秦天晴 — 有鬼 新章《畫》正式展開: 貓妖 — 第六章
聽到貓妖呢兩個字，絕對係再次顛覆左我對呢個世界嘅認知，同時亦覺得呢個世界變得好玄幻！
響不久之前，我仲係一個公司小職員，之後因為意外而睇清楚鬼嘅世界，但係過左無幾耐嘅今日，我嘅人生之中竟然仲涉及到妖怪嘅存在，莫非呢個就係擁有天師血脈嘅命運。。。？
我已經再無可能做番一個平凡嘅人。。。？
”到啦！”軒轅皓嘅聲音將我從內心世界之中拉番出嚟
我搖一搖頭，響心入面叫自己唔好亂諗野，就跟住佢行入屋，一入到去，大廳果堆人就即刻企起身對住佢叫左聲“呀頭！”
“呀頭！？”我愕然咁望住佢
軒轅皓都未嚟得切答我，就被凌嘯峰搶答咁話“無錯！佢係我地呀頭！”，講到呢度，換左個壞笑嘅表情同我講
“所以你上次叫佢瘟神。。。嘿。。。我地都對你有好崇高嘅敬意！”
聽完之後，我一臉尷尬咁望住佢地，真係勁唔好意思。。。我真係唔係故意叫佢瘟神架！只係本能反應衝口而出之嘛。。。
“唔緊要！天晴你講下啱啱發生啲咩事！”軒轅皓一開口，瞬間就扯開左話題拯救左我
於是我就將啱啱見到嘅一切話比佢地知，而講到最後。。。我又忍唔住跑入廁所度嘔
再一次嘔到無野好嘔之後，我先至從廁所度行番出嚟，而軒轅皓見到我出番嚟，就去倒左杯暖水比我，我對佢感激一笑，接過之後就坐左埋一邊聽佢地講野
“根據調查，啱啱個死者叫”呀超”，同呢幾日被貓妖所殺嘅“蕉皮”，“和哥”，仲有“肥文”一樣，都係邨入面出晒名嘅邊緣少年 ！” 坐響沙發正中間嘅男仔開口話
跟住坐響佢對面嘅男仔接住咁話“佢地幾個日日都響屋邨入面流連，欺負弱小，恃惡行兇！最近仲成立左個小團體，以佢地四個再加埋一個叫細榮嘅人為首，個團名叫《天威》！”
聽完之後，凌嘯峰就開口話“咁即係佢地四個都係《天威》入面嘅領頭人，然後響四日入面，被貓妖一日殺一個”
坐響我對面嘅男仔回應佢話“係！而且我啱啱檢查過條屍，行凶手法同之前果三具屍體係一模一樣，手腳被肢解，心臟被帶走！”講完之後，佢望一望我，而我對佢打左個ok手勢，表示我無事
“貓妖點解要用相同手法殺《天威》嘅領頭人呢？仲要帶走埋個心臟。。。好奇怪！”凌嘯峰講出左我地內心嘅疑惑，然後大家都變得沉默了
呢個時候，軒轅皓行左出嚟，企響大廳中間問我地“你地有無聽過貓妖修仙嘅傳說？”
大家聽到之後，都同時搖搖頭，好明顯我地除左知道果隻係貓妖，同佢出左嚟殺人之外，我地對佢其實係一無所知！
有見及此，軒轅皓就慢慢咁講出貓妖修仙嘅傳說
“傳說，天下間所有生靈皆可以修練成仙，而貓要修仙嘅話，就必須要陪伴響人嘅身邊，吸收人嘅功德，同時盡能力完成主人嘅心願，當主人去世，貓就會去搵下一個主人，一直一直循環落去，直到修練成仙！而貓妖雖然仲未得道成仙，但係經過多年修練，成為妖嘅佢已經擁有法力，除左能夠開創自己嘅空間領域，仲可以令人。。。”
佢停一停，望一望我地，然後講左句令我地好震驚嘅說話！
“起死回生！”
“下！！？” ， “唔係丫嘛！？？”，“痴線！！！”，無數把聲音同時間響起！有人仲忍唔住連粗口都爆埋出嚟，可想而知呢句《起死回生》對我地嚟講係有幾大嘅驚嚇
而軒轅皓佢對於我地嘅反應視若無睹，繼續咁話
“而起死回生，除左要消耗自身修為之外，仲需要附上祭祀物，而復活者亦需要吸收祭祀物，先可以一直咁活落去！”
聽到呢度，我已經明白軒轅皓想指嘅到底係咩。。。
“貓妖取去活人嘅心臟作為祭祀物，而被復活嘅人。。。要將個心臟生吞先可以繼續生存。。。”我輕聲細語咁話
軒轅皓望住我點一點頭，再次發表佢嘅觀點
“對於貓妖點解要殺《天威》嘅人，仲有要將佢地肢解，我覺得有兩個可能性，第一，佢地周圍作惡引起左貓妖嘅注意，第二，佢地做左啲野傷害左貓妖嘅主人，而令佢主人死亡，所以對此展開激烈嘅報復！”
我望住軒轅皓，瞬間明白點解佢可以做到靈界警察嘅呀頭，因為以佢嘅專業分析，個人見解，組織能力，以及個人知識都絕對係出類拔萃，無人能及！
經過討論之後，大家都一致咁認為係第二可能性！於是決定天光就去搵《天威》嘅領頭人，最後一個生還者“細榮”去問清楚！因為真係復仇嘅話，如無意外佢將會係下一個目標！
“咁貓妖同佢個主人而家匿埋左去邊呢？應該仲響條邨度？” 凌嘯峰再次提問
大家都知道如果貓妖要佢個主人一直生存落去，就一定會繼續殺人，因為佢需要心臟！如果佢地而家仲響條邨度，而細榮係佢地下一個目標嘅話，都仲有機會去捉到佢地，否則比佢地走左出去嘅話。。。後果就真係不堪設想！
諗到呢度，大家又再一次陷入沉默之中
而呢個時候，我個腦海入面漸漸浮現出一個人！一個臉色蒼白嘅老伯，同佢果隻叫“阿黃”嘅貓。。。
於是我有啲猶疑咁話“我諗。。。我知道佢地響邊。。。”
一講完，全部人同時間望住我，好大壓力！搞到我張開左個咀望住佢地，一時間唔知講乜好！
我望望左，望望右，吞一吞口水，然後就將幾日前上去做家居清潔果時所見到嘅野講比佢地知，而佢地聽完之後，所有人都覺得好神奇，一來係覺得我同個朋友咁樣都可以走得甩，真係好好彩，二來係覺得連唔知幾多千萬分之一嘅機會都竟然比我撞到，我嘅運氣真係。。。
不過託我《運氣》嘅褔，而家連藏身之地都知道埋，咁一陣嘅行動就會有多一分嘅把握！
講到呢度，個天都開始光啦，所以大家就決定先番去休息，養好精神先至再行動！
臨走之前，我地大家都嚟左個遲來嘅自我介紹，而軒轅皓不忘響我做完自我介紹之後，於後面加上一句“你地嘅未來師妹”！對此，我自動咁選擇無視
離開嘅時候，軒轅皓開車送我番屋企，途中佢再次開口問我“天晴，考慮成點？”
我聽到之口反問佢“呀皓，你覺得我適合咩？”
因為我只係一個有少少靈力嘅平凡人，並無受過任何訓練，咁樣嘅我，真係可以勝任得到！？連我自己都好懷疑。。。
對於我嘅問題，佢靜左靜，然後答“之前唔肯定，但係而家可以確定，係！”
哦？ 對於佢呢個答覆，我好奇了！於是我問左佢一句“點解？”，但係如果我知道佢咁答嘅話，我一定唔會問！
佢淡淡咁答我“因為有你嘅地方，就會有罪案嘅發生！”
我“。。。”無言！你估我想架咩！寶寶心裡苦，但寶寶不說。。。嗚嗚。。。
番到屋企，一開門就見到我呀爸呀媽坐左響度，而佢地見到我係由軒轅皓送番嚟，表現得有啲驚訝
而軒轅皓一見到佢地，就自動自覺咁走上前同佢地打招呼，仲講埋佢帶左我去邊同埋個原因，最後仲同佢地講話希望我能夠加入靈界警察，講到幾咁動之以情，曉之以理
我開始懷疑佢係咪因為響我度攻唔入，所以決定送我番嚟，再送埋我上嚟，之後再走埋入嚟打親情牌！但係我相信我呀爸呀媽佢地一定唔會咁輕易答應，因為佢地會好擔心我嘅安全，所以我好放心！點知。。。
軒轅皓竟然捉住我呀爸呀媽隻手，同佢地講
“世伯，伯母，將天晴交比我！你地放心，我會好好咁保護佢，照顧佢！唔會比佢受到傷害！”
然後。。。我呀爸呀媽竟然點頭答應左！！！
得到答覆，佢滿意一笑，然後望住我講左句“四點，我嚟接你！”，就開門走左，不帶走一片雲彩，只剩低我一個風中凌亂咁企左響度。。。
而我地同貓妖嘅一戰，亦都即將展開！