秦天晴 — 有鬼 新章《畫》正式展開: 百貨驚魂 — 第十七章
軒轅皓佢地聽到秦天晴咁講，就知道佢肯定係響個屏幕度見到啲唔知咩野！
而果樣野，就已經走到去扶手電梯嘅位置，準備上嚟呢一度！
時間無多！秦天朗匆匆咁向住軒轅皓佢地打左個手勢，然後就拎住張符紙，行去距離扶手電梯出口大約兩米遠嘅位置，企響度等佢出現！
而軒轅皓同凌嘯峻見到佢呢個手勢之後，就一左一右咁企左響佢身後面嘅不遠處，準備隨時支援！
與此同時，軒轅皓亦都利用通訊裝置，吩咐秦天晴必須留響原地stand by！就連凌嘯峰都唔准過嚟！
因為佢知道，以秦天晴嘅性格，佢肯定會即刻衝落嚟！叫都叫唔住！但若果連凌嘯峰都留響上面嘅話，佢就一定會乖乖咁留低！
其實，如果出現嘅係鬼娃娃嘅話，比佢落嚟都無乜所謂！反正又唔係第一次見，同埋有呀朗同自己響度，一定可以保護到佢！但係。。。而家上嚟嘅到底係啲乜野，根本就無人知！
佢無辦法比佢落嚟冒呢個險！亦都唔想佢有危險！所以，將佢留響上面，係最好嘅選擇！
凌嘯峰當然知道軒轅皓嘅用意何在啦！所以馬上就回應佢一句“收到！”
至於秦天晴呢，佢就一隻腳響前台，一隻腳響後台，呆呆咁企左響度！
下。。。留響度Stand by！？
聽到軒轅皓嘅指示，我成個人連埋個腦都定住左響度！不過諗一諗，既然連凌嘯峰都唔去得嘅話，咁自己留響度stand by，其實都好正常姐！所以我都同樣咁回應左佢一句“收到！”
某程度上，軒轅皓都真係好了解秦天晴。。。
既然唔去得，咁我就唯有坐番埋位，繼續咁睇落去啦！
當我將個畫面轉過去三樓嘅時候，果個人亦都已經出現響呀朗佢地嘅面前！
於是，我就好奇咁問左一句
“你地面前嘅人，到底係邊個？”
凌嘯峻聽到我咁問，就輕輕咁咳左兩聲，然後答左我兩個字！就係。。。
“看更！”
咩話！？。。。看更！？
聽到呢兩個字，我真係囧左！看更！竟然係看更。。。真係估你唔到丫！
之但係。。。佢地個反應。。。完全一啲都唔似係見到個看更喎。。。
如果佢地對面果個真係個看更嘅話，咁應該都會互相咁打聲招呼架。。。但係佢地而家係一句野都無講。。。淨係面對面咁響度對望咋喎。。。
就響我一臉疑惑咁望住個屏幕，完全一頭霧水嘅時候，軒轅皓佢就開口講左句
“佢唔係普通嘅看更，而係鬼看更。。。”
哦。。。原來係鬼看更！唔怪之得啦！
不過，無啦啦邊度嚟個鬼看更。。。咦！看更！
唔係喎！諗諗下，之前羅永倫佢好似講過，呢度死過幾個看更架喎！我伸隻手指出嚟數一數，居然發現。。。今日正正就係其中一個看更嘅頭七。。。
於是，我就即刻將呢件事話比佢地知！而我講完嘅同一時間。。。
“你。。。地。。。響。。。度。。。做。。。咩。。。”
陰森嘅聲音隨即響耳機度傳左出嚟！搞到我毛管都棟左一棟！
秦天朗聽到個妹咁講，就明白到今晚係呢個看更嘅回魂夜！心諗。。。人都已經唔響度啦，竟然仲掛住番工做野！
“唉。。。！”佢微微咁嘆左一口氣，然後就開口同個鬼看更講
“你好丫，今晚係百貨公司嘅活動日！我地係活動嘅負責人！而家正響度進行緊。。。”
點知，佢都未講完，個鬼看更就即刻好兇咁話
“活。。。動。。。？今晚無活動！你地快啲走！”
“快啲走。。。！”
“你地快啲離開呢一度。。。！”
聽到佢咁講，秦天朗佢地就互望左一眼，唔知應該點做先至好。。。
老實講，暫停呢個活動對佢地嚟講，又無損失嘅！不過佢地等等仲有行動，根本就無可能離開呢度。。。
但係。。。佢嘅執念咁重，如果唔順佢意嘅話，等等一時諗唔開，變成惡鬼！咁就大件事啦！
然而，就響佢地陷入兩難局面嘅時候，響佢地嘅身後面，就突然發出左重物跌落地，先至會發出嚟嘅“砰！”一聲！
聽到呢下聲響，佢地就即時轉身一望！
點知，竟然見到啱啱仲響佢地面前嘅鬼看更！已經無聲無息咁出現響事發嘅地點！而且佢仲將個當時人半天吊咁拎起，同時用陰森嘅語氣指責佢
“你。。。做乜響度搞破壞丫！？”
見到咁既情況，離佢最近嘅果位手足，就即刻抽出枝伏魔棒，諗住上前救佢啦！但係就比佢身邊嘅守護靈搶先一步，率先咁飛左過去！仲同個鬼看更響度周旋緊！
搞到佢拎住伏魔棒嘅手，都定住左響度！唔知打落去好，定唔打落去好！
打落去嘅話，一陣打中左個細路咁點算！？但係唔打落去，又好似救唔到個男人喎！？
而呢個時候，佢頭頂上面嘅守護靈，就發現自己實在係太細粒，根本就唔係果個鬼看更嘅對手！
於是，佢就拍左幾下手，然後伸手指住個鬼看更！再做出左一個抱抱嘅動作！
當佢做完之後，本來響度周圍嚇緊人嘅守護靈，就意會到佢係咩意思！所以佢地就即刻飛晒過去幫拖！
雖然班守護靈係人多勢聚，但係個鬼看更唔單止唔驚佢地，仲堅持要捉住手上嘅果個男人！點都唔放手！
結果，個男人比佢半天吊咁左閃右避周圍飛之後，就不斷咁發出一啲求饒嘅慘叫聲
“哇。。。我錯啦。。。對。。。哇丫。。。唔住。。。丫。。。”
可惜，個鬼看更完全係聽唔入耳！佢只係不停咁重覆
“你搞破壞。。。整爛啲野。。。”
靈警嘅手足見到咁嘅情況，就梗係個個都追住個鬼看更，睇下有無其他辦法可以將個男人帶番落嚟地面啦！
而其他參加者呢，就梗係勁驚啦！佢地一見到班鬼走去左邊，就馬上走晒去右邊！一見到班鬼走去右邊，佢地就即刻走晒去左邊！
如是者，佢地咁樣左跑右跑！左碰右撞之後，就搞到個場面比剛才更加混亂！
眼見呢個鬼追鬼，人追人，人又追鬼嘅情況，企響旁邊完全無出手嘅軒轅皓佢地，就互望一眼，然後苦笑左一下。。。
其實，佢地之所以無出手，係因為佢地感覺得到，呢個鬼看更佢只係純粹想教訓下個男人！並無傷人嘅打算！
因為，如果佢真係要傷人嘅話，一早就將個男人拋落地下，再拎起，再拋落地啦！
之不過，佢地真係無諗過成件事會演變到呢個地步！
望住呢個亂成一團嘅場面，佢地好無奈咁搖搖頭，諗住出手去結束呢場鬧劇！
點知。。。響呢個時候，佢地身後嘅電梯口，突然又走左一個人上嚟！
而呢個人一上到嚟，就即刻開口大叫左一聲“救命！”
呢一下嘅呼救聲，令到所有人都好愕然咁望住佢！包括果個鬼看更！
就連隔住個屏幕嘅我，都好震驚咁望住佢！因為呢個人，就係羅永倫！
鬼看更一見到佢，就即刻將手上面嘅人，放番落地面，然後飄埋去羅永倫身邊，叫左佢一聲“老闆！”
而我就馬上將三樓嘅畫面，轉番去一樓果度，睇下發生左啲咩事！
點知一睇。。。。居然發現一樓果邊，根本就一個人都無！
無理由架！咁啲人去晒邊丫！？
羅永倫走左上嚟三樓求救。。。唔通。。。佢地上晒二樓！？二樓有危險！？
於是，我就即刻將一樓嘅畫面，轉換成二樓嘅畫面！
而就響呢個時候。。。
“噗！”一聲，我身邊嘅門簾突然被打開！