秦天晴 — 有鬼 新章《畫》正式展開: OFFICE 有鬼 — 終章
“徐立勤”三個字不由自主咁由我個咀度講左出嚟，連我自己都愕一愕然，同時，亦令Jane姐成個人定住左響度
沉默左幾秒之後，佢緩緩咁轉頭，一臉陰沉咁同我講“點解你會知？”
點解我會知。。。？即係話，佢真係徐立勤！？
如果Jane姐係徐立勤，即係呀Kan嚟嘅話，咁李宛兒嘅死就好有可能係。。。情殺！！
呢一刻，我驚覺自己好似發現在個不得了嘅秘密！
佢見我一直唔出聲咁望住佢，就飛身撲埋嚟我度，而我清楚知道，比佢捉到嘅話，後果肯定係不堪設想！
於是我閃身，對佢起飛腳，然後向門口方向跑，而佢撲空再加上比我踢左一腳之後，就撞左埋張枱到再跌左響地上面！
我即刻好快手咁打開對門，衝左出去，一邊走，一邊叫“救命”！我知道佢好快就會起番身嚟捉我，因為我啱啱踢佢果腳根本就發唔到力！唔止發唔到力，我而家全身上上下下，手手腳腳全部都無力！點解會咁！？ 。。。。
水 ！！啱啱果杯水 ！！佢落左藥！！
呢刻我真係超後悔飲左果杯水！但係後悔都無用，走唔到出去嘅話，就只有死路一條！
果然，佢好快就出現響我身後嘅不遠處！但係佢無再次撲上嚟，而係慢慢咁響我身後面行過嚟，一邊笑，一邊行。。。而我。。。就由跑變做行。。。再由行變成撐住啲枱面嚟移動。。。
見到我咁嘅情況，佢笑得更加開心！
佢話“你知唔知當初李宛兒個賤人都好似你而家咁垂死掙扎，到最後咪一樣比我奸左！”
而慢慢向門口移動中嘅我，聽到呢句說話之後，就悄悄地將唔知邊個枱面上面嘅果把界刀，收入衫袖裡面。。。
佢越行越前，而我。。。已經因為無力再移動。。。而跌坐左響地上面。。。
就響呢個時候，佢突然好似痴左線咁，指住前面話，你個賤人！你唔係死左啦咩！點解你仲響度！
我望住佢，望住我前面，空無一人。。。
呢一刻，我無辦法再諗其他！我只可以趁呢個機會手腳並用咁爬向門口，而佢仍然仲企響度左右揮拳，一邊打空氣，一邊鬧“我明明要你響我面前自殺！你明明死左響我面前！點解你而家仲響度！！”
我就響佢嘅叫罵聲之下努力咁爬，爬下爬下，突然有啲暈，然後“啪”一聲咁趴左響地上。。。
我知道藥力已經令我嘅身體有啲支持唔住。。。就響我就快失去意識嘅時候，心口度忽然傳嚟一陣又一陣嘅暖流，令到我恢復番少少力氣，個人亦都清醒番少少，於是我即刻撐番起個人繼續爬！
我邊爬邊微微轉頭望一望佢，佢仲係響度揮舞雙手，而今次。。。我終於睇得清清楚楚。。。佢對面真係有《人》。。。
女鬼。。。李宛兒。。。
徐立勤已經完全進入左瘋癲狀態，而呢個時候，我已經爬到公司門口，滿頭大汗嘅我努力咁靠住牆壁，伸長隻手去按開門制。。。
差少少。。。仲差少少。。。
“賤人！你想走！唔洗旨意！！”佢忽然察覺到我想開門走，就即刻向我直衝過嚟，同時我亦都成功按到開門制！
就響我緊緊握住手上把界刀。。。想同佢拼死一戰嘅時候，Office門口右手邊果間雜物房突然撲出左一個人！並且成功將徐立勤制服！
而我。。。已經將全身嘅氣力用光。。。“瘟神。。。”我氣若游絲咁講完呢兩個字之後，就落入一個熟悉嘅懷抱入面。。。然後。。。
我就完全失去左知覺。。。
“晴晴。。。” 嗯？邊個叫我。。。？
“晴晴。。。唔好再瞓啦。。。再瞓會變豬架！” 變豬？你就變豬。。。！
“晴晴。。。再唔起身我就好似灰姑娘個王子咁錫你一啖錫醒你囉！”
聽到呢句，“噗”一聲，我成個彈起！而原本迷迷糊糊緊嘅我亦都慢慢咁清醒過來，我望一望周圍嘅環境，再聞一聞周圍嘅氣味，令我知道我而家係身處響醫院之中
“晴晴！你終於醒啦！你等等！我去搵醫生！”嚴正晞講完之後，就馬上跑左出去
我望住呀晞衝出病房嘅身影，諗番起佢啱啱講嘅野，滿頭黑線。。。
好快，醫生就嚟到為我做檢查，而檢查嘅結果非常良好，醫生話我只要好好休息就能夠好快康復！不過佢覺得好神奇，我半日時間就醒得番，正常起碼要到第二日先會醒
對於呢個問題，我好想同醫生講。。。如果你瞓緊嘅時候一直有人響你耳邊係咁不斷咁叫你個名，不斷咁同你講野，最後仲同你講要做灰姑娘個王子錫醒你嘅話。。。可能你會醒得比我更加快。。。
醫生走左之後，我就忍唔住叫 “呀晞！”
“嗯？”佢望住我問
“比王子錫醒果個其實係睡公主！”我認真咁話
佢“。。。”無言了
就響呢個時候，有兩個人拉開病房嘅門走左入嚟，而其中一個我係認識嘅
“瘟神？”我本能反應咁叫左出口，想收都收唔番
軒轅皓身邊嘅男仔聽到我咁叫之後，忍唔住響度哈哈大笑，而軒轅皓就仍然面不改容，一臉冰冷
佢地慢慢咁行埋嚟我張病床度，而呢個時候，本來坐響我床邊嘅嚴正晞就即刻企響身攔住佢地，並且用好嚴厲嘅口氣警告佢地
“晴晴啱啱先醒番，唔該你地唔好騷擾佢休息！如果唔係咪怪我唔客氣！”
話音一落，成間房都靜晒。。。
我望住佢地響度僵持不下，就唯有“咳咳。。。”假咳兩聲嚟打破呢個尷尬嘅氣氛，順便開口問
“軒轅皓，你地搵我有咩事？”
嚴正晞用一臉不贊同嘅樣望住我，我對佢安慰性咁笑笑，佢就走番嚟我床邊坐低，而軒轅皓亦行到我身邊
一企定，佢就開口同我講“我係警察。。。”
我眼定定咁望住佢，等緊佢繼續講，而佢亦都好配合咁講落去。。。
“由於三年前李宛兒嘅死因有可疑，於是我扮演Jane，即係徐立勤嘅追求者，一直到三個月前先成功埋佢身，令佢愛上我，然後今個星期遊說佢安排我到案法現場做野，順便搜集證據，本來我地預左要調查一段好長嘅時間，但係由於有你嘅存在，引起左變數，逼得佢露出左真面目，所以我地而家已經搜集到足夠嘅證據去起訴佢！”
我聽完之後。。。第一個感覺就係有種說不出嘅委屈。。。我淡淡咁話“所以就利用我去刺激徐立勤？然後令到我響咩都唔知嘅情況底下差啲就無命？”
我抬頭望住佢“所以你就叫我小心？同我講你會保護我？”
佢望住我，同我講左句“對唔住。。。”然後房間又再次寂靜一片
隔左一陣之後，佢再次開口話“有個人想見你。。。”
人？。。。邊個。。。？
佢一講完，我眼前就多左個人。。。唔係，應該係叫鬼至啱。。。
李宛兒就咁樣，無聲無色咁出現響我嘅面前！本來我仲委屈緊，但係而家咩委屈都唔見哂，因為我嚇到了！我即刻縮埋去嚴正晞度，然後一手抱住佢
李宛兒見到我咁，輕輕咁對我笑左一下，然後話
“唔好意思。。。我嚇親你，我以為經過呢幾日之後，你已經接受左我嘅存在。。。”
其實李宛兒個樣一啲都唔恐怖，同平常人無乜分別，我啱啱有咁嘅反應，都只係因為第一次見到鬼，同埋佢突然就出現響我面前令我嚇左一跳
我放開左呀晞，同李宛兒講“唔緊要，唔好意思第一次見鬼唔係好習慣”我尷尬咁摸摸鼻頭然後對佢笑笑
佢聽到我咁講，再次溫柔一笑，然後話
” 我知道如今嘅你已經可以見到我，所以就拜託軒轅先生帶我嚟搵你，我想親口同你講一聲。。。多謝。。。”
講到呢度，佢停一停，繼續話
“其實呢三年嚟我一直存在響office入面，對住徐立勤呢個兇手，我有諗過去報仇，但係我做唔到。。。呢三年入面，我見過佢對唔同嘅女仔有另類嘅心思，於是我就出現，將佢地嚇走，令到佢地唔會再一個人留響度。。。直到你嘅出現。。。你一直無辦法見到我，所以我唯有用其他方法去叫你走。。。”
我恍然大悟“所以你就打電話叫我快啲走，你驚佢會對我不利？”
佢答“係。。。之後我發現你對我嘅事有興趣。。。我覺得你應該可以幫到我。。。所以我就上你同事身。。。同埋響你電腦度做暗示。。。好多謝你令我尋冤得雪。。。同時亦都好對唔住，令你差啲就受到我曾經所受過嘅傷害。。。好在有佢地及時出現。。。如果唔係後果就真係。。。”
聽到佢咁講，我都真係好慶幸自己可以相安無事咁坐左響度，同時亦都諗通左，呢件事，係我主動去接觸嘅，而軒轅皓，只係咁啱同我做嘅野有一部份重疊左，先會發展成一發不可收拾嘅局面，所以無理由去怪佢。。。
我望住李宛兒，然後問“徐立勤已經繩之於法，而戒指。。。”
我望一望軒轅皓，佢意會咁答“響警局證物房”
我對佢感激一笑，然後繼續對李宛兒話“戒指已經回收番。。。咁你仲有無啲咩心願未了丫。。。？”
李宛兒點一點頭，然後話“幫我將隻戒指還番比Vincent。。。同佢講。。。努力去爭取自己嘅幸福。。。”
講完之後，佢就慢慢咁響我面前消失左
“咦？佢去左邊？？”我問
嚴正晞聽到之後就話“佢了卻左個心願，亦都從office度解放左出嚟，所以而家佢已經番左去陰間報道”
我聽完之後，就用好奇異嘅眼神望住呀晞，然後問“點解你會知嘅？”
而佢就對我充滿自信咁話“你當我呢個神棍係流架？”
好吧，認真便輸了！我舉起雙手投降！然後轉頭問軒轅皓“點解徐立勤會變左做女人。。。呀！唔係，係半個女人嘅？”
軒轅皓見我已經正常番，就自來熟咁坐響我床嘅另一邊同我講
“因為佢本來係羅永倫嘅愛人，羅永倫本來係愛男人，但係有一日，羅永倫飲醉左酒之後意外同李宛兒發生左關係，發覺自己原來都鐘意女人，於是佢就同徐立勤講分手，徐立勤為左留住個男人，所以去左泰國做手術，諗住將全身上上下下都整過晒，變做一個女人，點知。。。整完上半Part之後，就知道左佢地兩個要結婚嘅消息，所以就即刻番嚟香港，用假身份Jane混入李宛兒間公司度展開報復，之後嘅事就如你所知嘅一樣”
哦。。。原來係咁。。。
咦！我突然意識到一個問題！一個好重要嘅問題！點解軒轅皓同佢身邊果位警察先生都見到鬼。。。仲可以若無其視咁帶佢過嚟嘅！？
我弱弱咁問左句“軒轅皓。。。你其實係人定係鬼丫？”
軒轅皓聽到之後，並無回答我，而係用手指一指個地下
地下？地下有啲咩。。。？我唔明。。。。
嚴正晞見我一直望住個地板，就同我講“晴晴。。。佢有影，係人”
哦。。。原來！我再望住軒轅皓問
“點解你地會同鬼打交道？”
軒轅皓聽到之後，即刻企左響身，然後用嚴肅嘅口吻同我講“因為我另一個身份係。。。。”
“靈界警察！ 秦天晴 ， 你有無興趣加入我地？”