秦天晴 — 有鬼 新章《畫》正式展開: 百貨驚魂 — 第十三章
我地呆住左幾秒之後，我忽然醒起有個問題，想問下小木魚！
“小木魚，點解你叫軒轅叔叔，叫凌大叔，叫凌小叔，但係偏偏就唔叫呀朗做叔叔，要叫佢做舅舅丫？”
小木魚聽到我咁問，就含住個手指頭，諗左一諗，然後一臉迷茫咁同我講
“娘親，舅舅就係舅舅丫。。。唔係叔叔係舅舅丫！舅舅唔係舅舅。。。係叔叔？”
聽到佢果句又叔叔又舅舅嘅說話，再望住佢個呆萌樣，令到我忍唔住再次笑起上嚟！而我嘅呢一笑，就令到小木魚化身成為雞泡魚，扁扁咀好委屈咁話
“娘親笑小木魚。。。笑小木魚丫。。。”
哈哈哈。。。救命！真係好可愛丫！不過，見到佢呢個表情，我都唔忍心再笑落去！
於是，我就伸手摸摸小木魚個頭，然後同佢講
“好啦，乖！小木魚鐘意叫佢舅舅就叫舅舅啦！不過呢，爹爹嘅話。。。”
哇！？我句野都未講完，小木魚就撲左埋嚟我個身上面，攬住我條頸，然後好興奮咁話
“爹爹！爹爹好好架！爹爹脾氣又好啦。。。又溫柔啦。。。又。。。”
聽住小木魚滔滔不絕咁讚美佢爹爹。。。
呢一刻，我有啲愕然！因為，本來我係想同佢講，爹爹嘅話就唔好亂叫！
點知。。。就陰差陽錯咁知道左。。。原來真係有爹爹呢個人！
不過，諗深一層，既然佢都叫我做娘親啦。。。咁有個爹爹響度，其實都唔出奇嘅。。。
所以，我就欣然接受左呢個爹爹嘅存在！
然而。。。我無諗過響下一刻，我會因為爹爹呢個人，而完全咁震驚左。。。
皆因講到興起嘅小木魚，突然鬆開左攬住我嘅手，然後望住我，好認真咁講左句
“娘親。。。爹爹好掛住你丫。。。爹爹等左你好耐丫。。。”
我當堂好似比雷劈咁呆住左！
你爹爹好掛住我。。。仲等左我好耐！？唔係掛！？
點解小木魚講到我同佢爹爹好似係識得咁嘅！？
聽到佢咁講，我就想問下佢爹爹到底係邊個啦！
點知呢個時候，我部電話就突然響起上嚟！而打嚟嘅正正就係啱啱走左無幾耐嘅軒轅皓！
我望一望部電話，再望一望對住我眨眨眼嘅小木魚，諗左一諗之後，就決定先接電話！一陣先至再問過！
當我一接起個電話，“喂！”左第一下，軒轅皓就一如既往咁直接講出佢打嚟嘅目的！
原來，佢今日同游大叔落口供果陣，游大叔突然叫佢代為轉告一句說話比我聽，而果句說話就係
“你可以搵班細路幫手！”
所以佢想問下我班細路到底係邊個？
聽到佢咁問，我都完全係一頭霧水！
無啦啦我響邊度搵班細路出嚟丫！？
我諗左一諗，發現毫無印象！就唯有直接同軒轅皓講，我都唔係好清楚。。。再問下佢點解唔直接問游大叔啦！
點知佢話比我知，佢地四個其實都有問過游大叔，但係佢就乜都唔肯講！仲話”只要天晴佢諗清楚嘅話，就會知道我所指嘅到底係啲咩！”
聽完之後，我第一個反應係。。。游大叔！你係咪玩野丫！？做乜有野唔照直講，偏偏要我諗丫！唉。。。
我好無奈咁嘆左一口氣，然後同佢講，我今晚會《攝高枕頭諗清楚》！再順便同佢講埋聽日想要問呀朗借人手嘅事！
而佢聽完之後，就同我講番，人手方面嘅野其實佢尋日已經同呀朗佢講左！呀朗亦都已經答應左！所以聽日嘅人手分配會交由我去全權指揮！至於關於細路嘅問題，佢地會去查下！叫我唔洗擔心！
收左線之後，我就瞓響張床度，開始慢慢咁回憶番游大叔所講過嘅野，會唔會有啲咩。。。我係遺忘左架呢。。。？
但係。。。無論我點諗都好，都完全係一啲頭緒都無。。。搞到個人有種煩躁不安嘅感覺！
而呢個時候，小木魚就伸手撫摸我個前額，同時用稚嫩嘅聲線不斷重覆咁同我講
“乖。。。瞓覺覺。。。乖。。。瞓覺覺。。。”
就連為食狗，都將佢條尾有節拍咁一下又一下。。。輕輕咁掃向我嘅手背上面。。。安撫我嘅情緒。。。
結果，我就響佢地嘅雙重夾擊之下，不知不覺咁就瞓著左。。。
小木魚望住已經熟睡左嘅秦天晴，喃喃自語咁話
“唔洗驚。。。爹爹會保護你。。。”
可惜，秦天晴佢聽唔到呢句說話，如果唔係佢一定會繼續追問小木魚
”你爹爹到底係邊位丫！？”
一夜無夢咁瞓到第二朝早，我精精神神咁向住百貨公司出發！
一到達百貨公司，我就發現呀朗佢地已經唔響度！我估佢地應該係番左去休息，打算養精蓄銳，再進行今晚嘅行動！
既然係咁嘅話，咁我都要做好準備先至得啦！
於是我就一邊行去我個專用嘅房間果度，一邊打電話比羅永倫！同佢確定多次今晚個流程，仲有所有嘅道具都會齊存咁準備好晒之後，就再次換上果件神聖天使嘅衫，行出去外面做宣傳！順便去搵下傳說中嘅果班細路！
我諗。。。響百貨公司入面，最多細路嘅地方，都不外乎係童裝部同埋玩具部！所以，我就決定上番去前晚同游大叔巡邏過嘅六樓同七樓，睇下會唔會有所發現！
一上到去六樓童裝部，我就跟住前晚巡邏嘅路線開始前進，一邊行一邊周圍望，睇下會唔會有啲咩線索！
不過好可惜。。。我行左三個圈，都毫無發現！咁就唯有上七樓玩具部度碰下運氣啦！
同樣係一邊行一邊周圍望，呢層細路的確係超級多！不過睇落可以幫到手嘅細路，就一個都無！反而係走埋嚟搵我影相嘅細路就一大堆！
不過，就響我同人影影下相嘅時候，突然有個年約六七歲嘅細路仔，走埋嚟我身邊，用清澈嘅目光望住我，然後同我講左句
“姐姐。。。你快啲走啦！”
嗯？叫我快啲走？莫非。。。佢就係我要搵嘅人！？
於是我就對佢笑一笑，然後用柔和嘅聲線問
“小朋友，姐姐唔走得住丫。。。乖！話比姐姐知，點解要姐姐快啲走丫？”
點知，佢就耷低個頭，然後吱吱唔唔咁話
“姐姐。。。響你後面。。。響你隔離。。。響你周圍。。。”
唔知點解。。。聽到佢咁講。。。我開始隱約feel到佢想講咩。。。個心亦都跳得越嚟越快。。。
就響佢講到“有好多。。。”嘅時候。。。
“你個衰仔！又響度嚇人！”一把河東嘶吼嘅女人聲，突忽然響我身後面發出嚟！音量之大，嚇到我都好大聲咁“丫！”左一聲！
而呢一聲，就將我周圍所有人嘅目光，都全部放晒響我嘅身上面。。。
眼見全部人都停頓晒手上面嘅動作，眼甘甘咁望住我。。。
我眨兩眨隻眼，就決定。。。
“利路亞，哈利路亞，哈利路亞哈利路亞，哈利。。。路亞。。。”
我合埋對眼，無視所有人驚訝嘅目光，唱左哈利路亞大合唱嘅第一句！同時將天眼打開！
因為。。。我可以肯定個細路係想同我講呢樣野！
點知，我一擘大眼，我又再一次“丫！”左出嚟！
有無搞錯！我面前全部都係細路鬼！仲要係血流披臉！殘缺不全嘅細路鬼！
“利路亞，哈利路亞，哈利路亞哈利路亞，哈利路亞。。。”
哈利路亞大合唱嘅第二句已經本能咁接左上去。。。我仲一邊唱，一邊原地自轉左一個圈。。。
結果好不幸咁發現。。。呢啲細路鬼已經完完全全咁包圍住我。。。
當然，我唔會再唱哈利路亞大合唱嘅第三句啦。。。因為。。。我根本就唔知第三句嘅歌詞究竟係咩。。。
不過。。。呢個時候嘅我，除左第一眼係嚇左一嚇之外，就已經唔再有驚嘅感覺！
一來係因為見到嘅野，幾乎一次比一次恐怖。。。所以有少少免疫力啦！
二來係因為。。。我從佢地嘅身上面，完全感覺唔到果種陰冷，唔舒服嘅感覺！
但係，佢地咁樣圍住我，都唔係辦法架喎。。。
於是，我就做左個一生人都唔會做第二次嘅行為！就係。。。一邊不停咁重覆唱第一同第二句嘅哈利路亞，一邊凝聚小火球響手心上面，左右手有節拍咁向外向內咁伸展！去驅趕面前嘅細路鬼！
而我對腳呢，就不斷咁向前行，直至行到去後樓梯為止！
雖然。。。我知道呢個行為係好騎呢！但係我又無辦法唔咁做！
因為要我見住佢地，然後直直咁穿過去，我做唔到！而要我閂左天眼，響見唔到佢地但係又知佢地存在嘅情況底下，直直咁行過去，我同樣係做唔到！
其實，呢一刻我係有啲慶幸。。。羅永倫將我由巫婆變左做天使！
如果唔係。。。以巫婆嘅面貌嚟做剛才嘅行為。。。真係唔方唔哈利路亞。。。
就響我行到走廊後樓梯嘅深處，停低落嚟向後望嘅時候，果然啱啱果班細路鬼全部都跟住我尾，一個不漏咁行晒過嚟！
我望住佢地，等佢地發話，而佢地同樣望住我，唔知係咪等我開口。。。如是者，保持住呢個狀態幾分鐘之後，我終於都忍唔住率先開口！
因為佢地唔會攰，但係我會丫！
“你地跟住我做咩？”我淡淡咁開口問
佢地聽到我咁講，就互望左一眼，然後對住我，好似想講野，又好似講唔出野咁。。。
於是我就問 “你地。。。講唔到野？”
佢地竟然同時點頭！
下。。。咁大鑊！？咁我點知你地想做乜丫！？
我諗左一諗，就決定再問
“你地識唔識字？”
佢地又互望左一眼，然後就有個睇落去大啲啲嘅細路女行左出嚟，對住我微微一笑！而佢嘅呢一笑，就令我好感嘆咁響度諗，如果佢唔係成臉血嘅話，其實。。。佢都係一個幾可愛嘅小妹妹。。。
見佢話識字，我就打開左部電話，求其上網搵左一篇文章，然後叫佢將想講嘅野指出嚟！
當我好慢咁一頁一頁掃落去嘅時候，佢終於都開始指佢想要嘅字，而且唔係一個，係兩個！
我望住《遊》同《好》呢兩個字。。。再望下佢地，再諗番起游大叔同我講。。。搵班細路幫手。。。唔通。。。佢講嘅細路，就係指呢班細路鬼！？
”你地識游大叔！？”我馬上開口問
佢地即刻不停咁點頭！
見到咁嘅情況。。。我就再次開口問
“你地跟住我，係因為擔心游大叔佢有無事？想知道佢而家好唔好？”
佢地繼續不停咁點頭！
哦。。。原來係咁！
於是我就同佢地講，放心！游大叔佢無事！過幾日就可以出得院！
聽到我咁講，佢地就同時間對我鞠左個躬，我知道佢地係多謝嘅意思！
所以，我就對佢地講左句“唔洗客氣”！跟住就隨口咁問下佢地點解會響呢度！
而今次，佢地無再互望，但係就好似夾定左咁，同時瞓晒響地上面，然後有一個細路鬼響上面好似青蛙咁雙腳跳，踩過晒所有細路鬼，跳到我嘅面前。。。
見到佢地呢個行為。。。我開始諗番起游大叔曾經同我講過嘅說話。。。亦都聯想到佢地係咩意思。。。
我嘅雙手。。。不自覺咁震起上嚟。。。不過唔係因為驚。。。而係因為嬲！好嬲好嬲！
點解佢地為左起樓要咁樣不擇手段！點解佢地要犧牲呢班細路！
呢班細路，就係當年為左動土順利，而帶去地盤，活生生咁埋響個地窿入面，被樁柱一下打落去嘅生樁！