《我獲得一個願望，我選擇左係學校做一次男神》: 第二十七章：穎，心在哪

當我知道要同一個素未謀面既人結婚，我已經讀緊小學。點解我要咁做？因為我係無得選擇；而且，個男仔屋企人話幫過我地，甚至我今日能夠健康成長，都係因為個男仔屋企人既幫助，但係點解要當我係禮物送比個男仔？
「阿爸，我努力讀書，比我揾夠錢去報答返佢地咪得囉。」
「唔得，錢我都有，但係送你比人就係誠意！」天啊，究竟係咩道理，咩邏輯啊。
「阿爸，我成個中學都考到頭十名，可唔可以獎勵我，比我同第二個人結婚？」
「唔得！無理！應承左人就要做！」
「阿爸啊！我今年成績入到港大，我可唔可以繼續係香港讀書啊。」
「穎心，就算你講幾多次，求我幾多次都無用，承諾就係承諾，唔可以反悔。」沒錯，就算我求幾多次，問幾多次，佢都係同樣答案，不同解釋去同我講。唉，我係咪要安慰自己，話自己有得結婚，有人鍾意已經好幸福，但係我所認識既幸福，係可以自己選擇。

係中學裡面，有好多男仔都追我，想同我拍拖，當然包括阿明，但係我知道我地係唔會有好結果，所以我索性拒絕所有人，甚至係阿明。
一時一刻既傷心，總比起幾年既傷心好，甚至幾十年。




阿明送朱古力比我，然後暈低左，我無忘記；更加知道佢從前並唔係咁樣，即係男神，但係係個刻我感到既係窩心。
我無揭穿佢，更加係之後同佢好friend，好親密，點解？因為我都鍾意佢囉。
係呢間學校咁耐，我知道無一個係真正會愛我，會疼錫我既男仔，直到阿明同我表白，我發覺以前同我表白既男仔都係認為我係物質既女仔，送花，送名牌香水，甚至有人送車比我，我係完全唔鍾意，亦令我感到煩惱；如果我唔接受，只會讓更多既男仔覺得佢地送既唔夠好，只會繼續變本加厲，就好似送車個位同學咁，如果我接受左，所有同學都會討厭我，認為我係物質既人，連女仔朋友都憎我。所以，我寧願咩都唔要，亦只係收左一盒朱古力，一份心意，已經遠超過一架車。

其實我好唔捨得阿明，阿峰，一班好朋友，但係我可以做啲咩？唔通離家出走？係強權下，我唯有屈服。每一件同阿明經歷過既事，我都無忘記，由佢表白暈左，做左男神，我比阿軒捉左，比阿明救返，係個陣，阿明根本就係我既曙光。跟住係個傻仔話要挑戰阿軒，雖然兩局平手，最後一局未開始我就走左，我欠左阿明一個公道，不過即使到最後邊個贏都好，我同佢都係無可能，唯有腰砍賽事，邊個都贏唔到。

雖然係咁，但係當佢兩個既決鬥進行緊，我心底裡係支持阿明，當佢踢波比人入波，我會灰心，當佢係最後一刻入唔到波，我更灰心，但係阿明比我既係信心。我無信錯白痴明，佢成功當選左學生會，我亦為佢高興，但係時候要到啦，無咩可以送比佢，當選學生會當係比佢既一個happy ending啦。
我亦從阿峰到得知有個女仔同阿明好親密，甚至成對情侶咁，好酸啊；係架，女人就係咁容易就妒忌，即使唔係你既野，都唔可以比其他人得到，係好霸道，但係愛就係咁，要徹徹底底維護一個你愛既人；或者有一刻我都看透左，知道阿明既然放得低我，我唔係都要為佢感到高興咩？只不過，一刻高興蓋不過心頭上的酸味。

到最後啦，其實我係有收到阿明既信，唔知點解個白痴明知我去左外國，都會寄去我香港個地址到，真係白痴。我都唔知點解會愛上一個白痴。阿明啊，你既心意我收到啦，不過好老土囉，我愛你咪我愛你囉，收收埋埋，懶神秘好彩我醒目咋，知道你每封信頭一隻字連埋一齊就係「我愛你洛穎心」阿嘛，無聊！仲搞到人喊，你知唔知，我就係唔想你愛我，你愛我幾深都好，你都係無辦法感受到我對你既愛，愛，在遠方，你可能永遠都揾唔到我。






我終於去到英國啦，呢到雖然成日落住毛毛雨，好唔舒服，但係黎到新環境，都會有些少既興奮既，儘管個心仍然留左係香港，呢到成日食到好野，又有靚風景睇，最鍾意既都係呢到既生活。一切都好舒服，可以去咖啡室睇下書，坐係窗邊一到望住啲雨點散落係玻璃窗到，一到做野，簡直就係比我呢啲咁有氣質既人。

嘻，其實，我都係鍾意酒樓既乾炒牛河，蝦餃燒賣多啲，每次諗起都熱淚盈眶，因為已經唔知幾時再有得食地道既小炒，小食。