《我獲得一個願望，我選擇左係學校做一次男神》: 第三十一章：天使

「小姐，你無事嘛？」一把溫柔，似曾相識既聲音，但絕對唔會係阿明。
我向返上望，眼淚仍留在眼眶中，朦朧看到一個好似阿軒既人。
「阿軒？係咪你。」
「喔，原來係阿雪你，做咩喊成咁啊？」我即刻衝落阿軒到，攬實佢，發覺佢先係最老實個個。
我攬實佢，亦繼續喊，喊得仲犀利，我寧願流盡一生既眼淚，都唔會再為阿明個個衰人喊。
「阿軒啊，阿明唔要我啊！」但係阿軒都唔知邊個係阿明，不過算啦。
「阿明？呵。」
「你知道邊個阿明？」
「唔知，世界上咁多個阿明，點會係我識個個呢？」
「阿軒，可唔可以陪我啊。」




「可以，當然可以啦。」

我地隨機上左架巴士，漫無目的咁行走，全程挨係阿軒既膊頭上面，個腦已經清空，咩都諗唔到。
「阿雪，不如上我屋企抖下啦，今日都攰啦。」雖然我無乜興趣，但係我都係答左佢。
「嗯。」

上次都無留意佢屋企係邊，原來係淺水灣，難怪間屋都大過人。
「除鞋喎。」
「嗯。」
今次佢無好似上次咁同我玩，反而斟左杯暖水比我飲。




「唔該你，阿軒。」其實阿軒認真起黎，都幾吸引。
「你想唔想同我講發生咩事啊？如果唔想既話，你係到抖下啦，我等陣要返工。」返工？我都未聽過阿軒返咩工既。
「你放心留我係屋企？唔怕我係壞人咩。」
「傻妹，你係壞人，咁我係咩，我信得過你。」話完，就錫左落我塊面到，我好似受左電擊咁，成個人彈左一下，阿軒見況都笑左一聲。

阿軒同我講左啲野，話佢間房就最好唔好入，其他房都可以入去，同埋唔好亂咁開門喎。

做左一陣，開左阿軒屋企個喇叭，有錢人真係唔同啲，成個戲院環迴立體聲效咁，差啲嚇親我；大獲！啲音樂太大聲搞到出面落雨都唔知添，阿軒啲西裝仲擺左係出面晒。我幫阿軒收返啲衫，再睇下點處理好。
咦？有張紙既？
9304 4832聽晚10點淺水灣碼頭




咩黎架？去碼頭做咩呢，不過都唔關我事啦，不過濕左，睇唔清下面個行寫咩添。

心情都好返好多，都唔好打攪阿軒太耐啦，都係自己走先。
上左車，打開部電話，唔洗估都知道有好多未接來電同whatsapp，全部都係阿明傳黎，但係我睇左第一句就無睇埋落去，呢個人已經唔值得我理。

「唉，係咪衰呢，扮咩我女朋友，搞到人哋唔理我啦。」我有啲晦氣咁話晨曦，但見佢個樣都唔好受。
「咩姐，而家係咪唔做得你女朋友啊？」又用呢招，不過感覺真係好正。
「得，梗係得啦，況且佢又唔係我女朋友，而家你先係。」
「咁就乖啦。」晨曦錫左我個嘴一啖，炎熱既一吻，除下了寒冷既感覺，更加係搞到我成個人都軟晒，好享受。
「叫野食啦，傻仔，呆晒係到，未比人錫過咩。」晨曦笑笑口咁同我講，我都比唔到反應佢，的確，我未比人錫過，個嘴。

食完野之後，我同晨曦返上病房，佢就話要去檢查第二個病人，但係我好唔捨得佢，凈係想佢檢查我一個，不過我好似對晨曦著晒迷...
究竟，晨曦同我點解可以咁快發展落去，定係佢只係player，對啲靚仔少少既就係咁，但係無理由啊，明明係實習護士，邊會有咁多男仔比佢玩，或者其實我係第一個比佢玩... 不過唔好忘記，我好歹都係男神一個，有資本
同人玩，特別係靚女。





我決定左，已經預備好同晨曦玩落去，假若佢係認真既，咁咪繼續，如果唔係既，我同佢玩盡佢！