「續寫」無啦啦多左幾個家姐同阿妺: 新希望
我：「你知係邊個！？快D話我知！」
二家姐都仲未查到既野，Ellie竟然話佢知道？
Ellie：「而家仲未可以話你知住，因為我未夠證據，我唔想講D無說服力既野。」
「我想你聽日返學將呢件事講比大家聽，我覺得佢地有權利知道。」
「不過記住只係講呢件事就夠啦，知唔知？」
「同埋仲有一件事…」
Ellie講完呢件事之後，我成個人打左個突。
第一個反應係點解要咁做，第二反應係幾好喎，點解我一直以來諗唔到要咁做。
我：「好，咁我就同佢講下，我估佢一定會贊成既。」
Ellie：「嗯，咁就好啦，咁我地聽日再講啦，拜拜。」
我：「嗯，早d抖啦。」
雖然唔知點解Ellie會突然叫我咁做，但係呢件事真係令人幾興奮，搞到我都幾乎唔記得正經野。
呀，希望可以說服到阿雪啦，如果唔係就真係要去搵晨哥幫手。
「阿明你係咪係入面？我入黎架啦。」
屌！仆街！係二家姐！要即刻收埋份野先得！！
我連「等陣！」都未講得切，二家姐就已經入左黎。
我當時仲手忙腳亂咁放緊份野入個公文袋，但已經太遲，已經比二家姐見到。
二家姐：「唔洗收啦，我黎就係為左睇下呢份到底係咩野。」
我：「哦…咁…比你睇喇。」
屌，好撚尷尬。
二家姐一手接過份野，好快咁睇完，之後放返入過公文袋。
二家姐：「你打算點做？」
哎…又係呢個問題，我岩岩先答完呀。
我：「老老實實，我有諗過應承…」
二家姐：「你痴線架應承？呢d仆街點可以同佢妥協！」
我：「唔係…你聽我講埋先…我開頭係因為唔想再連累你地所以先…」
「不過我諗清楚啦，都唔知對方會唔會反口，都係搵對方出黎，等佢唔敢再搞風搞雨好D。」
二家姐：「嗯，咁先係架嘛！不過頭先送羽晨返黎既人，你知唔知係咩人？」
我：「吓，佢地個個戴哂超，我真係唔知係咩人喎。」
二家姐：「我頭先偷偷咁影左佢地相，send左比我朋友，佢地查到係阿傑既保鏢。
係阿傑既保鏢！？
我：「吓咁即係…」
二家姐：「咁即係話，對方唔只係操控到阿傑一個人咁簡單，就連佢既保鏢都可以用埋，分分鐘已經吞併左阿傑屋企兩間公司。」
「咁樣查的話，好快就搵到幕後黑手。」
連二家姐都突然間話就快查到？？嘩真相突然近左咁多既！
不過聽到咁我突然有少少擔心二家姐，今次係羽晨，如果有下次的話好有可能就係二家姐…
我：「二家姐，我知你係為我好，但查還查，你自己都要小心D…我怕我唔妥協的話對方下個目標會係二家姐你。」
聽到我咁講，二家姐呆左一呆，之後行左埋黎，輕輕咁打左我心口一下。
「唔洗你擔心我，我自己會小心。」
「你自己都要小心D。」
二家姐用一種奇怪既語氣同我講呢兩句說話，講完就自己走左。
點解用奇怪黎形容呢？因為我印象中二家姐好似未試過咁同我講野。
要具體去形容呢種語氣的話…
溫柔？
不過我好快就打消左呢個念頭，我印象中既二家姐同溫柔呢兩個宇係完全扯唔上關係。
一定係錯覺，一定係錯覺。
我之後有去睇下羽晨，但當時佢已經訓著左，仲係同Yui，Sarah三個人一齊訓。
聽大家姐講，羽晨話今日去左迪士尼玩，玩到好開心好攰，所以好眼訓。
羽晨係完全唔知道自己其實係被人綁架，不過咁可能仲好。
如果佢知道自己被人綁架，肯定會嚇到傻，邊會好似而家咁開心。
呢樣亦係我其中一個諗唔明既地方，點解對方會帶羽晨去玩，而唔係直接困住羽晨？
直接困住羽晨唔係仲好咩？至少如果我係對方的話我會選擇咁做，咁做應該可以更加威脅到人架嘛。
屌，都係當我無諗過，而家好多報警撚，一個唔該hack入我個腦讀我思想我咪仆街？講返句以上內容純屬虛構戴返個頭盔先。
唔理咁多啦，總知我知道對方係不懷好意就得啦，理得佢點做啫。
到左第二朝我就照Ellie吩咐返學校同佢地講羽晨同份文件既事，除左一早已經知道哂既Ellie之外，佢地聽完個個都好震驚。
Anna：「豈有此理！我今日返去就叫我Daddy派人去保護你地！」
Ellen：「好過分囉，居然對人地屋企人出手。」
阿威：「咁阿明你打算點做..？」
我：「我估我應該唔會應承架啦。都唔知對方信唔信得過。」
阿威：「咁之後呢？我地而家又查唔到對方係咩人，好危險喎。」
我：「係，但都唔可以屈服，一於查到底。」
阿威：「好，我地一齊查！」
我：「果然係好兄弟，係喎仲有一件事想同你傾，黎緊七星咪有個會要開既，我有個動議想提出，想你支持。」
阿威：「得啦，只要係你提出既我都會支持。」
我：「吓你唔洗聽下先呀？」
阿威：「屌咪話左唔洗囉，我點都撐你，喂唔講啦，我肚痛，順手再去收一收風先。」
我：「好兄弟！辛苦你喇。」
阿威：「屌，講呢D，鬼叫我聰明咩。」
阿威之後就先行離開，留低我地幾個繼續討論呢件事，佢地個個都講到好激動，又話要打要殺之類。
但我點都估唔到，原來呢一個moment已經踏入左最終決戰。
如果我當時係知道一切的話，或者一切仲有彎轉。