秦天晴 — 有鬼 新章《畫》正式展開: 露營 — 終章（上）
呀峻見我前面突然之間出現左三個人，就即刻衝埋嚟，好緊張咁將我護響佢嘅身後面
見到佢呢個反應，我就細細聲咁響佢耳邊講左句“無事，陰差！”，然後就行前兩步，同佢平排咁望住眼前嘅情況
而對面隻怪物，就眼定定咁望住突然出現響佢面前嘅修羅閻君，之後再將視線慢慢咁移到去佢手上嘅降魔金鈴上面，然後。。。
佢竟然招呼都無打聲，就即刻轉身飛走！
修羅閻君當然唔會輕易就放佢走啦！所以當佢轉身之際，修羅閻君就已經對住黑白無常揚一揚手，示意佢地將隻怪物攔住！
收到命令，黑白無常即刻拎出武器，瞬移到怪物嘅面前，然後對住佢同時發出攻擊！令到想逃走嘅怪物局住停低落嚟！
怪物見自己被攔住，就轉身望住修羅閻君，惡狠狠咁話
“閻王！你竟然敢攔住本王！？等我復活之日，我一定唔會放過你地！”
閻王！？修羅閻君竟然就係地府入面嘅大佬 — 閻羅王！？
聽到呢個消息，令到我好震驚咁望住面前嘅果個白袍背影！但係更加震驚嘅仲陸續有嚟！
修羅閻君對於佢嘅威脅，只係輕輕咁笑左兩聲，然後就淡淡咁開口話
“閻王。。。？呵呵！本君因為你，已經無做閻王好多年！仲有。。。你而家已經唔係當年果個可以呼風喚雨嘅鬼王！區區一個殘魂，有資格稱呼自己做本王咩？好笑！而且。。。”
講到呢度，佢停左一停，擰轉身將手上面嘅果個降魔金鈴，輕輕咁向住我拋過嚟，然後再次望住鬼王殘魂繼續話
“你差啲就殺左我最重要嘅人。。。你認為我會放你走咩？復活？你唔洗旨意！”
下！？我同你第二次見咋喎！幾時變成左你最重要嘅人丫。。。！？
我完全被佢呢句說話震驚到擘大個口得個窿。。。
鬼王殘魂聽到修羅閻君所講之後，竟然無因為佢嘅諷刺而嬲怒！反而係耷低頭喃喃自語咁話
“你最重要嘅人。。。重要嘅人。。。秦家。。。降魔金鈴。。。”
講到呢度，佢突然抬起頭望住我，然後好驚訝咁話
“唔通你就係。。。”
見佢無啦啦望住我，嚇到我個口都即刻合番埋，同時心諗
”我就係。。。？我就係乜野。。。？”
雖然我好想知道鬼王殘魂到底想講啲咩，但係修羅閻君根本就無比機會佢再講落去！
佢瞬移到鬼王殘魂面前，然後抽出鐵鏈狠狠咁掃落去！
而呢一下，令到佢地雙方就正式咁打起上嚟！
兩王相爭，令到周圍都碎石橫飛，塵土飛揚，搞到骷髏大軍都跑晒入樹林裡面避難！
而黑白無常見到呢個情況，就即刻瞬移嚟我地呢邊，將我同呀峻抱起，向住樹林嘅深處飛入去，一直咁飛，直至去到一個見唔到骷髏鬼嘅地方，先至將我地放低落嚟
一落地，黑無常就捉住我個膊頭，好嚴肅咁同我講
“呀晴，可能。。。之後會發生好多事，會令到你覺得好奇怪，或者會好迷茫！但係你唔洗驚，等到時機一到果陣，你自然就會明白！”
見佢個樣咁認真，雖然我都唔係好明佢係咩意思，但係我都下意識咁對住佢點一點頭。。。
白無常見秦天晴聽完黑無常所講嘅野之後，面無表情咁點點頭，就知道佢肯定係聽唔明又響度扮明！望住佢呢個呆下呆下咁嘅樣，就忍唔住笑左一笑，然後伸手摸一摸佢個頭，輕輕咁話
“呀晴，唔洗諗咁多，萬大事都有我地響度。。。不過而家有樣野需要你地幫手。。。”
有野要我地幫手。。。？
我搲搲頭，然後好疑惑咁望住佢，而佢見到我咁嘅樣，就繼續話
“你地都知道塊鎮魂碑碎左，令到鬼王殘魂釋放左出嚟！仲連帶埋地底下面嘅果堆骷髏鬼都走晒出嚟！而呢班骷髏大軍嘅數量之大，足以將山下面果幾條村嘅所有人，瞬間殺清光！所以，你地必須將佢地再次鎮壓住響呢個山頭入面！唔可以比佢地離開呢度！”
聽到白無常所講，呀峻反應好快咁開聲問
“咁我地應該要點做？”
黑無常聽到佢咁問，就開口話
“你地嘅先祖響好耐之前，就已經響呢度佈左一個五行封印大陣，作為鎮魂碑嘅後備使用！雖然呢個陣法無辦法再次封印鬼王殘魂，但係就可以將所有骷髏鬼鎮壓番響地底之中！所以你地要做嘅，就係響呢兩個鐘頭入面，上到山頂，搵出陣眼，然後用你地嘅鮮血，將陣法激活！”
聽佢講完之後，我就即刻舉手，問左一個我個人覺得超級重要嘅問題！就係。。。
“山頂咁大，我地點先至知道陣眼響邊度？有無啲咩記號可以比我地搵得到？”
對於我呢個問題，黑白無常兩個互望左一眼之後，就由白無常用好猶疑嘅口吻話
“當年佢地佈完陣之後，曾經響果個位置度插上左一截桃枝，但係過去左咁多年，我地都唔敢保證果截桃枝，到底會成長為一棵樹，定係已經一早就枯萎左。。。所以。。。”
好吧。。。我地就唯有祈求佢千祈唔好死。。一定要變成一棵樹！如果唔係。。。唔好話兩個鐘，就算比兩年我地，我地都未必可以搵得到個陣眼。。。
交代完所有野之後，黑白無常就即刻飛番去修羅閻君果邊，而我同呀峻，就決定先同思語佢地會合，之後再一齊搵陣眼！
但係幻想係美好，現實係殘酷。。。
當我望住周圍黑蚊蚊嘅環境，突然有一種無力感渾然而生。。。我地根本就連自己身處響咩位置都唔知道，咁又有咩辦法可以搵到佢地呢！？
而呢個時候，呀峻就突然開口問我拎左張符紙！雖然我唔知佢想做咩，但係佢問得嘅話，就肯定有佢嘅理由！
所以，我就將符紙拎出嚟遞比佢，而佢接過之後，就拎出自己部手機，對住張符紙影左張相，然後就同我講
“佢地身上都有你隻公仔，而果隻公仔入面，都有你嘅符紙！所以我地可以利用呢部特製手機上面嘅GPS功能，去偵測同你張符紙產生同樣波動嘅野，從而確定佢地所在嘅位置。。。”
講完之後，佢就將部電話遞左比我，我拎住一睇，果然地圖嘅下方，有好幾個紅點響度閃下閃下！而地圖嘅上方就顯示住我地嘅距離大概有1600米左右。。。
咁即係。。。。如果我地全力跑過去。。。順利嘅話。。。應該五分鐘就到！
呢一刻，我真係好佩服發明呢個科技嘅人！同時亦都響度諗，有呢種特殊裝備嘅人。。。佢嘅身份。。。
我抬起頭望住呀峻，好認真咁問
“你都係靈界警察？”
而呀峻聽到之後，就對我笑住咁點點頭，然後用正式嘅口吻同我講
“無錯，我係靈警特殊部隊副隊長，凌嘯峻！”