秦天晴 — 有鬼 新章《畫》正式展開: 貓妖 — 第五章
現場就好似修羅地獄咁。。。牆上面，地上面周圍都係血漬！平躺響地上面果個人都已經唔可以稱得上係人，因為佢只係得軀幹。。。手腳殘肢已經被分散到地上各個地方！而果隻巨大嘅野獸。。。佢正在咬開果個《人》嘅胸膛。。。
我而家個腦完全係一片空白，我想跑！但係我雙腳就好似裝滿鉛咁根本就郁唔到！而最可怕嘅係。。。我眼前正在上映緊《人體解剖》！野獸咬開左果個《人》嘅胸膛，然後用利爪將佢啲腸同胃一次過扯晒出嚟！
濃烈嘅血腥味不斷咁刺激住我嘅嗅覺！強烈嘅視覺效果令我個胃不斷咁翻滾！我想嘔！好想好想嘔！但係我連嘔都做唔到！因為我驚到全身都已經僵硬晒！
隻野獸仲好似唔滿意佢自己嘅傑作咁，再次用爪去挖個軀體！不斷挖，不斷咁挖！最後用個嘴咬起左啲野上嚟！
係一個血淋淋嘅心臟！個心臟仲保持住一下一下嘅跳動！我甚至因為寂靜嘅環境而聽到佢“砰砰，砰砰”嘅心跳聲！
點解我會睇得咁清楚。。。？因為。。。佢咬起個心臟之後就轉頭望住我！
強烈嘅危機感瞬間咁佈滿全身，我想跑！我想尖叫！我好驚！但係我乜都做唔到！望住佢已經開始轉身想行過嚟，我知道我將會成為果個軀體咁嘅下場！
“汪！”我懷抱入面嘅狗仔忽然叫左一聲，我突然好似嚇醒左咁，手手腳腳都恢復番知覺！於是我即刻轉身跑！不顧一切咁跑！
雖然我無擰轉頭去望，但係我聽得出佢已經響度追住我！佢一下一下快速無比嘅腳步聲已經離我越嚟越近！但係我已經再無辦法跑得更快！就響我跑到去轉彎位嘅時候，狗仔突然從我嘅懷抱入面掙脫左出嚟！
“狗仔！”我驚叫，同時“噗”一聲，我撞入左一個人嘅懷抱之中。。。
我抬起頭一望，係軒轅皓！
軒轅皓身邊嘅人快速咁從我身旁跑過去，估計應該係去捉果隻野獸！
而驚險過後嘅呢一刻，我已經全身都無力咁依靠住軒轅皓嘅胸膛，同時回憶番啱啱差啲離死亡好接近嘅經歷，再加埋諗番起見到嘅果堆人體殘肢。。。
“嗚哇！！！”我終於忍唔住，攬住軒轅皓大喊起上嚟！
軒轅皓望住秦天晴用力咁攬住佢放聲大喊，表現得有啲手足無措，拍佢又唔係，抱佢又唔係，兩隻手響度郁嚟郁去唔知放邊度好
而呢個時候，追完貓妖番嚟諗住匯報比軒轅皓知嘅凌嘯峰剛好見到呢一幕，即刻掩住個咀忍住笑！然後，伸出雙手對軒轅皓做左個攬住嘅動作，同時用口形講“攬住”兩個字
軒轅皓見到凌嘯峰個口形同動作之後，表現得非常尷尬，但係亦都好配合咁去做，只係做完之後塊臉有啲可疑嘅紅暈
我繼續喊到上氣唔接下咁，直到軒轅皓攬住我果一刻，我嘅情緒先慢慢咁穩定落嚟！因為佢嘅懷抱入面有能夠令我感到安心嘅元素。。。
我慢慢咁放開佢，然後抬起頭同佢講左聲“軒轅皓，多謝你！”
點知佢望住我，突然響度笑，同之前響office嘅假笑唔同，呢個係發自內心嘅笑，我承認有一刻我係比佢個笑容迷左一下，但係我對於佢無啦啦望住我唔知笑啲咩比較在意啲
凌嘯峰見我一臉迷惑咁嘅樣，就遞左張紙巾比我，同時指指塊面，我瞬間明白！我喊到成臉眼淚鼻涕比人笑。。。失禮死人啦！
響我抹好塊臉之後，凌嘯峰都已經同軒轅皓匯報好果邊嘅事，於是佢就打算行過去睇睇，當佢行左兩步之後，就轉頭望住我問“你去唔去？”
我聽到佢問之後，突然又諗番起啱啱嘅人體解剖！“嘔。。。” 我馬上跑去個垃圾筒度嘔到天昏地暗
我相信我嘅行動已經答左佢，所以佢最後吩咐左凌嘯峰睇住我之後，就自己一個行過去，而我嘔到無野再嘔之後，就由呀峰扶住我去附近長櫈度坐底
隔左陣之後，佢地班人都收隊行番嚟，而軒轅皓就走埋嚟問我“你有無好番啲？仲洗唔洗休息多陣？”
軒轅皓雖然仲係冷冰冰咁，不過唔知佢係咪已經比我喊到驚左，我感覺佢好似有啲唔同左咁，因為佢講野果陣已經無左果種拒人千里嘅感覺
我對佢笑一笑，然後答佢“好番好多，無事！”
佢聽到之後，點一點頭然後有啲遲疑話“咁我地而家番去落口供。。。你OK嘛？”
我諗一諗，雖然而家好累。。。但係番到屋企都應該瞓唔著，咁不如去落口供順便了解下成件事仲好！於是我就開口答應佢
就響臨行之前，我突然諗番起狗仔！於是我大聲咁叫左兩聲“為食狗”，可惜佢都無再出現，唔知佢會唔會已經比野獸食左呢。。。好擔心。。。
行到出路口，一切都好似已經恢復番正常，雖然而家已經係凌晨一點半，但係依然有人響度出出入入，見到咁，我都鬆左一口氣
去到停車場，我地就上車離開，而由於我真係太累嘅關係，所以一上到車，我就瞓著左。。。仲瞓到天昏地暗，直到我聽到有人一直響我耳邊叫《秦天晴》，我先慢慢咁醒過嚟
瞓到迷迷糊糊嘅我一起身就抓抓頭抱怨咁話“做咩係咁連名帶姓叫人地丫。。。”好吧，有少少起床氣嘅我其實都唔知同緊邊個講緊野。。。
“咁你想我點叫你？”有把冷冷嘅聲音回答我
丫。。。！？我即刻成個人醒晒！目瞪口呆咁望住佢，而呢個時候，我發現成架車得番我同佢兩個，仲有我地唔係響警局，而係響荒山野嶺！
對於呢個發現，我好驚訝咁問“軒轅皓！我地去左邊度丫！！？”
佢對我挑挑眉，然後話“你仲未答我個問題，仲有你自己都係連名帶姓咁叫我！”
哈。。。我呢啲係咪叫搬左舊石頭砸自己隻腳。。。。
我摸摸鼻頭然後細細聲咁話“咁你可以叫我個名嘅，呀！皓！”
佢點點頭表示明白了，然後話“呢度係我屋企前面嘅空地，我地靈警通常都會響我屋企度聚集，佢地一早入晒去，但係我啱啱叫極你都唔醒，唯有響度等你瞓多陣先再叫醒你！”講完之後，佢講左句“等等”，就打開車門落左車
等等？等啲咩？。。。我聽唔明佢講咩，不過見佢落左車，我都即刻解開左條安全帶，就響我諗住打開車門嘅時候，對門已經被佢打開左，然後佢同我講“天晴，可以落車”，我先明白佢啱啱叫我等等原來係等佢幫我開車門。。。
我心諗，如果冰山唔再冰嘅話，佢呢種風度再加埋佢個樣，一定能夠秒殺萬千少女！
我地慢慢咁行入去佢間村屋度，行行下嘅時候，我忽然諗起啱啱果隻野獸，於是我就問“呀皓，啱啱我見到果隻大野獸。。。佢。。。係豹？”
佢聽到之後，望住我搖左搖頭，然後同我講“ 係貓妖 ！”
貓。。。。妖。。。。！？