命運: 第二章 - 重遇

就係個日，我好早就翻到學校禮堂，廢事第一次出更就畀大佬鬧。我行咗去前排，搵到個靚位就坐低咗。坐住影一日，好輕鬆姐！都唔知Miss Chan點解係都要搵我影。

坐咗一陣，係我後面出現咗把熟悉嘅聲音。

「喂阿易！」

我轉身一望，原來係Alex。佢係我地學校公認嘅男神，讀書運動音樂樣樣掂。最緊要係咩？靚仔一個。好開心可以識到呢個出生入死嘅老友，上天都算係對我不薄。

「你今日係咪要上台表演啊？」我問。





「係呀！你今日加油影多啲靚相send翻畀我啊！」Alex邊跑上台邊大嗌。

「得啦得啦！妖。」我鬧翻佢轉頭。

有時候，我就會覺得我係咪做緊Alex人生嘅配角。我嘅柒突顯出佢嘅型，佢嘅型突顯出我嘅更柒。從來，相中出現嘅只有佢同埋其他人，唯獨是我，就係渣機個個。
都唔知命運係咪想玩鳩我。

表演好快就開始咗。台上演奏嘅係咩我完全唔知，只係知道應該係西樂。音樂呢啲野我識條鐵咩。我拎起部好撚重嘅相機係度影啊影，將所有人嘅頭全部影一次，將Alex個頭影十次。我心諗：「咁樣肯定交到貨啦？都無人會睇翻啲相嘅。大家都淨係睇Alex㗎咋嘛。」

影曬前面嘅樂手之後，我就開始影後面嘅敲擊樂手。我都「鄧」佢地覺得有啲慘。大家都有得坐，得佢地要企足全程，公平咩？





突然，一個熟悉嘅面孔係我嘅viewfinder入面飄過。咁熟口面嘅？我放低相機，托托眼鏡，將自己個身向前挨，睇清楚後面一眾梁國雄議員。

係啦。就係個個女仔。我再舉起相機，zoom近個個長頭髮齊陰嘅女仔。「我記得呢個樣貌... 應該係係小學個陣見過佢...」我心諗。係啦！佢肯定係同我同一間小學嘅。我諗咗好耐，就係偏偏諗唔起佢個名。

明明有種熟悉嘅感覺，但係諗極都諗唔起真係好痛苦。

係小學個陣，我仲未係一個肥毒L。個陣可比係Alex嘅亞種。血氣方剛之時，就有係校隊打羽毛球。而呢個女仔，就係係校隊打波嘅時候認識嘅。

佢細我一年，我地個陣打完波之後都有一齊玩小學雞遊戲咁。但係自從我升中之後就無再聯絡。





回憶畀我嘅感覺係真實嘅。於是我決定，我要表演完咗之後搵佢。