命運: 第一章 - 前言

是咁的。

我叫阿易，一個係學校都算係有少少名氣嘅男仔。啊唔係，應該係噏我個名出嚟個陣，啲人會：「哦～個個毒撚啊？」嘅一個人。無錯，雖然我個名雖然係廣為人知，但係我只係一個廣為人知嘅毒撚。個樣普通，BMI正常但係有個肚腩，好彩有翻啲高度震懾吓人。

從Form1開始就自摺嘅我，係中學最大嘅突破就係高中去咗玩個咩校園電視台。當時嘅我睇咗啲唔知咩濕鳩youtube片，話咩識影相嘅男仔肯定溝死女，於是我就放膽一試，買咗支巨砲加好撚重嘅相機，入咗校園電視台，幫學校活動影吓相咁。

Form5個年嘅聖誕，學校搞咗個樂團表演，啲負責老師見到呢啲吃力不討好嘅活動，就二話不說，塞咗我呢個新仔去影相。

「去啦！增加啲影相嘅經驗啊！」負責嘅Miss Chan話。





估唔到呢一次嘅機會，畀我遇見翻佢。