秦天晴 — 有鬼 新章《畫》正式展開: 百貨驚魂 — 第十四章
記得果晚。。。游大叔佢同我分享左好多自身嘅經歷。。。
而其中一個經歷，就係發生響好耐以前。。。
想當年，游大叔佢仲係一個要跟住師父周圍去學野嘅學徒仔！而佢師父呢，就只係一個寂寂無名嘅風水師！
雖然係咁，但係依舊都會有人去搵佢睇風水！就好似啲鄰居嘅親戚丫，朋友丫之類嘅人！
不過，由於係熟人介紹嘅關係，所以佢師父好多時都只係象徵式咁收少少，有時甚至連錢都無收！搞到車錢都蝕埋！
雖然係咁，但係佢師父仍然都堅持用心咁完成每一個委託！或者，就係因為佢呢個敬業樂敬嘅精神，所以為佢羸得一致嘅好評！
久而久之，一傳十，十傳百咁宣揚開去之後，佢師父就漸漸咁變得越嚟越出名，亦都越嚟越多人嚟搵佢去睇風水！
而搵佢嘅人當中，有唔少嘅都係啲有頭有面嘅人！當然，佢地唔係單純想搵佢師父睇風水咁簡單啦！佢地嘅主要目的，係想出錢包起佢師父，想佢專門為佢地一家去睇風水！
可惜，佢師父根本就唔係啲貪錢嘅人，而佢幫人睇風水，亦都只係為興趣！所以就一一咁拒絕晒！
不過。。。就係因為佢嘅正直，令到自己一個靠山都無，搞到之後發生左一件大事！
而呢件事，就係發生響某一日，當佢地出門幫人睇陰宅嘅時候，就有班黑衣人突如其來咁出現，然後將佢地綁左上架貨車上面！
當時佢地好驚！想去反抗！但係班黑衣人就一人拎左一把開山刀出嚟，威脅佢地再郁嚟郁去嘅話，就將佢地斬開一碌二碌去餵狗！
聽到呢個恐嚇，游大叔佢同佢師父就唔敢再郁！任由啲黑衣人將佢地帶去唔知咩地方！
架車一直開，一直咁開，過左唔知幾耐之後，佢地終於都到達目的地！而果個地方，就係一間荒廢左嘅鐵皮屋！
黑衣人一落車，就即刻行過去打開道門！隨住對門嘅打開，佢地好清楚咁見到，屋裡面坐住左一個咬住雪卡，兇神惡煞嘅中年男人！至於地上面，就靜靜咁瞓住左一班細路仔！
雖然當年嘅游大叔，佢只係一個入世未深嘅青年！但係見到呢個狀況，都隱約咁知道，對面果個應該唔係好人！
果然！果個中年男人只係講左一句說話，佢師父就即刻好激咁拒絕，講左啲咩殘忍丫，禁術丫，仲有佢呢一世都會記得嘅果三個字！就係打生樁！
其實，果時佢唔明呢三個字到底係咩意思，但係當佢師父為左救佢而答應去作法，再去到現場親眼睇住成個過程之後，佢就完完全全咁明白到打生樁到底係啲乜！
當時嘅佢，眼白白咁望住果班早已被人毒啞晒，連喊叫嘅機會都無嘅細路，一個個咁比黑衣人無情咁拋落去面前個大坑入面，再望一望身邊，佢果個忍住眼淚，強行作法嘅師父，不停咁唸出一啲完全聽唔明嘅咒語，佢個心。。。真係好難受！
而呢個時候，佢師父就突然大喝一聲！同時，耳邊亦都傳嚟響亮嘅“砰”一聲！佢馬上轉頭望番個大坑嘅位置！果度。。。已經被樁柱所代替。。。
儀式完左之後，佢師父就將嚇到呆左嘅佢帶番屋企，然後一字一字咁同佢解釋番，剛才所發生嘅事。。。
佢師父同佢講，剛才嘅果撻地方，其實係大凶之穴，陰氣太重，響果度做乜就死乜，所以根本就無可能動到土，而唯一可以解決到嘅方法，就係用打生樁嘅方法嚟破煞！以果啲細路嘅血肉嚟祭奠地下面嘅邪靈！
不過。。。果班細路就會同所起嘅建築物連為一體，成為果座建築物嘅守護靈，永遠都無辦法再投胎轉世！
果日之後，佢師父就好似一夜之間就都左十年咁，仲一日比一日虛弱！
直到第三日，佢師父先至話比佢知，原來佢早就將一生嘅福緣，以命為引，轉移晒比果班細路，以免佢受邪氣所害，受盡折磨而化成厲鬼！
然後，亦都同佢講，做人記住要正直，逆天嘅事千祈唔好做，同埋交待佢得閒就睇下班細路！
交代完呢一切之後，佢師父就撤手人寰！
由果陣時開始，游大叔佢就每個星期都會去果個地盤度睇下班細路點，一睇就睇左幾十年！
回想到呢度，我開始明白點解游大叔會唔肯將呢件事話比軒轅皓佢地知，因為佢想保住佢師父嘅名節，唔想比身為靈警嘅佢地知道，同時亦都明白到佢點解會同我講，叫我搵班細路去幫手，因為。。。
作為守護靈嘅佢地，肯定會知道鬼娃娃嘅所在位置！
我望住面前嘅細路鬼。。。丫！唔係，應該稱呼佢地為守護靈先至啱！感到好心痛，但係又無可奈何。。。始終呢件事都發生左咁多年，我根本就無乜野可以為佢地再做。。。
不過，諗左一諗之後，我都係決定開口去問下佢地有無啲咩特別需要。。。
或者。。。如果真係有啲咩可以幫到佢地，為佢地而做到嘅話，我個心會舒服番啲。。。
佢地聽到我問之後，就開始互望咁交流信息，然後就由果個守護靈妹妹，將佢地想講嘅野一一咁指出嚟，得出嚟嘅結論係
“想，玩，今，晚！”
我估。。。佢地應該係知道我地今晚有個活動，所以好想可以參與玩埋一份！
我望住佢地充滿住期盼嘅眼光，完全諗都唔洗諗就點頭答應！因為。。。無論佢地係鬼又好，守護靈又好，始終佢地都係一班細路！細路鐘意玩係天性，既然有咁嘅機會，咁點可以唔配合一下呢！？
不過。。。而家有現成嘅鬼響度，咁應該就唔洗再搵靈警班手足去扮鬼，都可以達到驚嚇嘅效果！
嗯。。。我諗今晚肯定係好精彩！
於是，我就叫佢地六點鐘響我間專用房入面等我！我到時再作安排！然後就順便問埋佢地知唔知班鬼娃娃到底哩埋左響邊度！
點知一問，佢地個個就好激動咁響度指手畫腳！仲要係你有你指，佢有佢畫！加埋一齊只有一個字可以形容。。。就係《亂》！
我望住呢個混亂嘅情況，不自覺咁伸手扶額。。。
雖然我知道佢地係想將自己知道嘅野表達比我知，但係，你地各有各做，我完全一啲都睇唔明囉。。。
唉。。。咁樣都唔係辦法！我唯有再次遞部電話比個小妹妹，等佢繼續指比我睇啦！之但係佢今次竟然無再指啲字，而係對我招招手，示意我跟住佢地行出去！
丫。。。成班一齊行番出去！？好似唔係咁好喎。。。
始終小朋友天生就對呢啲比較敏感！好容易睇得到！一陣好似啱啱咁。。。比其他小朋友見到。。。嚇親佢地就唔係咁好啦。。。
於是我就同佢地講，叫佢地唔好現身，淨番小妹妹一個響度帶我去就好！而佢地都好乖，對我點點頭之後，就消失響我嘅眼前！
眼見佢地都已經離開左，我就跟隨住小妹妹嘅身後，慢慢咁行出去！
呢一刻，我其實係超好奇，果班鬼娃娃究竟係哩埋左響邊度！搞到我一邊行，一邊響度諗，果度會唔會係啲咩雜物房丫，廁所丫果啲人跡罕至地方呢！點知。。。原來唔係囉。。。
佢竟然帶左我去電梯嘅前面，然後指住道門。。。
咁即係班鬼娃娃響電梯入面啦！但係無理由丫！我啱啱都搭過，完全唔覺有啲咩唔妥喎。。。
不過小妹妹佢又不停咁點頭，強調佢地係響呢度。。。
咁。。。即係點！？
就響我好迷茫，乜野都諗唔到嘅時候，“叮噹！”突然響起一下廣播聲
然後，前日開廣播做宣傳嘅果把女聲，就開口話
“神聖天使，光明使者對你施展召喚術！請馬上到達地庫一樓！”
咦！？神聖天使！？咪即係叫我！但係光明使者。。。究竟係乜水丫！？
不過，既然佢開擴搵我，咁我點都要落去搵下佢啦！於是我就搭電梯落去地庫，而小妹妹就繼續跟響我嘅身邊！
而電梯一邊下降，小妹妹就對住我不斷咁揮舞雙手，同時係咁向下指！連去到地庫一樓，都無停低落嚟。。。
明明呢度就係最底果層丫。。。點解佢仲會係咁向下指架呢。。。
“唔通響下面。。。？”我自言自語咁話
點知，小妹妹竟然拍手，然後比左個叻我！
下！？真係響下面！唔怪之得地毯式搜查都搵佢地唔到啦！原來係哩埋響啲咁嘅地方！