秦天晴 — 有鬼 新章《畫》正式展開: 百貨驚魂 — 第十六章
我望住個屏幕，顯示住一樓嘅畫面，由羅永倫上台致詞，到宣傳部嘅人上台介紹遊戲嘅玩法，再到我地班手足上前幫手分組，分發小電筒，同埋派發我特製嘅道具小魔杖！
呢一切似乎都進行得好順利咁。。。希望呢一個好開始，會一直持續到結尾啦！
然而，就響一切都準備就緒嘅時候。。。
“啪！”一聲，全座百貨公司嘅燈，都同時間熄滅晒！
呢個突如其來嘅一下，令到好多參加者都嚇左一跳！繼而發出一啲尖叫聲同埋咒罵聲！
“搞錯丫！無啦啦熄燈！”
“咪就係！想嚇死人咩！”
“係囉！人嚇人，無藥醫架！”
而呢啲聲音，就透過耳機，傳入我嘅耳朵之中！
我即刻笑左一下！真係估唔到呢個opening會引起咁嘅大迴響！
講真，你參加得呢個活動，其實就預左會比人嚇架啦！就好似你比錢入去哈囉喂咁，都係為左要去感受一下驚嚇嘅氣氛咁姐！
不過，我聽得出佢地並無惡意！只係單純發洩情緒姐！點都好過果啲強裝鎮定，響度冷言冷語，講埋啲咩“小兒科啦！”，“咁無聊架！”，“無啲新意”，“睇下一陣我點玩番佢地！”嘅人丫！響度扮晒野咁！
我望住畫面上面，比守護靈重點圍住嘅果幾個人，輕輕咁搖搖頭，心諗
“一陣你地就自求多褔啦！”
隨住所有人都打開晒啲電筒，作為第一隊領隊嘅軒轅皓就帶住佢嘅隊員正式出發！
其實，響今晚參與嘅三十人入面，只係得十八個人係真正嘅參加者，而另外果十二個，全部都係特殊部隊入面嘅手足所混入去！
當然，我地嘅目的並唔係為左要湊夠人數啦！我地之所以咁樣做，完全係為左保障參加者嘅安全！
因為無人知道班鬼娃娃同姚魅兒會唔會突然之間出現，殺我地一個惜手不及！所以，防患於未然會比較好！
我地嘅計劃係將三十人分成六隊，每隊入面有兩個手足響度，再加埋每隊都會跟隨一個光明使者，即係軒轅皓，凌嘯峻，同埋呀朗佢地其中一個，咁參加者同靈警嘅比例就會變成一比一！
咁樣嘅話，我地就可以採取人釘人嘅戰術！就算之後真係有啲咩突發事件發生，都可以即時保護到佢地嘅安全！
眼見軒轅皓帶住佢果隊Team A ，已經上到二樓，開始去搜索緊第一條神聖之羽嘅時候，我個心，就有啲既興奮，又期待嘅感覺！
唔知。。。班守護靈會點樣招呼佢地呢！？
而呢一刻，軒轅皓嘅想法就同秦天晴完全咁相反！佢唔單止唔興奮，仲覺得好煩躁！
因為佢呢隊嘅果三個參加者，完全係成班小學雞嚟！除左不斷響度吱吱喳喳講唔停之外，仲對住佢不停咁作出挑釁嘅行為！
“喂！你係咪啞架！？同你講野丫！”參加者A超級囂張咁話
而另外嘅參加者B同C就即刻跟住叫囂咁話
“咪就係！問下你果條毛收埋左響邊之嘛！洗唔洗唔睬人丫！？”
“咪係囉！仲話咩光明使者喎！咪玩啦！廢柴就有你份！”
特殊部隊嘅手足聽到佢地咁講，條眼眉就係咁不停咁跳。。。
雖然呢兩位隊員係第一次同軒轅皓佢合作，但係佢地就對於佢嘅處事手法相當了解！
因為軒轅皓佢曾經做過佢地嘅教官！仲有個外號叫魔鬼教官！佢唔止外表冷酷，內心仲係腹黑無比！
你地幾個好惹唔惹，走去招惹佢。。。真係祝你好運啦！
而軒轅皓就對佢地嘅挑釁完全咁無視！佢只係冷冷咁講左“五分鐘！”呢三個字之後，就企埋左一邊！
搞到果三個小學雞都無晒癮！求其講左佢幾句之後，就開始四圍咁搵！
呢一刻，雖然我只係隔住個屏幕望住呢一切，但係透過軒轅皓身上嘅通訊裝置，我幾乎一字不漏咁聽到晒佢地所講嘅說話！所以，我真心有種想拍扁佢地嘅感覺！
不過當我見到下一幕，我就忍唔住笑左出嚟！因為。。。
參加者A打開左其中一間試身室嘅門簾之後，就成個人向後跌，然後跌跌撞撞咁跑去軒轅皓身邊，語帶哭腔咁話
“無。。。無。。。無頭。。。果。。。果度。。。有。。。有鬼丫！”
而參加者B同C都唔好得佢好多！佢地兩個都極速咁衝到去軒轅皓嘅面前，然後一個話響櫈底度見到兩隻斷手！一個就話響天花上面倒吊左個得半邊身嘅細路，仲同佢揮手打招呼！
望住面前果三隻小學雞接近崩潰嘅狀態，軒轅皓冷冷咁望住佢地，忽然間詭異一笑，然後伸手指住佢地嘅身後，陰森森咁話
“你。。。指。。。佢地丫？”
ABC聽到之後，就轉身一望。。。然後。。。佢地就同時大叫一聲“哇！鬼丫！有鬼丫！”，就向住扶手電梯衝左落去！
淨番兩位手足響度面面相覷。。。
就係咁。。。TEAM A 就玩完了 ！
見到Team A 嘅隊員由二樓衝左落嚟一樓，頭也不回咁向住外面衝出去，仲一邊跑一邊大叫“有鬼丫！”咁樣，搞到其他嘅參加者都嚇左一嚇！然後相繼退出！
結果走下一個，走下又一個，走走下就得番三team人響度！
對於呢個情況，呀朗就對住緩緩向住佢走埋嚟嘅軒轅皓，講左句“Good Job！”
咦。。。！Good Job。。。！？莫非。。。軒轅皓係故意將佢地嚇走，等佢地以最快嘅速度衝落一樓，去擾亂其他人個心，再順勢將一部分人嚇走！
如果係咁嘅話。。。咁我應該知道，軒轅皓所講嘅五分鐘，到底係啲咩意思啦！
原來佢並唔係對班小學雞講，而係對班守護靈講！意思係。。。
五分鐘。。。同我嚇走佢地！
丫。。。好一招借刀殺人。。。！
無錯！呢個正正就係軒轅皓同秦天朗所諗出嚟嘅方法！因為佢地覺得一team一team咁去，實在係太過浪費時間！
就唯有用呢個方法，將啲人嚇走！令到參與人數大幅減少，從而令到活動時間大大咁縮短！
雖然，呢個方法係好衰，但係佢地等等仲有更重要嘅野去做，所以。。。都係快啲完成呢個活動，然後去做正經野比較好！
而羅永倫並唔知道自己嘅活動，已經被人全面咁控制住！仲以為係個活動太成功，先至會將啲人嚇到走夾唔抖！
於是，佢就好興奮咁拎起支咪，同淨番嘅人講
“相信大家都應該見到第一隊嘅人，有幾咁驚慌架啦！亦都見到其他人連去都未去就已經退出左！
不過你地唔洗咁驚！因為我地啱啱商量過，為左令大家可以好好咁感受呢個《百貨驚魂夜》嘅活動，所以我地決定將淨番嘅果三隊人，組埋一齊同時出發！
至於最後嘅勝利者係邊個呢。。。咁就要睇下大家嘅表現如何啦！”
就係咁，最後果三隊人就一齊向住二樓進發！
我望住屏幕上面已經到達二樓嘅果十幾個人，忽然覺得好搞笑。。。
因為佢地好明顯咁分左做兩批人，一批就步步為營，驚驚青青咁！而另一批就淡淡定定，響度行行企企，完全好似置身事外咁！
當然，守護靈並唔會因為人多，就唔出嚟嚇佢地啦！反而係嚇得越嚟越起勁！搞到班參加者不停咁發出尖叫聲！
然而，人響驚慌嘅狀態入面，係最能夠發揮出潛能！所以，過左無幾耐之後，終於都有人識得揮舞枝魔杖嚟進行反攻！
“哇！你同我走開丫！”有個女仔捉住凌嘯峻隻手臂，然後揮動手上面枝魔杖，向住對面嘅守護靈一指！
微小嘅雷降咒術，立即向住嚇佢嘅守護靈，直直咁打過去！發出極為輕微嘅“啪！”一聲！果個守護靈就馬上消失響佢嘅面前！
而呢一下嘅聲響，就瞬間咁吸引左所有人嘅注意，亦都令到佢地明白到魔杖嘅用處！
於是，佢地就由被動嘅一方，轉為主動嘅一方！追住啱啱嚇到佢地死死下嘅守護靈滿場飛！
然而，佢地並唔知道嘅係。。。呢一切。。。都係班守護靈逗佢地玩嘅把戲！
其實，秦天晴純粹係為左增加樂趣，先至會整支魔杖出嚟玩下！而本身扮鬼嘅都係靈警嘅兄弟，根本就無可能用符咒嚟攻擊佢地！所以，支魔杖所發出嚟嘅雷降，佢嘅威力就只有原來嘅幾十分之一，就算打中人都不痛不癢！
簡單啲嚟講，呢一招雷降就只係空有一身華麗嘅外表，實則上卻係一啲攻擊力都無！
所以，果班自以為已經消滅左守護靈嘅參加者，查實係一叮點都無傷害到佢地！
而果班守護靈亦都只不過係趁佢地攻擊嘅時候，瞬間咁隱身，再配合埋雷降本身所發出嚟嘅“啪！”一聲，先至令到佢地有種錯覺，以為自己擊中目標！
好快，就有人響其中一個鞋盒入面，搵到第一條羽毛！
在場嘅人馬上就發出激烈嘅歡呼聲！然後大家就向住三樓浩浩蕩蕩咁出發！
”嗯。。。照呢個情況，如無意外嘅話，佢地應該好快就上到嚟！”
我望住已經空蕩蕩嘅二樓，就伸出隻手，諗住將二樓嘅視窗縮小，再將三樓嘅視窗放大！
但係就響呢個時候，我發現二樓暗處仲有一點點嘅光，響度眨下眨下！咁我就留心咁望，望下果度到底有啲咩野響度啦！原來係一個拎住電筒嘅人！
我心諗。。。啲人都走晒啦，乜你仲響度架！反應會唔會慢左少少呢！？
於是，我就好心咁利用通訊裝置話比呀朗佢地知，仲有一個響樓下上緊嚟，叫佢地接應一下啦！
點知。。。佢地答我已經點齊左人先至上嚟，並無少左一個！
我聽到之後，當堂愕左一愕！
你地齊左人，咁而家行緊去扶手電梯，準備搭上嚟嘅果個人，到底係邊個丫！？