋企既私人碼頭對面等，企係樹後面應該見我唔到既，等左十五分鐘，終於到十點正，目標人物都好準時出現，同樣着住西裝既阿軒，唯獨今日攞埋個公事包，唔通係毒品交易？定係我睇得電視劇太多。
阿軒企係碼頭到，等左差唔多五分鐘就有架遊艇泊左埋去，而揸過黎既人就落船比返條匙阿軒。好奇心帶領我行近遊艇，係棵樹旁邊，隱約見到阿軒好似打緊電話比人；咦9304？咁熟既？係咪上次係阿軒褲袋揾到既電話號碼呢？好緊張啊我，好似玩緊偵探遊戲咁，究竟發生緊咩事呢。

「出黎啦，阿雪，你咁大個人，仲玩捉迷藏？」搞錯啊，我明明已經企係棵樹後面啦喎。我慢慢行出去，阿軒都對住我笑。
「咁都比你見到，你咁夜係到做咩？」我都唔怕開門見山問佢，希望佢唔係做啲犯法野啦。
「我今晚有朋友生日啊，諗住同佢慶祝咋，順便玩通宵，你有無興趣？」當佢問完之後，好似啲朋友問你試唔試下毒品咁，但係我又唔識佢啲朋友，好奇怪喎。
「我都唔識你啲朋友，唔好啦。」阿軒即刻捉住我隻手。
「做住我女朋友，上去識下啲friend唔好咩？」





聽到對面馬路有啲吵雜聲，我同阿軒都望過去，呢班應該就係佢班朋友。
「Yo，阿軒。」一個電髮男，好有Rock&Roll既感覺，身後仲有四男三女。
全部都係靚仔靚女，又有一兩個ABC，身材個個都好唔錯，好似model行緊catwalk咁。
「生日快樂，凌。」個人叫凌？一隻字都幾有型，果然係搖滾男，阿軒亦都比左個公事包阿凌，點解禮物擺係公事包？有古怪。
「多謝你。」
「咁多位團友，我地上船狂歡啦！」阿軒講完就拖住我隻手，好彩佢無遺忘我，霎時覺得阿軒如果做男朋友都幾體貼。

上到遊艇，入面都幾奢華，玻璃窗全部都係出面望到入面，而出面睇係咩都睇唔到，梳發全部都係靚皮，玻璃枱上亦擺左幾枝我毫無認識既紅酒。跟阿軒上到去遊艇既頂層，即係甲板個層，雖然遊艇中間仲有一層，但係我地無入到去。
今日好彩唔係特別凍，唔係既話，我諗我又會病返。
坐左係張Ｕ字形既長梳發上面，枱上面同樣擺左幾枝紅酒係到，感覺好奇怪，大家都同隔黎個個攬攬錫錫，我就自己坐係阿軒身邊，但係佢就凈係掛住飲紅酒，講下野啦，唔該...




「喂，大家今日見到新面孔，係咪應該比啲禮貌先。」呼，不過都唔洗咁下嘛。
「唔通呢個係阿嫂？」一個幾靚，身材最好既abc女仔問阿軒。
「醒目，果然跟得我多。」阿軒隨即搭住我膊頭，唔知點解，我好享受，好有虛榮感，甚至驕傲。
「woo，今日真係雙喜臨門，阿凌又生日，阿軒又有女。」嘻嘻，其實佢地咁講，我又真係幾開心，特別想阿明見到而家既情況，等佢知道佢只係過去。
「無好講咁多，飲杯先！」其實成架船都係靚仔靚女，只係有兩個無咁靚，只係普普通通。
「阿軒，我唔識飲酒架喎。」
「飲啦，唔怕喎，難得今日咁開心，睇下！」個abc女一秒幹掉杯紅酒。
「係囉，試下啦。」連阿軒都咁同我講，既然酒可以使人忘記，何樂而不為？

我知道紅酒唔係一啖飲晒，我都逐啖逐啖飲，其實個味都唔錯啊。




「咁就太好啦，大家悶既可以落下面既房玩喎。」阿軒終於都講下面既房係咩黎，但係入面有咩玩？
「阿軒啊，下面啲房有咩玩架？」問完之後，阿軒個樣突然認真起黎。
「無...唔係，都係個啲囉。」古古怪怪，算，留係到比啲風吹下都幾舒服。
「我落一落去，你自己係到一陣ok？」
「好啦。」又唔同人講下面係咩黎，自己又落去玩，自私！
啲人都差唔多落晒去，得返一個男仔同我。