「續寫」無啦啦多左幾個家姐同阿妺: 終結之時
之後落黎既日子，我係學校都顯得無所事事，因為我根本無事可做。
調查既事我諗過，都係好似二家姐講既咁，我都係唔應該插手，免得打草驚蛇。
所以我最後係選擇左將呢件事交比阿威，等佢幫我查。
係學校我就顯得無所事事，但係離開左學校之後我就擔驚受怕。
我怕對方見我咁耐都無覆佢，會再一次開始行動，對我身邊既人落手。
我每日放學都即刻拉埋Sarah親自去接羽晨放學，以免再出咩意外。
萬幸既係，呢段時間都未見對方做D乜野，大家都好安全。
雖然二家姐呢排無返屋企，不過佢每日都有Whatsapp大家姐報平安，叫我地唔洗擔心。
奇怪啦，明明佢地唔係我既親姐妹，我都會咁擔心既。
睇黎而家最後既隔壁就只係個姓氏啦，我改唔改埋姓好呢？
唔係，而家並唔係呢D野既時候，解決左呢件事之後再諗都未遲。
我而家有好多野想做，但全部都比呢件事阻住，真係令人有少少唔高興。
啊，仲有七星既事喎，差唔多到聚會既日子，係時候去搵下阿雪同諾儀傾下，爭取佢地支持先。
先唔講諾儀，阿雪應該無乜可能支持我，要點先可以說服到佢呢。
講緊係解…
屌，我都無佢地聯絡方法，點樣搵佢地。
都係搵左Ellie，問下佢意見先。
於是我又打比Ellie，當然係瞞住其他人啦，呢件事暫時唔係好想比Sarah佢地知，免得佢地又擔心。
我：「喂Ellie，得唔得閒？」
Ellie：「得閒既，你搵我有咩事？」
我：「之前你咪同我提過叫我係黎緊既七星會議上提個動議既，我有野想同你傾下。」
Ellie：「哦，係咪你想改變主意？」
我：「唔係，只係我唔記得左我無佢地兩個既聯絡方法，想問下你有無方法搵到佢地啫。」
「我要說服佢地到時候投票支持我個動議嘛。」
Ellie：「哦原來係因為呢件事，唔洗麻煩你親自出面啦，我去同佢地傾就可以啦。」
「畢竟而家你既一舉一動應該都被人監視住，你去搵佢地兩個可能會刺激到對方，到時又唔知會發生D咩事。」
我：「不過我…」
Ellie：「就當係比我幫你分憂下，幫你做返D野啦。」
佢講到咁，我都無辦法推塘啦。
不過，我仍然有可以做既事。
我：「Ellie啊。」
Ellie：「嗯？做咩事？」
我：「今次之後，我地不如搵次真係好似你之前講既咁，一齊去一次旅行，大家一齊去。」
Ellie：「嗯，今次之後再算啦，無乜野的話我收線先啦。」
我：「好，學校見喇我地。」
結果我都係咩都無做，將所有野都交哂比其他人幫我。
其實我咁樣心情係幾矛盾，又開心又慚愧。
開心既係有咁多人肯幫我，咁證明我既人緣都幾好。
慚愧既係自己好似成日都要佢地幫咁，仲係一次接一次，永無休止咁。
唉，希望今次會係最後一次啦。
話咁快，今日就已經係七星會議既日子。
唔知點解，今日我一起身落樓食早餐就見到佢地五個係齊度，佢地所有人都黎哂。
邊五個？唔洗我講啦掛？仲有邊五個人吖，咪係Sarah，Yui，Ellen，Ellie仲有Anna佢地五個囉。
我有一刻以為自己未訓醒，直至我聽到Anna把聲。
Anna：「傻仔明！今日咩日子你知唔知呀！你咁污wea都有既！」
係真係，我唔係發緊夢，佢地真係係度。
我：「啊…點解你地會係度既？黎玩？」
Anna：「你就黎玩！我地係特登黎陪你去七星會議架！」
我：「吓，唔洗啦，不如你地係呢度等我好消息咪仲好。」
Ellen：「唔得！我地都要去！！」
嘩Ellen突然發脾氣，嚇左我一跳。
我望一望係佢身後既Ellie，只見佢鬆一鬆膊，好似話我知佢都無辦法咁。
Sarah係呢個時候走埋黎，捉住我隻手。
Sarah：「就俾我地陪你去啦，一次咁多，好唔好？」
啊…我最受唔住呢D楚楚可憐樣既請求架啦…
算啦，反正今次都會係最後一次架啦，就俾佢地一齊去啦。
我：「好啦，大家一齊去啦，不過你地要應承我去到唔可以亂講野架。」
Anna：「你都傻傻地，呢D場合我地去得多過你啦洗你提，行啦唔係就要遲到。」
屌，又係喎，佢地見慣大場面架啦洗乜我擔心。
就係咁，我就帶住佢地五個一齊出門口啦。
不過一出門口，我又嚇傻左啦。
屋企門口居然停左七架車，仲有好多西裝友係度。
我：「嘩咩事？佢地唔會係…」
Ellen：「放心啦，佢地係我地屋企既保鏢黎架啫。」
Anna：「Daddy唔放心我，所以要我帶保鏢，我估唔到Ellen佢地都係。」
我：「哦哦…原來係咁。」
我傻下傻下咁上左車，仲未搞清楚發生咩事。
而家咁樣搞到我好似大陸高官咁，有咁多保鏢。
呢種奇幻既感覺直至我落車先結束，結束既同時我亦發現左一件事。
成程車佢地五個都無出聲。
可能佢地都係緊張先唔出聲啫，話就話佢地見慣大場面啫，而家係七星喎，少少緊張都難免既。
阿威：「喂午安呀明哥，咦點解Anna姐你地都係度既？」
我：「哦，佢地…」
Anna：「因為我地想親眼睇到個結局，所以我地先黎呢度。」
結局？Anna佢講咩呀？我聽唔明既。
阿威：「好喇我地唔好再係度哂時間啦，有咩等入左去先講啦。」
我：「岩呀，成村人企係度好奇怪，我地都係入去先啦。」
又返到去之前果個演講廳，又係果張大圓檯。
不過今次都係最後一次喇，過埋今次我就唔洗再黎呢度啦。
阿威：「睇黎我地係最早到喎，點做好，上去坐低定坐住台下先？」
我：「eh…上去囉，反正最後都係要上去。」
「咁Sarah你地幾個就坐住係台下等我啦。」
Sarah：「嗯，你唔洗擔心，我地自己可以搞掂。」
呢層我都知，所以我都無擔心。
我同阿威兩個一邊吹水一邊行上去台，嘗試去抒緩下種緊張感。
我：「喂，聽講你收情信喎。」
阿威：「屌，咪聽阿惠個傻鳩亂講，無d咁既事。」
我：「你咁緊張即係真架啦，正啦有女溝。」
阿威：「你好意思話我？你有成五條女喎明哥。」
我：「哈哈，又好似係喎，當我無講過！」
阿威：「喂，之前你叫我幫手查下學校有無可疑人物既。」
我：「啊，係呀，係咪有咩事？」
阿威：「我查到D野，搵到一個可疑人物，不過我唔知話唔話你知好。」
我：「有咩咪講囉，唔怕喎，大家兄弟黎架嘛。」
阿威：「嗱，係你叫我講架，你聽完唔好激動呀，我懷疑係Ellie。」
Ellie？？
我忍唔住驚訝，擰轉頭望向坐係台下既Ellie。
無可能架，Ellie佢仲話要幫我…
阿雪：「阿明！阿威！乜你地咁早呀？」
阿雪一句招呼將我由混亂暫時拉返出黎，我發現原來阿雪同諾儀都已經到左。
阿雪：「阿明？你無事吖嘛？面色好似唔係幾好咁喎。」
我：「哦…我無事，無事。一陣投票就拜託你地啦。」
阿雪：「雖然我唔知點解你會想做D咁既野，但係無問題吖見你咁有誠意。」
諾儀：「哦小事啦，舉手之勞，唔洗講到咁大件事既，不過我都唔係好明點解你要咁。」
我：「一切都係為左大家好。」
諾儀：「咁既然你都咁講，就無需要再問啦，行啦。」
之後我地四個就上台坐低，靜候阿天同阿信到。
佢地兩個好快都到埋，阿天仲啤到我行一行，睇黎仲嬲緊我之前打佢件事。
之後又有條友走左上黎，拎哂咪咁，應該係做mc。
「大家好，今日既七星會議將會由我主持。」
嗱，都話架啦。
MC：「首先，我地需要處理由成員提出既動議。」
「第一項動議，係由陳煒明先生提出，內容係…咦？」
「解散七星…」
聽到「解散七星」呢四個字，場內各處都傳出嘩聲，阿天直頭企起身拍哂檯，好似顛左咁破口大鬧。
阿天：「你顛左呀陳煒明？解散七星？憑咩呀你？」
我：「唔滿意唔同意的話你咪投反對票囉，我好專重民主既。」
MC：「Eh…陳煒明先生，或者你需唔需要解釋一下你呢一個動議呢？」
我：「好，一句講哂啦，七星無存在既意義，所以我先決定解散七星。」
「反正七星而家都係膠著狀態，都唔會有共識，功能可以話係完全停止，咁不如解散。」
我：「講多都無謂，不如而家就投票啦。」
雖然阿天聽完我講仲係好嬲，不過佢都坐返低準備投票。
MC：「咁…而家就進行投票啦，請你地幾位用手上既IPAD投票，投票將會以不記名方式進行。」
我地六個人都開始各自咁點自己手上部IPAD，我好快就投左票，充滿自信咁望住阿天。
MC：「好，系統顯示六位都已經投左票，我而家將會宣讀結果。」
好，一切都結束啦，七星都要完啦。
「結果係一票贊成，五票反對，我宣布本項議案不獲通過。」
一比五？點會架…
Ellie唔係幫我同阿雪仲有諾儀傾掂…
咪住先。
點解會係一比五？就算阿雪仲有諾儀都唔支持都好...
咁阿威個票呢？