秦天晴 — 有鬼 新章《畫》正式展開: OFFICE 有鬼 — 第五章
聽到佢幽幽咁講左句 “我。。。唔見左隻戒指。。。” 呢句說話，我全身即刻惡寒左一下，但係我仍然強裝震定，用唔係好確定嘅語氣問。。。
“你。。。？”
佢望住我微笑，輕輕咁點頭。。。
就響呢個時候，“砰”一聲，我眼前嘅人突然趴左響枱面，取而代之，面前多左個男人！一個高大威猛，靚仔又冷酷嘅男人！
傳說中嘅男神！？
呢一刻，我呆左咁望住佢，真係呆住左！但係我可以舉起雙手對燈火發誓，我絕對唔係因為發花痴！而係。。。
我啱啱見佢拎住個電話一野拍暈左Cindy！一野拍暈左Cindy！！一野拍暈左Cindy丫！！！（重要的事說三次）
我好震驚睜大雙眼咁講 “你。。。”
可惜我後面嘅說話都未講到出口，就已經響完全嚟唔切反應嘅情況底下，“哇！”一聲比佢強行拖走左
直到行左幾步，我先反應過來！想甩開佢隻手，點知佢竟然用力咁捉到實一實！無論我點掙扎都無用！直到佢拉我去到Canteen嘅後樓梯，先鬆開我隻手
然後。。。佢《壁咚》我。。。囧
正常被男神《壁咚》係一件好幸福嘅事，但係而家呢個唔正常嘅情況底下我淨係想反抗！
就響我想推開佢嘅時候，佢講左句野，成功咁令我已經舉起左嘅果兩隻手定住
佢，竟然帶住質問嘅口氣咁同我講
“你啱啱對個女仔做左啲咩嚟！？”
我聽到真係“下！？” 左一聲，覺得難以至信！先生，你做咩搶左我句對白丫！？
而佢好似以為我聽唔清楚佢講乜野咁，就對我冷冷咁講多一次
“我問你啱啱對佢做過咩嚟丫！”
哈哈哈！我被佢氣笑了！內心大笑左三聲！呢啲係咪叫做惡人先告狀！？
我立即大聲反駁 “先生！你無野丫嘛？你啱啱無啦啦走去打暈左我個friend，然後捉我走！而家再走嚟問我對我個friend做過乜？”
“唔係你個friend”佢回我
我 “。。。。”啞口無言，果然男神係神唔係人，無法溝通
“咁請問佢唔係我個friend，咁係邊個個friend呢？你個friend？” 我深深吸口氣，平靜咁問
佢聽到我咁講，就眼直直咁望住我雙眼，同我講
“佢啱啱比鬼上身，所以佢唔係你個friend，仲有我啱啱無打佢，只係拍左佢一下將隻鬼拍番出嚟 ”
將隻鬼拍番出嚟。。。？咁都得！？
咁似武俠片果招隔山打牛嘅。。。
我微微轉頭，望一望佢撐住牆壁嘅手掌，再諗諗，如果”砰”一聲果下都叫做拍嘅話，咁比佢打咪。。。。。。
我沉醉於我嘅亂想世界入面，完全無視左眼前呢個人，而佢見我無晒反應，就開口問
“你點解要用招魂術？你係咩人？”
佢嘅問題令我稍微回過神來，而唔知邊度嚟嘅勇氣令我勇敢伸前個頭，瞪住佢咁話
“我唔知咩係招魂術！仲有本小姐前前後後左左右右上上下下都係一個女人！”
話音一落，樓梯口對防煙門突然打開，而隨行入嚟嘅人正用一臉驚訝嘅表情望住我地，然後用高八度嘅聲線問
“你地響度做咩丫！？”
唔知點解，我有種好似比人捉奸在床咁嘅feel。。。我諗係因為我地而家個動作實在太。。。曖昧了
雖然尷尬，但的確係一個比我離開嘅好機會，於是我用力推開呢個怪男人，然後轉頭對門口果個人話
“Jane姐，我地無野架！”
就急急腳咁走人，因為我好擔心Cindy，唔知佢有無事
秦天晴離開左後樓梯之後，Jane就即刻撲上去緊緊咁抱住軒轅皓，然後充滿哀怨咁話
“呀皓，你點可以做啲對我唔住嘅野架。。。”
軒轅皓聽到之後，馬上好似變左個人咁，溫柔咁摸摸佢個頭話
“珍珍，我又點會對你唔住呢！只係啱啱。。。佢。。。”
Jane聽到軒轅皓欲言又止咁，即刻放開佢，然後好激動咁話
“佢勾引你！？肯定係佢勾引你！係咪！？”
軒轅皓見Jane咁激動，就攬住佢話
“你放心，就算佢。。。我都唔會變心，我個心，只有你”
Jane聽到後即刻小鳥依人咁倚靠響軒轅皓心口度，甜笑回應道
“嗯。。。我知道了”
呢一刻，佢以為自己已經保住呢個男人嘅心，但係佢並唔知道，其實攬住佢嘅人，表情根本一啲都唔溫柔，有嘅只係冷漠，佢更加唔知道，原來佢啱啱果個狠毒嘅表情，已經落入響軒轅皓嘅眼中
我快步走番出去Canteen搵Cindy，完全唔知道自己無啦啦中左槍，而成為左Jane姐嘅眼中釘，更加無諗過男神故意誣捏嘅誤會，會對我影響咁深
去到Canteen，見到Cindy響度食緊飯，好似乜事都無咁，頓時鬆左一口氣。。。因為我啱啱真係好驚男神果下會打到佢內傷。。。
Cindy一見到我即刻問我去左邊，我見佢好似咩都唔記得咁，就以去左廁所為藉口打發佢，而佢就同我講
“可能呢排煲劇煲夜左，竟然坐響度都瞓著左喎！唉！仲瞓到個背脊好痛。。。今晚都係早啲瞓先得啦！”
聽到佢咁講，我努力咁催眠我自己，我咩都唔知。。。我咩都唔知。。。
Lunch time 完左之後，我地有講有笑咁行番office，推門入去，Cindy突然話
“咦！天晴，好似有人坐左你個位嘅？。。。男神！？”
我望一望，心諗 ”唔係掛。。。又係你！？”
Cindy為左同男神打招呼，就拉住我飛速行番埋位，一行埋去，即刻開口話 “Hello,我叫Cindy丫” 再附上一個大大嘅笑容
但係男神只係對佢冷冷咁點一點頭，就轉移視線望住我，笑一笑，講左“軒轅皓”三個字，就轉身離開
我望一望Cindy，佢果然比男神果一笑電傻左，再次雙手捧臉超陶醉。。。唔知點解呢刻我好想同佢講
”你個背脊咁痛係因為你個男神啱啱打暈左你丫！！！”
但諗諗下都係算。。。我驚佢會以《男神同我有身體接觸》呢個理由繼續醉落去。。。。。。
而我呢，就對於佢突然走嚟講左三個字嘅《自我介紹》，表示不能理解，所以將佢呢個行為歸納為。。。“有病。。。” 我細細聲咁講，然後坐低繼續做野
然而，無人知道不遠處嘅房門背後，有一對怨毒嘅眼睛，默默咁注視住呢一切。。。