秦天晴 — 有鬼 新章《畫》正式展開: 露營 — 第十章
“竟然係佢。。。！？”呀峻望住眼前嘅怪物好震驚咁話
竟然係佢。。。咁即係。。。邊位？
聽到佢咁講，我就諗住問下佢啦！點知我都未出聲，佢就已經拉住我隻手，轉身向住營地方向跑！
而佢嘅呢一跑，好明顯就遺忘左一個好《重要》嘅人！所以當我地跑左幾步之後，身後就傳嚟一把高八度嘅聲，大聲咁話
“呀峻！咁我呢！？點解你要拖佢唔拖我丫！？”
聽到佢把聲，我內心即刻嘆左一口氣！唉。。。問世間情為何物，直叫人無言以對！你呷醋還呷醋，都唔該你睇下場合丫！呢個時候叫得咁鬼大聲。。。想果隻野注意唔到你都幾難啦！
果然！佢嘅呢一叫，隻怪物嘅目光就即刻注視住我地呢邊！跟住佢就伸出雙手，將離佢最近嘅呀佩緊緊咁捉住，然後成個人咁拎起！
“丫。。。！呀峻！救我丫！”呀佩馬上發出淒厲嘅慘叫聲
見到呢個情境，我即刻想衝過去救佢！點知呀峻死死咁捉實我隻手，拉住我繼續向前跑！而根本就甩唔開佢隻手嘅我，就唯有跟住佢嘅步伐一直咁跑。。。
而呢個時候，呀佩嘅慘叫聲亦都戛然而止！我擰轉頭望一望。。。發現佢個頭。。。原來已經比隻怪物活生生咁扯甩左。。。
見到呢一幕。。。我突然好想問呀峻。。。
“點解。。。唔去救佢。。。”
雖然佢嘅人品係好差，脾氣又唔好！但係此終都係一條人命丫！
但係我一直都無問到出口。。。因為我自己都好清楚咁知道。。。就算我地一齊上。。。都唔一定可以救得番佢。。。甚至到最後。。。仲可能搭上左自己條命。。。
或者，呀峻感受到我沉重嘅心情，所以佢一邊跑，一邊同我解釋
“唔係唔想救，而係無能力去救。。。我地根本就唔係佢嘅對手！而且。。。我呀哥知道你響度，就交代過，要我好好咁保護你！同埋你呀。。。咳咳。。。總之你就唔可以有事啦！”
我呀。。。？我呀咩丫？ 仲有。。。
“我識你呀哥。。。？”我有啲疑惑咁問
佢無開口答我，反而將拎住長槍嘅手，向上舉起，然後搖左兩搖
我望住佢舉起左嘅果隻手，再認真咁望住佢手上面果枝長槍，先至發現槍身上面刻住左無數咁多嘅符咒！就好似靈警果枝咁。。。
靈警。。。！？長槍。。。！？熟口熟面。。。！？
咦咦咦！！！？唔通佢呀哥就係。。。凌嘯峰！？
當我諗起嘅時候，我地就已經跑到去同思語佢地會合！而響我地會合嘅一瞬間，身後就傳嚟果隻怪物嘅聲音！
佢用陰森恐怖嘅聲線同我地講
“桀桀桀。。。你地仲想走去邊丫。。。”
大獲！隻怪物已經追到上嚟！
呀峻即刻擋響我地身前，大聲咁話
“我嚟爭取時間！你地快啲走！”然後就單人匹馬咁向住怪物衝過去！
我望住佢衝出去嘅背影，諗起一齊出生入死嘅凌嘯峰，心入面默默咁下左個決定！
我擰轉頭，望住比怪物嚇到傻晒嘅思語佢地，仲有進入戒備狀態嘅為食狗，神色凝重咁話
“你地快啲衝入去樹林裡面！跑得幾遠得幾遠！為食狗！你跟住佢地走！”
為食狗聽到我咁講，馬上就發出抗議咁嘅“嗚嗚”聲！同時，佢嘅身型亦都不斷咁樣變大，再變大！變成上次同貓妖對打果副巨獸咁嘅樣！甚至體形仲比之前更加大！
我知佢已經明白，我要留響度同呀峻共同進退，所以想表現比我睇，佢都一樣有能力留低響度！之但係。。。我又點可以咁自私，明知道咁危險，都仲留佢響度呢！
我伸出雙手將佢緊緊咁抱住，然後同佢講
“狗狗，我知道你想留低。。。但係唔可以丫。。。乖。。。幫我照顧好思語佢地！”
然後，我就鬆開雙手，轉而對住佢輕輕咁推一推，示意佢離開呢度！
為食狗望住我雙眼，“嗚嗚”咁叫一叫，就一枝箭咁向住樹林方向跑過去！
可兒佢地見到呢個情況，就開口同我講左句“小心啲”，然後就跟住為食狗跑！而思語就抱住我，講左句“一定要平安咁番嚟”，之後就跟隨大家，快速咁跑入樹林之中
眼見佢地都跑左入去，我就轉身諗住過去幫手啦！點知一轉身，就見到呀峻就向住我呢邊飛過嚟！然後“啪”一聲咁跌左響我面前嘅地上面！
我即刻伸手將佢扶起！但係呀峻起身之後，竟然將我推開，同時好迫切咁話
“你快啲走！同佢地一齊走！”
聽到佢咁講，我諗都無諗就即刻答佢
“我唔走！我點都唔會掉底你一個響度！”
而對面嘅怪物聽到我地嘅對話，就邊笑邊話
“桀桀桀。。。放心。。。你地一個都走唔甩。。。桀桀桀。。。骷髏鬼。。。出嚟。。。”
語畢，營地上面就出現在無數嘅裂縫！然後。。。一隻又一隻嘅骷髏鬼就響裂縫入面爬出嚟！一瞬間就佔領晒成個營地！
而斜坡之上，更有一大群骷髏鬼向住我地呢邊衝緊過嚟！
望住呢成千上萬嘅骷髏鬼。。。我吞一吞口水。。。然後緊緊咁握實手上條鞭。。。
記得呀峻講過，我地兩個加埋都唔係怪物嘅對手！而家仲有成班骷髏鬼響度。。。咁應該要點做先至好。。。！？
我同呀峻互望一眼，深深咁吸左一口氣之後，就擺好姿勢準備去迎接第一批嘅骷髏攻擊！
呀峻用長槍不停咁挑打圍攻過嚟嘅骷髏鬼，而我就不斷咁用鞭狠狠咁抽去骷髏鬼嘅身上！但係無論我地點樣打佢地都好，佢地根本就一啲損傷都無！
乜骷髏嘅骨架唔係應該一敲就散架咩！？
啲骨頭唔係用力一打就會碎架咩！？
就算無骨質疏鬆，都唔應該會硬成咁丫嘛！？
怪物見到我地比骷髏圍攻，一直發出“桀桀”嘅笑聲，不過佢並無出手，反而係響度旁觀！
我諗。。。佢應該係覺得將我地折磨致死，比起自己出手將我地一擊斃命，更加有樂趣。。。
但係。。。就響我以為佢會一直響度旁觀落去，直至到我地比骷髏海圍攻淹沒嘅時候，情況突然嚟左一個巨大嘅轉變！
當我見到啲骷髏鬼除左攻擊我地之外，有大部分仲向住樹林方向衝入去嘅時候，越打越急躁嘅我，就決定用符咒攻擊！我一手舞鞭，一手響衫袋度拎出一叠符紙，向住周圍散開，同時開口唸
“乾坤無極，風雷受命！雷降！”
符紙馬上化身為雷電，劈去周圍嘅骷髏鬼身上！
“啪，啪，啪！”骷髏鬼身上瞬間出現左一絲絲嘅裂痕！
呀峻見到咒術攻擊有用，就響褲袋度拎出左一張藍色符紙，向住面前嘅骷髏鬼飛過去，然後大喝一聲
“雷電之刃！斬！”
雷電化成一把把尖刃，插入去骷髏嘅骨頭上面，形成左一個個嘅缺口！而呀峻就馬上用長槍向住佢一下打落去！
隨著響亮嘅“噗！”一聲，我地終於都成功咁消滅左第一隻骷髏鬼！但係我地都嚟唔切去消滅第二隻，就聽到怪物開口叫班骷髏鬼退後！
跟住，佢血紅嘅雙眼就望住呀峻，陰森咁話
“你竟然係凌家嘅人！”
然後就轉而望向我，眼定定咁望實我！緩緩咁開口話
“仲有你。。。你係。。。秦家嘅人。。。我放你走。。。你快啲離開呢度。。。”
對於呢個突如其來嘅轉變，令到我成個人愕左一愕！
而響我愕住嘅呢一刻，怪物突然之間出手，向住呀峻一下拍落去！
見到呢個情況，我本能反應咁撲埋呀峻身上，用力咁將佢推開！但係做完呢個動作之後，我已經唔夠時間去避開佢嘅攻擊！望住頭頂拍落嚟嘅大手，我心諗
慘啦。。。今次實變成肉醬啦！
就響呢個千鈞一髮之際，我身上嘅降魔金鈴突然發出左一陣強烈刺眼嘅金光！然後飛出嚟，將果隻大手一下咁彈開！
跟住，我身前就出現左三個人。。。
黑無常。。。白無常。。。仲有拎住降魔金鈴嘅果位。。。修羅閻君！