秦天晴 — 有鬼 新章《畫》正式展開: OFFICE 有鬼 — 第四章

聽完佢講之後，我個腦不斷諗番起佢講嘅果句《純正天師血統嘅後代》同《承繼砍妖除魔嘅天命》，突然有一股正義嘅使命感渾然而生，對於鬼呢樣野嘅恐懼感已經減輕左不少！

雖然而家嘅我無乜野可以做到，但係有一樣野我而家一定要做。。。就係。。。出發搵食！今次真係真·肚餓了！

“呀晞，我發現你原來都好有潛質做神棍架喎！”

我豪氣咁拍番佢膊頭咁話，然後轉身走人

嚴正晞聽到秦天晴果句《有潛質做神棍》感到哭笑不得，心諗





 ”我地個個都係神棍，咁你係。。。？真係小傻瓜。。。” 

苦笑咁搖一搖頭，想去反駁，但係諗左下又覺得正常人好似又真係唔會講啱啱果啲野，唯有果斷放棄，快步跟上去啦

響我地食飽左之後，呀晞就送左我番屋企，而佢就響我嘅注視底下離開，無辦法，今晚講神棍講得太多，擔心佢同我呀爸呀媽講野果陣一個唔小心爆左大獲我就哈哈。。。了！

當佢走左之後，我就番左入房，坐左響書枱面前，靜靜地咁諗番女鬼嘅事

點解佢要叫我走呢？





點解咁多人都見過佢呢？

佢又點解會留連響office入面呢？

我知道就算我諗足一晚都唔會有結果，所以，對於呢啲問題，我決定去搵經驗人士（即係我媽）商討一下，而得出嘅結論係。。。

女鬼，好有可能曾經係呢個office嘅人，又或者佢係對office某啲嘅野有留戀而留底，又可能係佢漏底左好重要嘅野響office

雖然，而家有個大概嘅方向，但基于我對呢個office嘅一切都唔係好熟，所以我決定瞓醒聽朝番公司問下Cindy，希望響佢度八到啲消息啦！





就響秦天晴瞓著左嘅時候，柳鳳儀同秦洛坐左響客廳張沙發度，兩個人神色都好凝重

柳鳳儀憂心忡忡咁對秦洛講 

” 老公。。。晴晴開始對鬼嘅野有興趣。。。我驚。。。”

秦洛明白柳鳳儀嘅不安，就安慰佢道

“嗯。。。我知道，啱啱你地兩母女講嘅野我都聽到，晴晴都大啦，有啲野其實佢應該要知。。。我諗而家都應該係時候啦。。。”

柳鳳儀聽到秦洛咁講，即刻話“老公！晴晴係大個左，但係當初我地離開家族唔係就係想個女可以少啲負擔咁成長咩？如果最後都係行番果條路，咁樣我地會辜負左朗朗嘅苦心！”

秦洛聽到柳鳳儀咁講，只有嘆氣 “唉。。。見步行步啦。。。你都知。。。條鏈響晴晴身上，就算我地而家唔解個咒，時機一到佢都會自己解，到時就唔係你同我去揀，而係無得揀。。。”

嘆氣聲過後，客廳再次回復一片寧靜





第二朝，瞓醒一覺嘅我，完全唔知道尋晚呀爸呀媽原來傾過啲關於自己嘅問題，就精精神神咁出門口番工

番到公司，一開門就聽到班女同事響度話   ”哇！靚仔丫“ ， ”佢好Man丫” ， “佢偷望我丫” 。。。

我滿頭黑線，心諗“咩事一早就發晒姣呀。。。”

事不關己，己不勞心，得番兩日時間交功課，緊係嗱嗱聲番埋位做野啦！

忙到lunch time ，一直處於非禮勿視，非禮勿言，非禮勿聽呢個狀態嘅我，決定放底手上嘅工作出去食lunch，其實最主要係想問下Cindy關於女鬼嘅野

點知一到公司Canteen，佢就雙手捧臉，一臉陶醉咁話

“天晴！你見唔見到丫！今日嚟左個新人跟住Jane姐做野，超靚仔！男神丫！！高大威猛！哇。。。（下刪無數讚美）”





佢一直陶醉於《男神》之中，我根本就無機會講野，聽左一陣之後，我諗番起自己嘅目的，於是我決定。。。對唔住都要做一次

“Cindy！！！其實我有啲問題想問下你丫！！！” 我狠心咁打斷佢

“雖然佢好似冷冷淡淡咁。。。丫？問題？”佢終於反應過嚟

“少有喎，你都有野想八，嘿！你問啦，放心喎！我連七樓同十五樓果兩個男仔一齊左我都知，我諗我應該答到你嘅！嘿嘿嘿。。。 ”講完，佢一臉壞笑

七樓同十五樓。。。兩個男仔。。。一齊左。。。咁你都知！我囧了

“咳咳。。。”我尷尬咁咳左兩聲，然後問

“我想問。。。關於office有鬼單野。。。其實係由幾時開始？”

Cindy聽到之後愕一愕然，然後話





“你唔驚咩？”

佢見我輕輕咁搖一搖頭，佢就話

“ 呢件事大概發生響三年前 ”

“三年前”我喃喃自語

佢頓一頓，對我微微咁點一點頭，然後低下頭，緩緩咁話

“三年前。。。有個叫Yuki嘅女仔。。。響公司女廁入面嘅第三格度。。。”

“上吊自殺！”





佢突然抬高頭睜大隻眼望住我！

我比佢呢個突如其來嘅舉動嚇左一嚇！

而佢就若無其事咁繼續講

“死左之後。。。條屍。。。到第三日先被人發現。。。但係。。。” 講到呢度，佢停左一停

然後講左句令我毛骨悚然嘅說話！

“我。。。唔見左隻戒指。。。”