《我獲得一個願望，我選擇左係學校做一次男神》: 第二十八章：未來老公

「Honey，今晚同唔同我訓啊？」呢個係我「未來老公」，但係我對佢一啲感情，係一啲都無。
「唔會，永遠都唔會。」我好堅決咁同佢講，就算以後結婚都好，我點都唔會同佢訓，佢又好色，又成日飲醉，真係典型死肥佬，最衰未開學，搞到而家要住係佢屋企。
「點解啊，老婆，我地都就黎結婚啦。」佢用手指托一托起我下巴，我即刻退後。
「我同你講，你唔好再掂我，唔係既話，我即刻搬出去住！」
「同埋我唔係你老婆，唔好再叫我Honey同老婆，好噁心！」
「Ok，fine，你唔喜歡既，我叫返你做心心啦。」佢再行過黎挨係我膊頭上面。
「係穎心！你仲挨埋黎！」我一下推走佢，但係佢真係好重，點解一個十九歲青年可以好似中年發福咁樣。
「唔好趕走我啦，我會好錫你架。」仲有我最討厭既煙味同酒氣，我真係忍唔住，我即刻跑上房，鎖埋對門，費事佢再黎煩我。

點解人哋結婚係揀老公，點解我係奉旨成婚，點解個男人可以咁衰格，係到胡作非為，我既人生係咪就係要咁坎坷。




「起身啦，心心。」叫我起身既就係我「未來老公」，我係絕對唔會承認呢個肥佬係我老公，我唔係歧視佢肥，而係對呢個人毫無感情，咁點樣結婚，點樣開始呢段感情，甚是婚姻。
「咁早去邊啊？」我係極之不情願咁理佢同起身，不過點都好，第時仲要有排對住佢，都係唔好對人咁衰...
「去睇樓，去睇車同埋結婚場地。」下？！
「睇個啲黎做咩？」
「比我地兩個，又或者未來新成員囉。」大佬，我唔想同你生bb，都話點都好，我寧願保住貞操，都唔會同你生仔！
「Sorry，我無諗過要生仔，你唔好得寸進尺。」
「Oh，咁好啦，唯有遲啲再算啦。」佢拖左落我隻手到，唉，就算幾唔想都好，名義上都要拍下拖，夾硬培養感情，先可以結婚，唔係既話，唔通一結婚就離婚咩。

「心心，你鍾唔鍾意呢架車啊，我買比你啊。」我同佢去左一個歐洲車展，而佢指住既應該係全場最貴，因為係全球限量一架既林寶堅尼。
「我..我唔識揸車架喎，同埋咁貴，唔洗啦。」其實架車幾靚，但係我真係慣左唔收咁貴重既禮物。




「唔好吞吞吐吐啦，我知心心你一定鍾意既，唔識渣車都唔緊要，等我車你出街！」唉，我都無佢辦法，啲錢又唔係我，不過如果佢太肥坐唔落就好笑。
真係買左架車，仲要即刻揸走，話要去睇樓。

係倫敦，都幾塞車下，過左差唔多半個鐘先到達目的的。
係路上我都訓著左，再次諗起阿明，幻想揸車既唔係肥佬，而係阿明，幻想買樓，同我預備結婚既都係阿明；其實我有諗過同阿明私奔，但係係咪真係咁容易，生活係咪真係會咁愉快呢？但我相信，對住一個愛既人，總愉快過對住一個我唔愛，甚至討厭既人。
「到啦，心心，睇下鐘唔鍾意？」當我落車，望向間屋既時候，我喊左出黎。

「喂，靚唔靚？」阿明拍落我個頭到。
「哇，你畫架？唔錯啊，係咪諗住比你啲公主住？」
「咩啲公主，我既公主只有一個，就係...」




「得啦，得啦，等我睇下。」我知道阿明會話我係佢既公主，我都好想成為佢既公主，但係...我唔想聽到我個名，我亦唔想係佢面前喊。

木製既圍欄，包住一間屋仔同草地，一條小徑直達大門，而旁邊全部都係鮮綠色既草地，甚至幻想我同阿明係到同啲狗仔玩，又或者同啲小朋友玩。
屋後更加係游泳池，燒烤爐，可以一到望住日落，一到燒烤，係最好既配搭...

「做咩喊？係咪太靚？」其實間屋無咩特別，只係諗起上堂個陣阿明曾經畫過似曾相識既景比我。
「係啊，好靚啊，多謝。」
「我地入去睇下啦。」跟住佢慢慢行入去，雖然係我夢寐以求既小康之家，但係間屋既成員，好似唔係幾登對。
屋入面有開放式廚房，我都唔係幾在乎，因為我唔會煮野食比佢，我只會煮野食比我心愛既人。跟住落去，我都無乜點留意間屋，都係大香港少少，多一層，舒服少少咁。

其實我係好衰，可能只係慣左唔喜歡收人禮，搞到而家個個送野比我都覺得佢地另有企圖，覺得我唔滿足於此，但係我真係唔鍾意...
「心心，我地今晚開始係到訓架啦，所以我地攞啲行李上黎啦。」今晚？洗唔咁心急，行李都未攞。
「行李都未搬過黎。」
「搬左啦，我叫左人搬黎，睇下。」佢拉開窗簾，下面的確有一架貨車，仲有啲行李。