秦天晴 — 有鬼 新章《畫》正式展開: 貓妖 — 第一章
而家。。。我正身處於人來人往，鬼來鬼往嘅公園入面。。。
鬼來鬼往。。。？無錯！自從三日前果件意外事件之後，我就變成左擁有陰陽眼嘅人。。。
關於呢個問題，我問過當時嚟醫院探望我嘅呀爸呀媽，而佢地亦都向我道出左一個隱瞞左我多年嘅秘密。。。
秦家同柳家都係由先祖承傳落嚟既天師世家，呢兩家嘅人一出世就有靈力，並且帶有天生嘅陰陽眼，而我就因為擁有兩家嘅血脈，同埋體質異常嘅問題，所以一出世就靈力泛濫，令到周圍嘅鬼怪變得躁動不安。。。
佢地擔心我唔能夠平安咁長大，於是我爺爺同公公就合力響我身上落左個《封靈咒》， 鎮壓住我嘅先天靈力，將我暫時變成一個普通人，同時亦都將秦家先祖所流傳落嚟嘅頸鏈放於我身上，保我不受妖魔鬼怪傷害
本來呢個咒就會隨著時間嘅流逝而逐漸減弱，然而因為今次呢件事，讓我意外激發左身上條頸鏈嘅力量，令到《封靈咒》出現左一絲缺口，從而令我恢復番少少嘅靈力，雖然唔多，但係足夠令我將呢個世界睇得清清楚楚。。。
面前嘅人同鬼不斷響我眼前穿梭，來來往往，明明存在響同一個時空，但係並無任何交雜，就如呀晞所講咁，人有人嘅世界，鬼有鬼嘅世界，河水不犯井水
然而呢個人鬼交錯嘅空間，亦會有唔安份嘅鬼怪出嚟禍害人間，破壞人間安寧，而人間亦都會有人利用鬼怪嚟作惡多端，於是，人鬼兩界就有使者出嚟維持秩序，鬼界有鬼差，而人界就有傳統嘅代表 — 天師，仲有現代嘅代表。。。靈界警察！
“靈界警察。。。”我喃喃自語
自從果日軒轅皓問我有無興趣加入之後，我就一直思考呢個問題。。。本來嘅我，一直以為我嘅人生會平平淡淡咁過，但係經過office有鬼事件之後，再加上知道埋我身體上嘅秘密，我就知道，我未來嘅日子再無可能過得平凡。。。
我低下頭望住部電話，按入去聯絡人電話簿入面，軒轅皓三字出現響我嘅眼前。。。
我，該何去何從呢。。。？
“小姐！”突然有人叫左一聲，將諗野諗到入晒神嘅我叫醒左，我抬起頭一望，道士？
“小姐！我睇你面色蒼白，印堂發黑，運氣好似唔係幾好咁喎！咁樣好易撞鬼架！你要唔要我幫你祈個褔，保下平安咁呢？”道士掛住一個職業笑容咁同我講
我聽完之後，對佢笑一笑然後同佢講
“唔需要啦，唔該”
佢聽到我答之後，就即刻好急咁同我講
“小姐！咁樣好危險架喎！一陣撞起啲污糟野上嚟嚇到你就唔好啦！我幫你祈個福好快架咋！最多收你平啲，原價9千9，見你靚女，收你3千9啦！”
咦！唔通。。。我遇到傳說中嘅神棍！？
我望住佢，眼定定咁望住佢，然後望下佢嘅左面，再望埋佢嘅右面，之後同佢講
“嗯。。。我諗你需要我幫你祈福多啲喎，你左面有個老人家，右面有個小朋友跟住你，你係咪對佢地做左啲。。。。”
點知我都未講完，佢就大叫“哇！！！鬼丫！！！”然後飛速咁跑開 ，速度之快令我目瞪口呆
而呢個時候，有個女仔拎住一堆野咁走埋嚟問我
“晴晴，你企響度望咩丫？”
一見到佢，我就故意嘟起咀扮不滿咁話
“你仲好意思問我望乜，何思語小姐，我好似等左你四十五分鐘啦喎！”
佢見到我咁嘅樣就即刻一臉討好咁同我講
“人地響度做緊事前準備丫嘛，我知你唔會咁小氣嘅，係咪？”講完，仲舉起佢手上嘅野比我睇
我睇一睇，有消毒藥水，清潔劑，水桶，毛巾，膠手套一大堆野，果然真係準備充足喎！
“哼，見你咁有善心，我就大發慈悲放過你一次啦”我開玩笑咁同佢講
何思語係我嘅好姊妹，佢係一個好有愛心，好樂於助人嘅人，當佢知道我出左意外被公司放左三個月有薪假之後，擔心我會無所事事，所以就捉我出嚟陪佢做義工，而我又真係無乜野做，個人又好番晒，所以就答應左佢
而今日，我地就要去獨居老人屋企做家居清潔，對於第一次去探訪獨居老人嘅我嚟講，心情有啲緊張。。。
響電梯入面，思語見我拎住把掃把，成個人都僵硬晒咁，就忍唔住響度笑話
“晴晴！你個樣太搞笑啦，好似啲士兵拎住支矛等上戰場咁，放鬆啲啦baby！”
而我就對佢嘅笑聲充耳不聞，個心就一直響度諗，一入屋打招呼要講咩好呢？講Hello？講Hi ？ 可能會唔知我講咩架喎。。。咁就講你好啦！一於係咁話！
就響我決定左要講咩嘅時候，我地已經到左第一家嘅門口，而思語亦都伸手敲左敲對門
等左一等，對門終於打開！走左個滿頭白髮嘅婆婆出嚟，佢一見到我地就好開心咁話“Hello！你地上嚟啦！快啲入嚟啦！”
丫。。。我句你好即刻吞番入肚裡面
思語就即刻答佢話“係丫，婆婆！我地今日嚟係幫你做家居清潔架！之前應該有義工通知過你，唔知你方唔方便呢？”佢好專業咁講出左我地今日嚟嘅目的
婆婆聽到之後就即刻話“無無無，無問題！真係唔該晒你地丫！”
於是我地兩個就開始打掃啦，響過程之中，婆婆好開心咁同我地分享佢年輕嘅事，而我地亦都同佢分享左好多趣事，所以我地就樂也融融咁樣度過左一段快樂嘅時光
到走嘅時候，婆婆捉住我隻手同我講
“後生女，好多謝你地呀，我好耐都無咁開心過啦！你地仲會唔會嚟睇呀婆我架。。。？”
聽到佢咁講嘅呢一刻，我個心有種莫名嘅心酸。。。我強忍住眼睛嘅淚水，輕輕咁回佢一句
“一定會。。。所以你要健健康康咁等我地再嚟丫！”
得到我保證嘅婆婆，慢慢咁鬆開我隻手同我揮手講拜拜，佢面露不捨個樣，刺痛左我個心。。。
離開之後，我就沉默左咁跟住思語向第二間屋進發，而思語睇得出我情緒低落，就同我講
“晴晴，雖然我地無辦法去幫到佢地，但係我地可以比到佢地最基本嘅關懷，令佢地覺得有人仲關心佢地，盡自己所能，就足夠啦！”
思語講得好啱，盡自己所能足已。。。“嗯！”我對佢笑一笑，表示自己已經無事啦
去到第二間，住嘅都係一個好熱情嘅婆婆，而我地亦都好順利咁去完成左打掃嘅工作
直至去到第三間門口。。。
思語一直拍門，但係都無人應門，佢一邊拍，一邊話“奇怪啦。。。明明尋日confirm左今日可以上嚟架喎。。。點解會無人應門嘅！？”
“會唔會瞓著左聽唔到丫？”我問
佢諗左諗，決定打電話番去問問，而我就接手繼續去敲，點知。。。我敲第一下嘅時候，屋入面就傳嚟“喵”一聲，好大聲嘅貓叫聲
而對門亦都同時打開。。。