<明明係黑社會，我就同老婆講自己係臥底>: 第十二回
係依個咁撚危急既情況，突然有一隻手伸出黎捉住我．．．係Boey佢！！！
Boey出盡力：「你．．．你唔可以．．．死架！！！呀！！！！」
患難見真情，Boey份人係就係好撚港女，又成日做埋ｄ硬鳩野，但估唔到佢原來咁愛我．．．
我將支槍「pat」番上天台邊，然後奶力都出埋，雙手一齊發力，最後總算擒番上天台，當我仲上氣唔接下氣之際，我見到阿森爺已經爬左過隔離天台，然後經另一橦大廈既天台樓梯走甩左，劉Ｓｉｒ亦係佢後面咬住唔放。
點撚知，果個劉Ｓｉｒ回頭見到我仲未死，竟然打算開槍殺我！！肯定因為頭先我同Boey聽到太多唔應該聽到既秘密，所以打算先殺我地滅口，然後再追上去隊冧埋森爺！
我已經無得揀，我即刻執起地下之槍，死就死！
嘭！嘭！
我：「．．．呼．．．呼．．．呼．．．」
Boey：「呀！！！！！」
我打中左劉Ｓｉｒ胸口，劉Ｓｉｒ應聲倒地．．．我殺左人，我竟然殺撚左人！！
「咪郁！！舉高雙手！棄械投降！」有班差佬趕到上黎天台，佢地見我拎住支槍，個個都好撚緊張。
差佬A：「喂，隔離天台有發現，劉Ｓｉｒ中左槍訓左係度！！」
其他差佬，就變得更加緊張，
我放低槍，舉高雙手：「我唔想架！果個劉Ｓｉｒ係奸架！！佢想殺左我地，我先會開槍架咋！！」
在場既差佬無理會我講既野，用力將我「禁」係地下，扣上手扣：「咁大膽連警察都殺，你今次死梗！」
今次我真係死撚梗，我無證據證明果個劉Ｓｉｒ係奸，而我殺撚左個警察就證據確鑿，真係水洗都唔清。仲有果個森爺走甩左，佢當正我係鬼頭仔，就算班差佬唔搵我算帳，森爺都會搵機會向我報仇．．．
就係當晚，森爺企係碼頭，等緊偷渡船走佬去台灣。
森爺：「養左果條仆街劉Ｓｉｒ咁耐，竟然反咬我一口！仲有果個仆街Billy，我實唔會放過佢！」
無幾耐，有隻偷渡船靠近，企係船頭既就係蛇頭標。
森爺：「屌你老味你個蛇頭標，我宜家著草呀，你估我去旅行咩，係度同我玩ｄｅｌａｙ！！」
蛇頭標面色有ｄ古怪：「唔．．．唔好意思阿森爺，頭先有野搞，遲左。」
當森爺一上到船，就即刻有幾個差佬係船後面撲出去，用槍指住森爺：「咪郁！」
森爺一見到差佬，即刻跳番上岸逃走。
嘭！嘭！差佬開槍制止，宜森爺亦都拎支槍出黎還擊，雙方駁起火上黎。
嘭！嘭！嘭！嘭！嘭！嘭！
經過一輪槍戰，森爺最後倒地身亡。
差佬Ａ打俾係醫院留醫既黃Ｓｉｒ：「黃Ｓｉｒ，頭先打算捉森爺既時候，佢開火還擊，我地駁起火上黎，最後森爺中槍身亡．．．」
黃Ｓｉｒ：「可惜．．．仲諗住可以拉條仆街坐監，宜家益撚左佢。」
差佬Ａ：「嗯．．．不過佢死左都好過俾佢又走甩．．．果個Billy仔，總算做番件好事，全靠佢醒起森爺用過佢老婆電話打俾個蛇頭，我地先可以係電話供應商困度查到個蛇頭ｄ料，咁先至阻止到森爺佢走佬。」
黃Ｓｉｒ：「如果講「好事」，咁Billy仔佢唔只做左一件．．．Billy仔話社團鐵館果度應該收埋左一ｄ劉Ｓｉｒ既痛腳，可能可以證明到佢無講大話，頭先ｄ伙記根據Billy仔口供，上到去社團鐵館度搜查，估唔到真係搵到本社團名冊，入面有晒所有成員既身份證副本，ｄ伙記發現入面有劉Ｓｉｒ既資料．．．」
黃Ｓｉｒ佢地搵到本社團名冊，證明左果個劉Ｓｉｒ係森爺支針，再加上天台附近既大廈原來安裝左「天眼」，拍到當日既情況，證明係劉Ｓｉｒ想先開槍滅我地口，而我只係自衞殺人。
另外，多得黃Ｓｉｒ向法庭求情，我當晚所做既毒品交易同埋窩藏森爺，都係由於俾森爺威逼，而係貨倉入面，我都只不過係開槍射左果兩件屍體幾下，加上我亦有協助警方破案，所以以上罪名都告我唔入，不過，我最後都要坐監．．．因為當晚有監察器影到我以時速百二公里連過幾個彎，危險駕駛罪名成立，判監六個星期．．．
唉，最後都要搞到坐監，究竟坐監係點架呢．．．我記得之前有位高登巴打寫過一個關於坐監既故仔，早知果陣時我都買番本黎參考下啦，真係書到用時方恨少．．．
另一方面，我都唔知點面對Boey好，但估唔到，條傻婆真係傻得幾可愛，佢竟然同我講：「老公～我有睇過＜Laughing gor之潛罪犯＞，明架喇，總之你要萬事小心！」
真係俾你吹鳩漲，依頭我係度諗緊高登巴打果ｄ好故，你就係度同我講無記ｄ濕鳩戲，你地ｄ港女究竟明唔撚明，高登同無記，係兩個完全唔同既層次架姐！
黃Ｓｉｒ佢唔但只幫我求情，仲將之前Boey果段片delete左，廢事又搞出個大頭佛．．．當然，黃Ｓｉｒ並唔係無條件幫我，佢要我係監獄入面查ｄ野，但依個又係另一個故仔lu。
＜全文完＞
後記：
當你地覺得Billy仔既經歷係笑話之際，大家試下諗深一層，其實我地咪同Billy仔一鳩樣，周不時身不由己，周不時做一ｄ自己都唔多願意既事，又周不時俾身邊既人逼迫，其實我地都只係其中一個Billy仔。
當你有壓力既時候，不妨諗下Billy仔，關關難過關關過，做人既野，邊會咁易估架，你以為你面對緊一個極之差既結果，但可能過一段時間先發現，原來依個係另一個好開始呢，放鬆ｄ啦巴打們～
至於有關小弟既<傳瞬凶間>下一集<癲才殺局>既連載時間，又或者小弟既其他文章，可到FB留意，覺得有趣既話都希望你地俾個Like，你地小小既支持，就係我繼續創作既原動力！
https://www.facebook.com/devilcard